ވޯލްޑް ކަޕް ކޮލިފައިން ޔޫރަޕް ސަރަހައްދުގެ ގްރޫޕް އީ ގައި ބެލްޖިއަމް އާއި ޗެކް ރިޕަބްލިކް ބައްދަލުކުރިމެޗް ބެލްޖިއަމް ކާމިޔާބުކޮށްފިއެވެ. ބެލްޖިއަމްގައި ކުޅުނު މިމެޗް އެޓީމް ކާމިޔާބުކުރީ ހީކުރިވަރަށް ވުރެ ފަސޭހަ ކަމާއެކު 3 ލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބެލްޖިއަމްއެވެ. މިމެޗްގެ ފުރަތަމަ ލަނޑު މެޗްގެ 8 ވަނަ މިނެޓްގައި ޖަހައިދިނީ ހުނަރުވެރި ފޯވަޑް ރޮމެލޫ ލުކާކޫއެވެ. މިއީ އޭނާ ބެލްޖިއަމް ޤައުމީ ޓީމަށް ކުޅުނު 100 ވަނަ މެޗްގައި ޖަހައިދިން 67 ވަނަ ލަނޑެވެ. ލުކާކޫ ވެފައިވަނީ ބެލްޖިއަމް ޓީމަށް 100 މެޗް ހަމަކުރި ހަވަނަ ކުޅުންތެރިޔާއަށެވެ. މިމެޗްގައި ބެލްޖިއަމްގެ ދެވަނަ ލަނޑު މެޗްގެ 41 ވަނަ މިނެޓްގައި ޖަހައިދިނީ ބެލްޖިއަމް ޓީމްގެ ކެޕްޓަން އެޑިން ހަޒާޑްއެވެ. މިއީ ފަހަކަށް އައިސް އަނިޔާގެ ގިނަ މައްސަލަ ތަކަކާއި ކުރިމަތިވެފައިވާ ހަޒާޑް 2019 ވަނަ އަހަރުގެ ނޮވެމްބަރު މަހުގެ ފަހުން ޤައުމީ ޓީމަށް ޖަހައިދިން ފުރަތަމަ ލަނޑެވެ. މިމެޗްގައި ބެލްޖިއަމްގެ ފަހު ލަނޑު މެޗްގެ 65 ވަނަ މިނެޓްގައި ޖަހައިދިނީ އެލެކްސިސް ސައެލެމައެކަރސްއެވެ. މިމެޗްގައި ލުކާކޫއަށް ދެއްކި ރީނދޫ ކާޑާއެކު ދެކާޑު ހަމަވެފައިވުމުގެ ސަބަބުން އޭނާއަށް އަންނަ ބުދަ ދުވަހު ބެލަރޫސް އާއި ބައްދަލުކުރާ މެޗްގައި ނުކުޅެވޭނެއެވެ.
މިކާމިޔާބީއާއެކު ބެލްޖިއަމް މިހާރު އުޅެނީ ކުޅުނު ފަސް މެޗުން ލިބިފައިވާ 13 ޕޮއިންޓާއެކު ތާވަލްގެ އެއްވަނައިގައެވެ. ޗެކް ރިޕަބްލިކް އުޅެނީ ކުޅުނު ފަސް މެޗުން ލިބިފައިވާ 7 ޕޮއިންޓާއެކު ދެވަނައިގައެވެ. އަދި ތިންވަނައިގައި އުޅޭ ވޭލްސް 3 މެޗުން 6 ޕޮއިންޓް ލިބިފައިވުމުން އެޓީމަށް ދެވަނަ އެރުމުގެ ފުރުސަތު ބޮޑެވެ.