ގިނީގެ އަސްކަރިއްޔާގެ ޚާއްޞަ ފައުޖުތަކުން ބަޣާވާތްކޮށް އެ ޤައުމުގެ ވެރިކަން ވައްޓާލައިފިއެވެ.
ޓީވީ މެދުވެރިކޮށް ވާހަކަދައްކަވަމުން ގިނީގެ އަސްކަރިއްޔާގެ ޚާއްޞަ ފައުޖުތަކުގެ އެންމެ އިސްވެރިޔާ ކާނަލް މަމަދީ ދޫންބޫޔާ ވިދާޅުވީ އޭނާގެ އިރުޝާދުގެ ދަށުން ގިނީގެ ސަރުކާރާއި އެ ޤައުމުގެ ޤާނޫނުއަސާސީ އުވާލައިފައިވާކަމަށެވެ. ދޫންބޫޔާ ވިދާޅުވި ގޮތުގައި ޚާއްޞަ ފައުޖުތަކުންވަނީ ވައިގެ މަގުންނާއި އެއްގަމު މަގުން ގިނީ ބަންދުކޮށްފައެވެ. އޭނާ ވިދާޅުވީ ގިނީގެ ރައީސް އަލްފާ ކޫންދީގެ ދިގު ވެރިކަމުގައި އެ ޤައުމުގައި ޚިޔާނާއި ފަސާދައާއި ފަޤީރުކަން އިންތިހާއަށް ފެތުރިފައިވާކަމަށާއި އެ ޤައުމުގައި އައު ޤާނޫނުއަސާސީއެއް އެކުލަވާލައްވާނެކަމަށެވެ.
ސެޕުޓެންބަރު މަހުގެ 5ވަނަ ދުވަހު ގިނީގެ އަސްކަރިއްޔާގެ ޚާއްޞަ ފައުޖުތަކުންވަނީ އެ ޤައުމުގެ ރިޔާސީ ގަނޑުވަރަށް ބަޑިން ޙަމަލާދިނުމަށްފަހު އެ އިމާރާތަށް ވަދެ އެ ޤައުމުގެ ރައީސް ކޫންދީއާއި ސަރުކާރުގެ ބައެއް އިސްވެރިން ހައްޔަރުކޮށްފައެވެ. ޚާއްޞަ ފައުޖުތަކުގެ ބެލުމުގެ ދަށުގައި ކޫންދީ ހުންނަވައި ވީޑިޔޯއެއްވެސްވަނީ މީސްމީޑިޔާގައި ޢާއްމުކޮށްފައެވެ. ނަމަވެސް ހައްޔަރުކޮށްގެން ކޫންދީ ގެންދިޔަ ތަނެއް ގިނީގެ ޚާއްޞަ ފައުޖުތަކުން ބުނެފައެއް ނުވެއެވެ. އެ ފައުޖުތަކުންވަނީ ޢުމުރުފުޅުން 83 އަހަރުފުޅުގެ ކޫންދީގެ ޙާލުކޮޅު ރަނގަޅުކަމަށާއި އޭނާއަށް ބޭނުންވާނެ ޞިއްހީ ފަރުވާ ކަށަވަރުކޮށްދޭނެކަމުގެ ޔަޤީންކަން ދީފައެވެ.
މިދިޔަ އޮކްޓޯބަރު މަހުގެ ތެރޭގައި ގިނީގައި ބޭއްވި ރިޔާސީ އިންތިޚާބު ކާމިޔާބުކުރައްވައި ކޫންދީވަނީ ވެރިކަމުގެ ތިންވަނަ ދަޢުރެއް ކަށަވަރުކުރައްވައިފައެވެ. އެއާއެކު އެ ޤައުމުވަނީ ސިޔާސީ ހަމަނުޖެހުމެއްގެ ތެރެއަށް ވެއްޓިފައެވެ. އަދި ކޫންދީއާ ދެކޮޅަށް ގިނީގައި ވަރުގަދަ މުޒާހަރާތަކެއް ކުރާތާވަނީ ދުވަސްތަކެއް ވެފައެވެ. އެފަދަ ދަނޑިވަޅެއްގައި ކޫންދީގެ ސަރުކާރުންވަނީ ގިނީގައި ނަގަމުންދާ ޓެކްސްގެ ނިޞްބަތް އިތުރުކޮށްފައެވެ. އެއާއެކު އެ ޤައުމުގެ ތަކެތީގެ އަގުތައް އިންތިހާއަށް އުފުލުނެވެ. އެ ގޮތުން ތެލުގެ އަގުތައް 20 އިންސައްތައަށް އުފުލުމުން ގިނީގެ ރައްޔިތުންނަށް އިތުރު ތަކްލީފުތަކެއް އުފުލަން ޖެހުނެވެ.
އދއާއި ވިލާތުގެ އިއްތިޙާދާއި އެމެރިކާއިންވަނީ ގިނީގައި ކުރި އަސްކަރީ ބަޣާވާތް ކުށްވެރިކޮށްފައެވެ.