އަފްޣާނިސްތާނުގެ އިދިކޮޅު ހަނގުރާމަވެރިން ހަތިޔާރު ބެހެއްޓުމަށްފަހު ޞުލްޙަވުމަށް އެ ޤައުމުގައި ވެރިކަންކުރާ ޠާލިބާން ޖަމާޢަތުން ގޮވާލައިފިއެވެ.
އޮގަސްޓު މަހުގެ 15ވަނަ ދުވަހު ޠާލިބާނުންގެ ބާރުގެ ދަށަށް އަފްޣާނިސްތާނުގެ ވެރިރަށް ކާބުލް ގެނައުމަށްފަހު އެ ޖަމާޢަތުގެ ވެރިކަމެއް އެ ޤައުމުގައި ޤާއިމުކުރި ނަމަވެސް އެ ޤައުމުގެ 34 ޕުރޮވިންސްގެ ތެރެއިން އުތުރުގައި އޮންނަ ޕަންޖުޝީރު އެ ޖަމާޢަތުގެ ބާރުގެ ދަށަށް ގެނެވިފައެއް ނުވެއެވެ. ޕަންޖުޝީރަކީ ޠާލިބާނުންނާ ދެކޮޅު ހަނގުރާމަވެރިން ދިރިއުޅޭ ސަރަހައްދެކެވެ. އޭގެ ތެރޭގައި އަފްޣާނިސްތާން އިސްތިޢުމާރުކުރި ރަޝިޔާގެ އަސްކަރީ ފައުޖުތަކާ ދެކޮޅަށް ހަނގުރާމަކުރުމުގައި އިސްކޮށް އުޅުނު ބަޠަލެއްކަމަށްވާ އަޙްމަދު ޝާހް މައްސޫދާއި އަފްޣާނިސްތާނުގެ އެންމެ ނުފުޒުގަދަ ސިޔާސީވެރިޔާކަމަށްވާ ޢަބްދުﷲ ޢަބްދުﷲ ހިމެނެއެވެ. އޭގެ ތެރެއިން އަޙްމަދު ޝާހް މައްސޫދުވަނީ 2001ވަނަ އަހަރުގެ ސެޕުޓެންބަރު މަހުގެ ތެރޭގައި ޠާލިބާނުން ދިން ޙަމަލާއެއްގައި މަރުވެފައެވެ. އޭގެ ފަހުން ޠާލިބާނުންނާ ދެކޮޅަށް އެންމެ އިސްކޮށް ޙަރަކާތްތެރިވެފައިވަނީ އޭނާގެ ދަރިފުޅު އަޙްމަދު މައްސޫދުގެ ހަނގުރާމަވެރިންނެވެ.
ފާއިތުވި ދުވަސްތަކުގެ ތެރޭގައި ޠާލިބާނުންނާ ދެކޮޅު ހަނގުރާމަވެރިންނާއި ކުރިން އަފްޣާނިސްތާނުގެ ސަލާމަތީ ބާރުތަކުގައި މަސައްކަތްކޮށްފައިވާ އެތައް ހާސް މީހުންނެއްވަނީ ޕަންޖުޝީރަށް ޖަމާވެ ޠާލިބާނުންގެ ވެރިކަމާ ދެކޮޅަށް ހަތިޔާރު ނަގައިފައެވެ. އަޙްމަދު މައްސޫދު ވިދާޅުވެފައިވާ ގޮތުގައި އޭނާ ބޭނުންފުޅުވަނީ ޞުލްޙަވެރިކަންކަމަށާއި ޕަންޖުޝީރުގައި ޠާލިބާނުންގެ ސިޔާސަތުތައް ތަންފީޒުކުރަން ޖާގަނުދެއްވާނެކަމަށެވެ. އަދި އޭނާގެ ހަނގުރާމަވެރިން ޠާލިބާނުންނާ ކުރިމަތިލާން ތައްޔާރަށް ތިބިކަމަށްވެސް އަޙްމަދު މައްސޫދު ވިދާޅުވެފައިވެއެވެ.
