ޢިރާޤުގެ ސިޔާސީ ނިޒާމަށް އިތުބާރު ނެތް ދުވަސްވަރެއްގައި އެ ޤައުމުގައި ޢާއްމު އިންތިޚާބެއް ބޭއްވުމަށް ނިންމައިފިއެވެ.
އޮކްޓޯބަރު މަހުގެ 10ވަނަ ދުވަހު ޢިރާޤުގެ ޢާއްމު އިންތިޚާބު ބޭއްވުމަށް ނިންމާފައިވަނީ 2019ވަނަ އަހަރު އެ ޤައުމުގައި ކުރި ވަރުގަދަ މުޒާހަރާތަކުގެ ސަބަބުންނެވެ. އެ އިންތިޚާބު ބާއްވަނީ ކޯވިޑް-19ގެ ސަބަބުން ޢިރާޤުގެ އިޤްތިޞާދީ ޙާލަތު އިތުރަށް ގޯސްވެ ސިޔާސީ ބައިބައިވުން އިންތިހާއަށް ބޮޑުވެފައިވާ ދަނޑިވަޅެއްގައެވެ.
އައު އިންތިޚާބީ ޤާނޫނެއްގެ ދަށުން ޢިރާޤުގައި ޢާއްމު އިންތިޚާބެއް ބޭއްވުމަށް ނިންމި ނަމަވެސް އެ ޤައުމުގެ ގިނަ ރައްޔިތުންވަނީ ސިޔާސީ ނިޒާމަށް އިތުބާރު ނުކުރާކަމަށް ބުނެ ވޯޓުލާން ނުދާނެކަމަށް ބުނެފައެވެ. އެއާއެކު އިންތިޚާބުގައި ވޯޓުލާނެ މީހުންގެ ނިޞްބަތް ބޮޑު ތަނުން ދަށަށް ދާނެކަމަށް ބެލެވެއެވެ. ނަމަވެސް ޢިރާޤުގެ ނުފޫޒުގަދަ ޝިޢީ އިސްވެރިންވަނީ ވޯޓުލާން ނުކުމެ ޙާލަތު ބަދަލުކުރުމަށް ޢާއްމުންނަށް ބާރުއަޅައިފައެވެ.