ނޫސްވެރިންނާ ދެކޮޅަށް ކުރެއްވި އަބުރުގެ ދަޢުވާއެއް ސިންގަޕޫރުގެ ބޮޑުވަޒީރު އަނެއްކާވެސް ކާމިޔާބުކުރައްވައިފިއެވެ.
ސިންގަޕޫރުގެ ހައި ކޯޓުން ކުރި ޙުކުމުގައި ބުނެފައިވަނީ ލީގެ އަމިއްލުފުޅު ޢާއިލީ ގެކޮޅާ ގުޅޭގޮތުން ނޫސްވެރިން ޝާއިރުކުރި ލިޔުމުގެ ސަބަބުން އަބުރު ގެއްލިފައިވާކަމަށާއި އެއީ އަގުވައްޓާލުމަށް ޝާއިރުކޮށްފައިވާ ޙަޤީޤަތެއް ނެތް ލިޔުމެއްކަމަށެވެ. އެހެންކަމުން ލިބުނު ގެއްލުމުގެ ބަދަލުގެ ގޮތުގައި 155،994 އެމެރިކާ ޑޮލަރު ދެއްކުމަށް ކޯޓުންވަނީ ޙުކުމުކޮށްފައެވެ. އެ ދަޢުވާ ރައްދުވަނީ މެލޭޝިޔާއާއި ސިންގަޕޫރުގެ ދެ ނޫސްވެރިންގެ މައްޗަށެވެ.
ސިންގަޕޫރުގެ ބޮޑުވަޒީރު ލީގެ ބައްޕާފުޅު ލީ ކުއާން ޔޫއަކީ 1959ވަނަ އަހަރުން 1990ވަނަ އަހަރަށް އެ ޤައުމުގެ ބޮޑުވަޒީރުކަން ކުރައްވާފައިވާ ބޭފުޅެކެވެ. އޭނާ އަވަހާރަވުމުން އޭނާގެ ގެކޮޅާމެދު ޢަމަލުކުރާނެ ގޮތަކާ ގުޅޭގޮތުން ޢާއިލާގެ މެދުގައި ދެބަސްވުންތަކެއް އުފެދިފައިވާކަމަށް ބުނެ މެލޭޝިޔާގެ ނޫސްވެރިއެއްކަމަށްވާ ރުބާޝިނީ ޝުންމުގަނަތަންގެ ލިޔުމެއް ސިންގަޕޫރުގެ ނޫހަކުންވަނީ ޝާޢިރުކޮށްފައެވެ. އެ ލިޔުމާ ގުޅިގެން ލީވަނީ 2019ވަނަ އަހަރުގެ އޮގަސްޓު މަހުގެ ތެރޭގައި ރުބާޝިނީއާއި އެ ނޫހުގެ އެޑިޓަރެއްކަމަށްވާ ޝޫ ޔުއާން ޗެންނާ ދެކޮޅަށް އަބުރުގެ ދަޢުވާކުރައްވައިފައެވެ. އަދި މެއި މަހުގެ 31ވަނަ ދުވަހު ބޭއްވި އަޑުއެހުމުގައި ލީވަނީ އިންޓަނެޓު މެދުވެރިކޮށް ބައިވެރިވެޑައިގެންފައެވެ.
ސިންގަޕޫރުގެ ހައިކޯޓުން މިދިޔަ މާރިޗު މަހުގެ ތެރޭގައިވެސްވަނީ ލީއާ އެއްކޮޅަށް އެފަދަ މައްސަލައެއް ނިންމައިފައެވެ. އެ ފަހަރު ލީ ކުރެއްވި އަބުރުގެ ދަޢުވާ ސާބިތުވުމުން ގެއްލުމުގެ ބަދަލުގެ ގޮތުގައި ގާތްގަނޑަކަށް 100،000 އެމެރިކާ ޑޮލަރު ދިނުމަށް ކޯޓުންވަނީ ޙުކުމުކޮށްފައެވެ.