އަފްޣާނިސްތާނުގައި ވެރިކަންކުރާ ޠާލިބާން ޖަމާޢަތާއި އިދިކޮޅު ހަނގުރާމަވެރިންނާ ދެމެދު ވަރުގަދަ ކުރިމަތިލުންތަކެއް ހިނގައިފިއެވެ.
ޠާލިބާނުންގެ ބާރުގެ ދަށަށް އަފްޣާނިސްތާނުގެ ވެރިރަށް ކާބުލް ގެނައުމަށްފަހު އެ ޖަމާޢަތުގެ ވެރިކަމެއް އެ ޤައުމުގައި ޤާއިމުކުރި ނަމަވެސް އެ ޤައުމުގެ 34 ޕުރޮވިންސްގެ ތެރެއިން އުތުރުގައި އޮންނަ ޕަންޖުޝީރު އެ ޖަމާޢަތުގެ ބާރުގެ ދަށަށް ގެނެވިފައެއް ނުވެއެވެ. ޕަންޖުޝީރަކީ ޠާލިބާނުންނާ ދެކޮޅު ގިނަ ޢަދަދެއްގެ ހަނގުރާމަވެރިން ދިރިއުޅޭ ސަރަހައްދެކެވެ. އެއީ 1980ގެ އަހަރުތަކުގެ ތެރޭގައި އަފްޣާނިސްތާން އިސްތިޢުމާރުކުރި ރަޝިޔާގެ އަސްކަރީ ފައުޖުތަކާ ދެކޮޅަށް ކުރި ޖިހާދުގެ ބަޠަލެއްކަމަށްވާ އަޙްމަދު ޝާހް މައްސޫދަށް ބޮޑު ތާޢީދެއް އޮންނަ ސަރަޙައްދެކެވެ. އަޙްމަދު ޝާހް މައްސޫދުވަނީ 2001ވަނަ އަހަރުގެ ސެޕުޓެންބަރު މަހުގެ ތެރޭގައި ޠާލިބާނުން ދިން ޙަމަލާއެއްގައި މަރުވެފައެވެ. އޭގެ ފަހުން ޠާލިބާނުންނާ ދެކޮޅަށް އެންމެ އިސްކޮށް ޙަރަކާތްތެރިވަނީ އޭނާގެ ދަރިފުޅު އަޙްމަދު މައްސޫދާއި އޭނާއަށް ތާޢީދުކުރާ ހަނގުރާމަވެރިންނެވެ. އެ ގޮތުން އަފްޢާނިސްތާނުގެ ވެރިކަމަށް ދެވަނަ ފަހަރަށް ޠާލިބާނުން އައުމުން އަޙްމަދު މައްސޫދާއި އޭނާއަށް ތާޢީދުކުރާ ގިނަ ޢަދަދެއްގެ ހަނގުރާމަވެރިންވަނީ ޕަންޖުޝީރަށް ޖަމާވެފައެވެ.
ޕަންޖުޝީރު އޮންނަ ސަރަޙައްދަށް ޠާލިބާނުންގެ އެތައް ހާސް ހަނގުރާމަވެރިންނެއް ފޮނުވުމަށްފަހު އެ ޖަމާޢަތުންވަނީ އިދިކޮޅު ހަނގުރާމަވެރިން ހަތިޔާރު ބެހެއްޓުމަށް ގޮވާލައި އެއްބައިވަންތަވުމަށް ދަޢުވަތުދީފައެވެ. ނަމަވެސް އިދިކޮޅު ހަނގުރާމަވެރިންގެ ފަރާތުން ޞުލްޙަވުމުގެ އިޝާރާތެއް ނުލިބުމުންކަމަށް ބުނެ ޠާލިބާނުންވަނީ ޕަންޖުޝީރަށް ޙަމަލާ ދޭން ފަށައިފައެވެ. އެ ގޮތުން ޠާލިބާނުންގެ ބާރުގެ ދަށަށް ޕަންޖުޝީރުގެ ބައެއް ސަރަޙައްދު ގެނެސްފައިވާކަމަށް އެ ޖަމާޢަތުން ބުނެފައިވެއެވެ. އަދި އެ ޙަމަލާތަކުގައި ގިނަ ޢަދަދެއްގެ އިދިކޮޅު ހަނގުރާމަވެރިން މަރުވެފައިވާކަމަށްވެސް ޠާލިބާނުން ބުނެފައިވެއެވެ. ނަމަވެސް އިދިކޮޅު ހަނގުރާމަވެރިންވަނީ އެ ވާހަކަތައް ދޮގުކޮށްފައެވެ. އެ ގޮތުން ޕަންޖުޝީރަށް ވަންނަން ޠާލިބާނުންކުރަމުންދާ ހުރިހާ މަސައްކަތެއް ހުއްޓުވާފައިވާކަމަށާއި އެ ޕުރޮވިންސްގެ އެއްވެސް ސަރަޙައްދެއް އެ ޖަމާޢަތުގެ ބާރުގެ ދަށަށް ނުދާކަމަށްވެސް އިދިކޮޅު ހަނގުރާމަވެރިން ބުނެފައިވެއެވެ. އިދިކޮޅު ހަނގުރާމަވެރިންނާއި ޠާލިބާނުންނާ ދެމެދު ވަރުގަދަ ޙަމަލާތަކެއް ބަދަލުކުރި ނަމަވެސް ލިބުނު ގެއްލުމެއް އެއްވެސް ފަރާތަކުން ހާމަކޮށްފައެއް ނުވެއެވެ.
ޕަންޖުޝީރު އޮންނަ ސަރަހައްދުގެ ގޮތުން އެ ޕުރޮވިންސަށް ބޭރުން އަންނަ ބަޔަކަށް އަސްކަރީ ކާމިޔާބެއް ހޯދުމަކީ އުނދަގޫ ކަމެކެވެ. އެ ގޮތުން 1980ގެ އަހަރުތަކުގައި ރަޝިޔާގެ ފައުޖުތައް އެ ސަރަޙައްދަށް ދިން ޙަމަލާތަކުގައި ބޭނުންކުރި ޓޭންކަރުތަކުގެ ބައިތައް އަދިވެސް ޕަންޖުޝީރުގެ ވާދީން ފެންނަން ހުރެއެވެ. ނަމަވެސް އަސްކަރީ ތަޖުރިބާކާރުން ބުނާ ގޮތުގައި ބޭރުގެ އެހީތެރިކަމެއް ނުލިބި ޠާލިބާނުންނާ ކުރިމަތިލައި އަޙްމަދު މައްސޫދަށް ތާޢީދުކުރާ 6،000 ހަނގުރާމަވެރިންނަށް ކާމިޔާބެއް ހޯދުމަކީ ނާދިރުކަމެކެވެ.