ޕަންޖުޝީރު އޮންނަ ސަރަޙައްދަށް ޠާލިބާނުންގެ އެތައް ހާސް ހަނގުރާމަވެރިންނެއް ފޮނުވުމަށްފަހު އެ ޖަމާޢަތުންވަނީ އިދިކޮޅު ހަނގުރާމަވެރިން ހަތިޔާރު ބެހެއްޓުމަށް ގޮވާލައި އެއްބައިވަންތަވުމަށް ތަޢުވަތުދީފައެވެ. ޠާލިބާނުން ނެރުނު ބަޔާނެއްގައި ބުނެފައިވަނީ އަފްޣާނިސްތާނަކީ ޤައުމުގެ ހުރިހާ ރައްޔިތުންގެ ޤައުމެއްކަމަށާއި އެންމެންނަށް ރައްކާތެރިކަމާއި އަމާންކަން އޮންނާނެކަމަށެވެ. އަދި ހަނގުރާމަކުރުމުގެ ބަދަލުގައި ޕަންޖުޝީރުގެ ހަނގުރާމަވެރިންނާ ވާހަކަދައްކައިގެން މައްސަލަ ޙައްލުކުރުމަށް ކުރި ހުރިހާ މަސައްކަތެއް ބޭކާރުވެފައިވާކަމަށްވެސް އެ ބަޔާނުގައި ބުނެފައިވެއެވެ. ޠާލިބާނުން ބުނެފައިވާ ގޮތުގައި ޙަމަލާބަދަލުކުރުމަކީ ފައިދާއެއް ނެތްކަމަށާއި ހުޅަނގުގެ އަސްކަރީ ބާރުތަކަށްވެސް އެ ޖަމާޢަތާ ދެކޮޅަށް ކާމިޔާބެއް ނުލިބުނުކަމަށްވެސް އެ ބަޔާނުގައި ފާހަގަށްކޮށްފައިވެއެވެ.
ޕަންޖުޝީރުގައި ޙަރަކާތްތެރިވާ އިދިކޮޅު ހަނގުރާމަވެރިންވަނީ ޠާލިބާނުން އެ ޕުރޮވިންސަށް ޙަމަލާދެމުންދާކަން ޔަޤީންކޮށްދީފައެވެ. އެ ގޮތުން ތަފާތު އެކި ސަރަޙައްދުތަކުން ޕަންޖުޝީރަށް ޙަމަލާދެމުންދާކަމަށާއި އެ ޙަމަލާތައް ހުށިޔާރުކަމާއެކު ދިފާޢުކޮށްފައިވާނެކަމަށްވެސް އިދިކޮޅު ހަނގުރާމަވެރިންވަނީ ބުނެފައެވެ.
ޕަންޖުޝީރު އޮންނަ ސަރަހައްދުގެ ގޮތުން އެ ޕުރޮވިންސަށް ބޭރުން އަންނަ ބަޔަކަށް އަސްކަރީ ކާމިޔާބެއް ހޯދުމަކީ އުނދަގޫ ކަމެކެވެ. އެ ގޮތުން 1980ގެ އަހަރުތަކުގައި ރަޝިޔާގެ ފައުޖުތައް އެ ސަރަޙައްދަށް ދިން ޙަމަލާތަކުގައި ބޭނުންކުރި ޓޭންކަރުތަކުގެ ބައިތައް އަދިވެސް ޕަންޖުޝީރުގެ ވާދީން ފެންނަން ހުރެއެވެ. ނަމަވެސް އަސްކަރީ ތަޖުރިބާކާރުން ބުނާ ގޮތުގައި ބޭރުގެ އެހީތެރިކަމެއް ނުލިބި ޠާލިބާނުންނާ ކުރިމަތިލައި އަޙްމަދު މައްސޫދަށް ތާޢީދުކުރާ 6،000 ހަނގުރާމަވެރިންނަށް ކާމިޔާބެއް ހޯދުމަކީ ނާދިރުކަމެކެވެ.