ދިގު ރާސްތާއަށް ދަތުރުކުރުމުގެ ޤާބިލްކަން ލިބިފައިވާ ކުރޫސް މިސައިލެއް އުތުރު ކޮރެޔާއިން ތަޙްލީލުކޮށްފިއެވެ.
ކޮރެޔަން ސެންޓުރަލް ނިވްސް އެޖޭންސީން ބުނެފައިވަނީ އުތުރު ކޮރެޔާއިން ތަޙްލީލުކޮށްފައިވަނީ 1،500 ކިލޯމީޓަރަށް ދަތުރުކުރުމުގެ ޤާބިލްކަން ލިބިފައިވާ ކުރޫސް މިސައިލެއްކަމަށެވެ. އަދި އެ މިސައިލް އުފެއްދުމަށް ދެ އަހަރުދުވަސް ހޭދަވިކަމަށްވެސް އެ ނޫސް އިދާރާއިން ބުނެފައިވެއެވެ.
ބެލިސްޓިކް މިސައިލާއި ކުރޫސް މިސައިލަކީ އުތުރު ކޮރެޔާގެ އަސްކަރީ ޤާބިލްކަން ރަމުޒުކޮށްދޭ ހަތިޔާރުތަކުގެ ގޮތުގައި އެ ޤައުމުގެ ޒަޢީމު ކިމު ޖޮން އުން ސިފަކުރައްވައެވެ. އުތުރު ކޮރެޔާއިން އިތުރު މިސައިލެއް ތަޙްލީލުކޮށްފައިވަނީ އެ ޤައުމުގެ ނިޔުކްލިޔަރ ހަތިޔާރު އުފެއްދުމުގެ މަޝްރޫޢުއާ ގުޅޭގޮތުން އެމެރިކާއާއެކު ކުރަމުންދާ މަޝްވަރާތައް ހުއްޓިފައިވާ ދަނޑިވަޅެއްގައެވެ.
އުތުރު ކޮރެޔާއިން އެންމެ ފަހުން މިސައިލެއް ތަޙްލީލުކޮށްފައިވަނީ މިދިޔަ މާރިޗު މަހުގެ ތެރޭގައެވެ. އެ ފަހަރު އެ ޤައުމުން ތަޙްލީލުކޮށްފައިވަނީ ކުރު ރާސްތާއަށް ދަތުރުކުރުމުގެ ޤާބިލްކަން ލިބިފައިވާ މިސައިލެކެވެ. އޭގެ އިތުރުން މ،ިދިޔަ ޖަނަވަރީ މަހުގެ ތެރޭގައި އެމެރިކާގެ ރިޔާސީ ހުވައި ޖޯ ބައިޑަން ކުރެއްވުމުގެ މަދު ގަޑިއިރުތަކެއްގެ ކުރިންވެސް އުތުރު ކޮރެޔާއިންވަނީ މިސައިލެއް ތަޙްލީލުކޮށްފައެވެ.
ދިގު ރާސްތާއަށް ދަތުރުކުރުމުގެ ޤާބިލްކަން ލިބިފައިވާ ކުރޫސް މިސައިލެއް އުތުރު ކޮރެޔާއިން ތަޙްލީލުކުރުމުން އަވަށްޓެރި ދެކުނު ކޮރެޔާއާއި ޖަޕާނުންވަނީ ކަނބޮޑުވަން ފާޅުކޮށްފައެވެ.