އަފްޣާނިސްތާނުގެ ވެރިރަށް ކާބުލްގެ ބައިނަލްއަޤްވާމީ ވައިގެ ބަނދަރުގައި ޙަރަކާތްތެރިވަމުންދާ އެމެރިކާގެ ފައުޖުތަކާ ދެކޮޅަށް ރޮކެޓު ޙަމަލާތަކެއް ދީފިއެވެ.
ފާއިތުވި ދުވަސްތަކުގައި އަފްޣާނިސްތާނުގައި ޙަރަކާތްތެރިވާ އައިއެސް ހަނގުރާމަވެރިންނާއި އެމެރިކާގެ ފައުޖުތަކާ ދެމެދުވަނީ ޙަމަލާބަދަލުކޮށްފައެވެ. އަފްޣާނިސްތާނުގެ ވެރިކަމަށް ދެވަނަ ފަހަރަށް ޠާލިބާން ޖަމާޢަތް އައިސްފައިވާ ދަނޑިވަޅެއްގައި ނުރައްކާތެރި ޙާލަތެއް އުފެދިފައިވަނީ އެ ޤައުމު ދޫކޮށް ދާން ބޭނުންވާ އެތައް ހާސް ޢާންމުންނެއް ކާބުލްގެ ބައިނަލްއަޤްވާމީ ވައިގެ ބަނދަރު ހުންނަ ސަރަޙައްދަށް ޖަމާވެފައިވަނިކޮށް އައިއެސްގެ ޙައްދުފަހަނައަޅާފައިވާ ހަނގުރާމަވެރިން ދިން ބޮމުގެ ޙަމަލާއެއްގައި 170އަށްވުރެ މީހުން މަރުވުމުންނެވެ. އޭގެ ތެރޭގައި އެމެރިކާގެ 13 ސިފައިންނާއި ޠާލިބާނުންގެ 28 ހަނގުރާމަވެރިން ހިމެނެއެވެ. ރައްދުގައި އެމެރިކާގެ ފައުޖުތަކުންވަނީ ވައިގެ ޙަމަލާތަކެއްގައި ކާބުލްގެ ބޮމުގެ ޙަމަލާގެ އެންމެ އިސް މޭސްތިރި މަރާލައިފައެވެ. އޭގެ ފަހުން ދެވަނަ ފަހަރަށް ކާބުލްގެ ވައިގެ ބަނދަރަށް ޙަމަލާދިނުމަށް މަސައްކަތްކުރި އައިއެސްގެ ހަނގުރާމަވެރިންނާ ދެކޮޅަށް އެމެރިކާގެ ފައުޖުތަކުންވަނީ ވައިގެ ޙަމަލާތަކެއް ދިނުމަށްފަހު އެ މީހުން މަރާލައިފައެވެ.
އެމެރިކާއާއި އައިއެސްގެ ހަނގުރާމަވެރިންނާ ދެމެދު ބަދަލުކުރަމުންދާ ޙަމަލާތަކާ ގުޅޭގޮތުން ޠާލިބާނުން ބުނެފައިވަނީ އެމެރިކާގެ ޙަމަލާތަކުގައި އަފްޣާނިސްތާނުގެ ޢާންމުންގެ ގިނަ ބަޔަކު މަރުވެފައިވާކަމަށެވެ. އަދި އަފްޣާނިސްތާނުގައި އެމެރިކާއިން ޙަމަލާބަދަލުކުރަނީ ޠާލިބާނުންގެ ޙުއްދަނެތިކަމަށް އެ ޖަމާޢަތުންވަނީ ބުނެފައެވެ.
އެމެރިކާގެ އަސްކަރީ ފައުޖުތަކުން ބުނެފައިވަނީ ކާބުލްގެ ވައިގެ ބަނދަރު އޮތީ ވަރަށް ނުރައްކާތެރި ޙާލަތެއްގައިކަމަށެވެ، އަދި ވައިގެ ބަނދަރަށް ދޭން މަސައްކަތްކުރި ރޮކެޓު ޙަމަލާތައް ނާކާމިޔާބުކޮށްލާފައިވާކަމަށާއި ރައްދުގައި އެމެރިކާއިން ދިން ޙަމަލާތަކުގައި އަފްޣާނިސްތާނުގެ ޢާންމުން މަރުވިކަމަށް ބުނާ މައްސަލަ ބަލާނެކަމަށެވެ.
ޠާލިބާނުންގެ ބާރުގެ ދަށަށް އަފްޣާނިސްތާން ގެނައުމުން އެ ޤައުމު ދޫކޮށް ދާން ބޭނުންވާ އެތައް ހާސް ޢާންމުންވަނީ ކާބުލްގެ ބައިނަލްއަޤްވާމީ ވައިގެ ބަނދަރު ހުންނަ ސަރަޙައްދަށް ޖަމާވެފައެވެ. އަދި ފާއިތުވި ދެ ހަފުތާގެ ތެރޭގައި އެމެރިކާއާއި ހުޅަނގުގެ އަސްކަރީ އިއްތިޙާދު، ނޭޓޯގެ އަސްކަރީ މަތިންދާބޯޓުތަކުގައި 115،000އަށްވުރެ ގިނަ މީހުންވަނީ އަފްޣާނިސްތާނުން ބޭރަށް ގެންގޮސްފައެވެ.
އަފްޣާނިސްތާނުން ސަލާމަތްތެރިކަމާއެކު ދާން ބޭނުންވާ މީހުން ޤައުމުން ބޭރަށް ގެންދިޔުމުގެ މަސައްކަތް އޮގަސްޓު 31ވަނަ ދުވަހުގެ ނިޔަލަށް ކުރިޔަށްދާނެކަމަށް އެމެރިކާއިންވަނީ ބުނެފައެވެ. އޮގަސްޓު 31ވަނަ ދުވަހަކީ އެމެރިކާއާއި ހުޅަނގުގެ އަސްކަރީ އިއްތިޙާދު، ނޭޓޯގެ ފައުޖުތައް އަފްޣާނިސްތާނުން ފައިބަން ނިންމާފައިވާ އެންމެ ފަހު ތާރީޚެވެ.