20 އަހަރުދުވަހަށްފަހު އަފްޣާނިސްތާނުގެ ހަނގުރާމަ ނިމުމުން އެ ޤައުމުގައި ހަލަބޮލިކަން އުފެދިއްޖެއެވެ.
އޮގަސްޓު 30ވަނަ ދުވަހުގެ މެންދަމު އެމެރިކާއާއި ހުޅަނގުގެ އަސްކަރީ އިއްތިޙާދު، ނެޓޯގެ ފައުޖުތައް އަފްޣާނިސްތާނުން ފޭބުމުން އެ ޤައުމުގައި ވެރިކަންކުރާ ޠާލިބާނުންވަނީ ވެރިރަށް ކާބުލްގެ ބައިނަލްއަޤްވާމީ ވައިގެ ބަނދަރު އެ ޖަމާޢަތުގެ ބާރުގެ ދަށަށް ގެނެސްފައެވެ. އެއާއެކު އަފްޣާނިސްތާނުން ބޭރަށް ވައިގެމަގުން ދަތުރުކުރުންވަނީ ވަޤުތީގޮތުން ހުއްޓިފައެވެ. ނަތީޖާއެއްގެ ގޮތުން ޤައުމު ދޫކޮށް ދާން ބޭނުންވެފައިވާ އެތައް ހާސް މީހުންނެއްވަނީ އަފްޣާނިސްތާނުގެ ސަރަޙައްދީ ރޮނގުތައް ކައިރިއަށް ޖަމާވާން ފަށައިފައެވެ.
އަފްޣާނިސްތާނުގެ ވެރިކަމާ ޙަވާލުވިފަހުން ފާއިތުވި ދެ ހަފުތާގެ ތެރޭގައި ޠާލިބާނުންގެ ސަރުކާރެއް އެކުލަވާލާފައެއް ނުވެއެވެ. ބެލެވޭ ގޮތުގައި ޠާލިބާނުންގެ ސަރުކާރު އިޢުލާންކުރާނީ ސެޕުޓެންބަރު މަހުގެ 11ވަނަ ދުވަހުއެވެ. އެއީ އެމެރިކާގެ ތާރީޚުގައި އެ ޤައުމަށް ދިން އެންމެ ވަރުގަދަ ޙަމަލާއަށް 20 އަހަރުފުރޭ ދުވަހެވެ. މަޢުލޫމާތު ލިބިފައިވާ ގޮތުގައި ޠާލިބާނުން އެކުލަވާލަން ބޭނުންވަނީ އަވަށްޓެރި އީރާނުގައި އޮންނަކަހަލަ ވެރިކަމެކެވެ. އެ ގޮތުން އަފްޣާނިސްތާނުގެ ރޫޙީ އިސްވެރިޔަކަށް ޠާލިބާނުންގެ އެންމެ އިސްވެރިޔާ ހައިބަތުﷲ އަޚޫންޒާދާ އަދި އަފްޣާނިސްތާނުގެ އަމީރުގެ މަޤާމަށް ޠާލިބާނުންގެ ދެވަނައަށް އެންމެ އިސްވެރިޔާ މުއްލާ ޢަބްދުލްޣަނީ ބަރާދަރު ޢައްޔަންކުރާނެކަމަށް ބެލެވެއެވެ. އޭގެ އިތުރުން ސަރުކާރުގެ އިސް މަޤާމުތަކަށާއި ސަރަޙައްދީ ސަރުކާރުތަކުގެ އިސްވެރިންނަށްވެސް ޢައްޔަންކުރާނެކަމަށް ބެލެވެނީ ޠާލިބާނުންގެ އިސް ސަފުން ފެންނަ މީހުންނެވެ.
އެމެރިކާއާއި ނެޓޯގެ ފައުޖުތައް އަފްޣާނިސްތާނުން ފޭބުމުން އުފާފާޅުކުރުމުގެ ޙަރަކާތްތައް އަދިވެސް އެ ޤައުމުގެ ޢާންމުން ދަނީ ބާއްވަމުންނެވެ، އޭގެ އިތުރުން ޠާލިބާނުން ދަނީ އެ ޤައުމުގެ ޢާންމު ޚިދުމަތްތައް ނުހުއްޓި ކުރިޔަށްދާނެ ގޮތްތައް ބަލަމުންނެވެ. އޭގެ ތެރޭގައި މާލީ، ތަޢުލީމީ އަދި ޞިއްޙީ ޚިދުމަތްތައް ހިމެނެއެވެ.
އަފްޣާނިސްތާނުގައި ހަލަބޮލި މަޞްރަޙެއް ޤާއިމުވެފައިވާ ދަނޑިވަޅެއްގައި ޠާލިބާނުންވަނީ އަފޫޢާންމެއް އިޢުލާންކޮށްފައެވެ. ނަމަވެސް ފާއިތުވި ދެ ހަފުތާގެ ތެރޭގައި 123،000އަށްވުރެ ގިނަ މީހުންވަނީ އަފްޣާނިސްތާން ދޫކޮށް ގޮސްފައެވެ. އޭގެ ތެރެއިން ގިނަ މީހުންނަކީ އެ ޤައުމުގެ ޢާންމު ރައްޔިތުންނެވެ.