އިސްރާއީލުގެ ޔަހޫދީ ދަޢުލަތުގެ ދިފާޢީ ވަޒީރު ބެނީ ގެންޓްސްސާ ފަލަސްޠީނުގެ ރައީސް މަޙްމޫދު ޢައްބާސް ބައްދަލުކުރައްވައިފިއެވެ. އެއީ މިދިޔަ ޖޫން މަހުގެ ތެރޭގައި އިސްރާއީލުގެ އައު ސަރުކާރެއް އެކުލަވާލިފަހުން އެ ޤައުމުގެ ވަޒީރަކާ ޢައްބާސް ބައްދަލުކުރެއްވި ފުރަތަމަ ފަހަރެވެ.
ފަލަސްޠީނުގެ ހުޅަނގު އައްސޭރީގެ ރާމަﷲގައި ޔަހޫދީންގެ ދިފާޢީ ވަޒީރާ ޢައްބާސް ބައްދަލުކުރައްވައިފަނީ ޔަހޫދީންގެ ޢުދުވާނީ ޙަމަލާތައް އިތުރުވެފައިވާ ދަނޑިވަޅެއްގައެވެ. އެ ގޮތުން ފާއިތުވި ހަފުތާތަކުގެ ތެރޭގައި ޔަހޫދީންގެ އިސްތިޢުމާރީ ފައުޖުތަކުންވަނީ ފަލަސްޠީނުގެ ރައްޔިތުންނާ ދެކޮޅަށް ހުޅަނގު އައްސޭރީގައި ލާއިންސާނީ އަދި އަނިޔާވެރި ޖަރީމާތަކެއް ހިންގުމުގެ އިތުރުން ޣައްޒާއަށް ވައިގެ ޙަމަލާތަކެއް ދީފައެވެ.
އިސްރާއީލުގެ ދިފާޢީ ވުޒާރާއިން ނެރުނު ބަޔާނެއްގައި ބުނެފައިވަނީ ގެންޓްސްސާއި ޢައްބާސްގެ ބައްދަލުވުމުގައި އަލިއަޅުއްވާލައްވާފައިވަނީ ހުޅަނގު އައްސޭރިއާއި ޣައްޒާގެ އިޤްތިޞާދީ ޙާލަތު ރަނގަޅުކުރެވޭނެ ގޮތްތަކާމެދުކަމަށެވެ. އަދި ފަލަސްޠީނާއި އިސްރާއީލާ ދެމެދު މަޝްވަރާކޮށްގެން މައްސަލަތައް ހައްލުކުރުމަށް އިސްކަން ދެއްވުމަށް ދެ ބޭފުޅުންވެސް އެއްބަސްވެވަޑައިގެންނެވިކަމަށް އެ ބަޔާނުގައި ބުނެފައިވެއެވެ.
ފަލަސްޠީނާއި އިސްރާއީލާ ދެމެދު ޞުލްޙަ ޤާއިމުކުރުމަށް ކުރަމުންދިޔަ މަޝްވަރާތައް ހުއްޓިފައިވަނީ 2014ވަނަ އަހަރުގެ ތެރޭގައެވެ. އޭގެ ފަހުން އިސްރާއީލުންވަނީ ޢަރަބި ޤައުމުތަކާ ގުޅުންބަދަހިކޮށް އިޤްތިޞާދީ ޙަރަކާތްތައް ފަށައިފައެވެ.
އިސްރާއީލުގެ ޔަހޫދީ ދަޢުލަތުގެ ދިފާޢީ ވަޒީރާއި ފަލަސްޠީނުގެ ރައީސާ ދެމެދު ބައްދަލުވުމެއް ބާއްވާފައިވަނީ ޔަހޫދީންގެ ބޮޑުވަޒީރު ނަފްތާލީ ބެނެޓު އެމެރިކާއަށް ކުރެއްވި ރަސްމީ ދަތުރުފުޅުގައި އެ ޤައުމުގެ ރައީސް ޖޯ ބައިޑަންނާ ބައްދަލުކުރެއްވިތާ މަދު ދުވަސްކޮޅެއްގެ ތެރޭގައެވެ. އެ ބައްދަލުވުމުގައި ބައިޑަންވަނީ ފަލަސްޠީނާއި އިސްރާއީލުގެ ވަކި ދެ ދަޢުލަތް އޮތުމަށް ބޭނުންފުޅުވާކަމަށް ވިދާޅުވެފައެވެ. ނަމަވެސް ފަލަސްޠީނުގެ ވަކި ދަޢުލަތެއް އޮތުމަށް ބެނެޓު އަބަދުވެސް ދެކޮޅުހައްދަވައެވެ.