ކޯވިޑް-19 ޖެހިފައިވާ މީހަކާ ބައްދަލުވެވަޑައިގަތުމުން މެލޭޝިޔާގެ ބޮޑުވަޒީރު އިސްމާޢީލް ޞަބްރީ ބިން ޔަޢުޤޫބް އެކަހެރިވެވަޑައިގަންނަވަން އެ ޤައުމުގެ ޞިއްޙަތާބެހޭ ވުޒާރާއިން އަންގައިފިއެވެ.
މެލޭޝިޔާގެ ބޮޑުވަޒީރުގެ ރަސްމީ އިދާރާއިން ނެރުނު ބަޔާނެއްގައި ބުނެފައިވަނީ އޭނާ ހުންނެވީ އެކަހެރިވެވަޑައިގެންކަމަށެވެ. ނަމަވެސް އެކަހެރިވެވަޑައިގަންނަވާނެ މުއްދަތެއް އަދި އޭނާއަށް ކޯވިޑް-19 ޖެހުނުކަމެއް މެލޭޝިޔާގެ ބޮޑުވަޒީރުގެ ރަސްމީ އިދާރާއިން ބުނެފައެއް ނުވެއެވެ.
މެލޭޝިޔާގެ ބޮޑުވަޒީރުގެ މަޤާމަށް އިސްމާޢީލް ޞަބްރީ ޢައްޔަންކޮށްފައިވަނީ އޮގަސްޓު މަހުގެ 21ވަނަ ދުވަހުއެވެ. ބޮޑުވަޒީރުގެ މަޤާމާ އޭނާ ޙަވާލުވެވަޑައިގެންފައިވަނީ ކޯވިޑް-19ގެ އެންމެ ނުރައްކާތެރި އަދި ވާރުތަވުމުގެ ބާރުގަދަ ވައްތަރެއްކަމަށްވާ ޑެލްޓާ ވޭރިއެންޓު މެލޭޝިޔާގައި ހަލުވިކަމާއެކު ފެތުރި އެ ޤައުމުގެ އިޤްތިޞާދަށް ބޮޑު ލޮޅުމެއް އަރައިފައިވާ ދަނޑިވަޅެއްގައެވެ.