ލާމަރުކަޒީ ޤާނޫނުގައި ހުރި އަސާސްތަކާ ޚިލާފުވެވަޑައި ނުގަންނަވާނެކަމުގެ ޔަޤީންކަން ސަރުކާރުން ދެއްވައިފިއެވެ. ސަރުކާރުން އެ ޔަޤީންކަން ދެއްވީ ހއ.ފިއްލަދޫގެ އިޚްތިސާސްގެ ތެރޭގައި އޮތް ދައްޕަރު އެރަށުގެ އިގްތިސާސްއިން ވަކިކުރުމުން ދެކޭ ވާހަކަތާއި ގުޅިގެންނެވެ.
ހއ.ފިއްލަދޫގެ އިދާރީ ދާއިރާގެ އިޙްތިޞާސްގެ ތެރޭގައި ހިމެނޭ ހއ.ދައްޕަރު، އެ އިދާރާގެ އިހުތިޞާސްއިން ވަކިކޮށްފައި ވަނީ ފިއްލަދޫ ކައުންސިލާ މަޝްވަރާ ކުރުމަކާ ނުލައިކަމަށް ދެކެވޭ ވާހަކަތަކާ ގުޅިގެން ރައީސް އޮފީހުގެ ތަރުޖަމާނު މުޙައްމަދު މަބްރޫކް ޢަޒީޒް ވިދާޅުވީ ހއ.ދައްޕަރަކީ ރިއަލް އެސްޓޭޓް ޓޫރިޒަމްގެ އައު ޕްރޮޑަކްޓެއް ތަރައްޤީކުރުމަށް ނިންމާފައިވާ ރަށެއްކަމަށެވެ. އެރަށުގެ އެއްވެސްކަމެއް ކައުންސިލާ މަޝްވަރާނުކޮށް ސަރުކާރުން ކުރިއަށް ނުގެންދާނެކަމުގެ ޔަޤީންކަން ދެއްވަމުން މަބްރޫކް ވިދާޅުވީ، ފިއްލަދޫ ކައުންސިލާ މަޝްވަރާތައް ކުރިއަށްދާކަމަށެވެ. އަދި އެކަމުގައި ލާމަރުކަޒީ ޤާނޫނުގައި ހުރި އަސާސްތަކާ ޚިލާފުވުމުގެ ވިސްނުމެއް ސަރުކާރުގެ ނެތްކަމަށްވެސް މަބްރޫކް ވިދާޅުވިއެވެ.
"ވިސްނުން މިހުރީ ރިއަލް އެސްޓޭޓް ޓޫރިޒަމް ތަރައްޤީކުރުމަށް އައް ޕްރޮޑަކްޓެއް ރާއްޖޭގައި ތަރައްޤީކުރުމަށް އެގޮތުގައި. މިހާރު ޤާނޫނުގެ ދަށުން ހަމަ ރިސޯޓްތަކުން ކުރަމުން އަންނަ އެއްކަންތައް އެއީ ރިސޯޓްތަކުގައި ހުންނަ ވިލާތައް 99 އަހަރަށް ނޫނީ ދިގުމުއްދަތަކަށް ބޭރުގެ އިންވެސްޓަރުންނަށްދޭ. އެނގިވަޑައިގަންނަވާނެ ރާއްޖޭގެ އެންމެ ބޮޑެތި ނަން މަޝްހޫރު ރިސޯތްތަކުގައި ހުންނާނެ ވިލާތައް ދިގު މުއްދަތަކަށް ދޫކޮށްފައި. ކަމާގުޅުންހުރި މިނިސްޓްރީ ތަކުން ވާހަކަ ދެކެވި މަޝްވަރާ ކުރެވިގެންދާނީ، އެކަމުގައި ލާމަރުކަޒީ ޤާނޫނުގައި ހުރި އަސާސްތަކާ ޚިލާފުވުމުގެ ވިސްނުމެއް ހަމަނެތް ދައްޕަރުގެ އިޝޫގައި ހަމަ ކައުންސިލުން މަޝްވަރާކޮށް ގޮތް ނިންމާނީ." މަބްރޫކު ވިދާޅުވިއެވެ.
2010 އަހަރު ހއ.ދައްޕަރަކީ ފަޅުރަށެއްގެ ގޮތުގައި ކަނޑައަޅައި، އެރަށުގައި ރިސޯޓެއް ތަރައްޤީކުރުމަށް ބަޔަކާ ހަވާލުކުރިއެވެ. ނަމަވެސް ރިސޯޓް ތަރައްޤީކުރުން އެރަށުގައި ކުރިއަށް ގެންގޮސްފައެއް ނުވެއެވެ. އޭގެފަހުން މިދޔަ އަހަރުގެ މާރިޗް 18 ގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ފިއްލަދޫގެ އިޙްތިޞާސްގެ ތެރޭގައި ދައްޕަރު ހިމަނުއްވާފައެވެ. ނަމަވެސް ފަހުން ރައީސް އޮފީހުން ނެރުނު ގަރާރެއްގައި ވަނީ ފިއްލަދޫގެ އިދާރީ ދާއިރާގެ އިޚްތިޞާސްގެ ތެރެއިން ދައްޕަރު ވަކިކޮށްފައެވެ.
ދައްޕަރަކީ ހއ.ފިއްލަދޫގެ އުތުރުން އެރަށާގުޅިފައި އޮތް ވަރަށްރީތި ފަޅުރަށެކެވެ. ދައްޕަރަކީ ވަރަށްގިނަ ރުއްގަހާއި ބޮޑު ކުޅިއެއް އޮތް ނަލަ ރަށެކެވެ. ދައްޕަރު ޓޫރިސްޓް ރިސޯރޓެއްގެ ގޮތުގައި ތަރައްޤީ ކުރުވޭނީ އެރަށުގެ ކުޅިއާއި އެނޫން ވެސް ޤުދުރަތީ ގޮތުން ލިބިފައިވާ ވަޞީލަތްތަކަށް ގެލުންނުވާގޮތަށްކަމަށް ސަރުކާރުން ވިދާޅުވެފައިވެއެވެ.