އަފްޣާނިސްތާނުގައި ވެރިކަންކުރާ ޠާލިބާނުން އަވަސްއަރުވާލައިގެން ބަލައިގަންނަން ބޭނުންނުވި ނަމަވެސް އެ ޖަމާޢަތާ ގުޅިގެން މަސައްކަތްކުރުމަށް ތައްޔާރުކަމަށް ވިލާތުގެ އިއްތިޙާދުން ބުނެފިއެވެ.
އޭޝިޔާއާއި ޕެސިފިކް ސަރަޙައްދަށް ކަނޑައަޅާފައިވާ ވިލާތުގެ ކޮމިޝަންގެ މެނޭޖިން ޑައިރެކްޓަރު ގުނާ ވީގާންޗު ވިދާޅުވީ އަފްޣާނިސްތާނުގައި ގެދޮރު ގެއްލިފައިވާ 30.000 މީހުންނަށް އެހީތެރިކަން ފޯރުކޮށްދިނުމަށް 300 މިލިޔަން ޔޫރޯ ހޯދުމުގެ މަސައްކަތްކުރަމުންދާކަމަށާއި އެއީ އަންނަ އަހަރަށްވެސް ހޯދަން ކަނޑައަޅާފައިވާ ޢަދަދުކަމަށެވެ. ވީގާންޗު ވިދާޅުވީ ޠާލިބާނުންނާ ވާހަކަދައްކަން ޖެހޭކަން ވިލާތުގެ އިއްތިޙާދުން ޤަބޫލުކުރާކަމަށާއި ރަސްމީ ގުޅުންތައް ޤާއިމުކުރެވޭނީ އެ ޖަމާޢަތުގެ އަމަލުތަކަށް ބެލުމަށްފަހުކަމަށެވެ. އެ ގޮތުން އޭނާ ވިދާޅުވީ އިންސާނީ ޙައްޤުތައް ޙިމާޔަތްކުރުމާއި އެހީތެރިކަން ފޯރުކޮށްދޭ ޖަމުޢިއްޔާތަކަށް ނިޞްބަތްވާ މުވައްޒަފުންނަށް ޠާލިބާނުން ރައްކާތެރިކަން ކަށަވަރުކޮށްދޭ މިންވަރު ބަލަންޖެހޭކަމަށެވެ. އަދި އެފަދަ އުކުޅުތައް ބޭނުންކޮށްގެން ޠާލިބާނުންގެ އަމަލުތައް ބަދަލުކޮށް އެ ޖަމާޢަތަށް ނުފޫޒުފޯރުވަން ޖެހޭކަމަށްވެސް އޭނާ ވިދާޅުވިއެވެ. އަފްޣާނިސްތާނުގައި ޠާލިބާނުން ވެރިކަންކުރެވޭނެކަމާމެދު ސުވާލުއުފެދޭކަމަށާއި އެ ޤައުމުގައި އެންމެންގެ ބައިވެރިވުން އޮންނަ ވެރިކަމެއް ޤާއިމުކުރަންޖެހޭކަމަށްވެސް އޭނާ ވިދާޅުވިއެވެ.
ޠާލިބާނުންގެ ބާރުގެ ދަށަށް އަފްޣާނިސްތާން ގެނެސްފައިވަނީ އޮގަސްޓު 15ވަނަ ދުވަހުއެވެ. ނަމަވެސް އެ ޤައުމުގައި އެ ޖަމާޢަތުގެ ސަރުކާރެއް އަދި އެކުލަވާލާފައެއް ނުވެއެވެ. ބެލެވޭ ގޮތުގައި އަފްޣާނިސްތާނުގެ އައު ސަރުކާރުގެ މަތީ މަޤާމުތަކުގައި ހިމަނާނީ ޠާލިބާނުންގެ އިސްވެރިންނެވެ.