އަފްޣާނިސްތާނުގެ މަތީ މަޤާމުތަކަށް އެ ޤައުމުގެ ވެރިކަމާ ޙަވާލުވެފައިވާ ޠާލިބާނުންގެ އިސްވެރިން ޢައްޔަންކުރުމުގެ މަސައްކަތް އެ ޖަމާޢަތުން ފަށައިފިއެވެ.
އޮގަސްޓު މަހުގެ 15ވަނަ ދުވަހު ޠާލިބާނުންގެ ބާރުގެ ދަށަށް އަފްޣާނިސްތާނުގެ ވެރިރަށް ކާބުލް ގެންދިޔުމުން އެ ޤައުމުގެ ރައީސް އަޝްރަފް ޣަނީއާއި އޭނާގެ ސަރުކާރުގައި ހިމެނޭ ގިނަ ޢަދަދެއްގެ އިސްވެރިންވަނީ ޤައުމު ދޫކޮށް ވަޑައިގެންފައެވެ. އެއަށްފަހު ޠާލިބާނުންވަނީ އަފްޣާނިސްތާނުގެ އަމީރުގެ މަޤާމަށް މުއްލާ ޢަބްދުލް ޣަނީ ބަރާދަރު ޢައްޔަންކޮށްފައެވެ. އޭނާއަކީ އެ ޖަމާއަތުގެ ދެވަނައަށް އެންމެ އިސްވެރިޔާއެވެ.
އަފްޣާނިސްތާނުގެ މަތީ މަޤާމުތަކަށް ޢައްޔަންކޮށްފައިވާ ޠާލިބާނުންގެ އިސްވެރިންގެ ތެރެއިން އެންމެ ބޮޑު ސަމާލުކަމެއް ލިބިފައިވަނީ ދިފާޢީ ވަޒީރުގެ މަޤާމަށް ޢައްޔަންކޮށްފައިވާ ޢަބްދުލް ޤައްޔޫމު ޒާކިރެވެ. އޭނާއަކީ އެމެރިކާއިން ކިޔުބާގައި ހިންގާ ގުއަންޓަނާމޯ ބޭ ޖަލުގައި ޙައްޔަރުކޮށްގެން ގެންގުޅުމަށްފަހު މިނިވަންކޮށްފައިވާ މީހެކެވެ. 2001ވަނަ އަހަރުގެ ތެރޭގައި އޭނާ ޙައްޔަރުކޮށްފައިވަނީ މަޒާރީޝަރީފުގައި އެމެރިކާގެ ފައުޖުތަކާ ހަނގުރާމަކުރަނިކޮށެވެ. 1997ވަނަ އަހަރުގެ ތެރޭގައި ޠާލިބާނުންނާ ގުޅުމުގެ ކުރިން އޭނާވަނީ ރަޝިޔާގެ އިސްތިޢުމާރީ ވެރިކަމާ ދެކޮޅަށް ހަނގުރާމަކުރި މުޖަހިދީންނާއެކު އަފްޣާނިސްތާން މިނިވަންކުރުމުގައި ޙަރަކާތްތެރިވެފައެވެ.
އަފްޣާނިސްތާނުގައި ޠާލިބާނުން ޤާއިމުކޮށްފައިވާ ސަރުކާރުގައި ދާޙިލީ ވަޒީރުގެ މަޤާމު ދީފައިވަނީ އެ ޖަމާޢަތުގެ އިސް އަސްކަރީވެރިއެއްކަމަށްވާ އިބްރާހީމު ޞަދުރަށެވެ. އަދި އަފްޣާނިސްތާނުގެ މާލީ ވަޒީރުގެ މަޤާމަށް ޢައްޔަންކޮށްފައިވަނީ ޠާލިބާނުންގެ މާލީ ކަންކަން ބެލެހެއްޓުމުގައި އެންމެ އިސްކޮށް ޙަރަކާތްތެރިވާ ގުލް އަޣާ އިސްޙާޤްޒާއީއެވެ. އެނާއަކީ ޠާލިބާނުންގެ ބާނީ މުއްލާ ޢުމަރުގެ ވަރަށް އަރިސް މީހެކެވެ. އަދި އެއް ދުވަސްވަރެއްގައި މުއްލާ ޢުމަރާ ބައްދަލުކުރެވެނީ އިސްޙާޤްޒާއީގެ ޙުއްދަ ލިބޭ މީހުން އެކަންޏެވެ.
އޭގެ އިތުރުން އަފްޣާނިސްތާނުގެ މަރުކަޒީ ބެންކުގެ ގަވަރުނަރުގެ މަޤާމަށް ޢައްޔަންކޮށްފައިވަނީ ޙާޖީ މުޙައްމަދު އިދްރީސެވެ. އޭނާއާ ބެހޭ އެއްވެސް މަޢުލޫމާތެއް އެނގޭކަށް ނެތެވެ. ނަމަވެސް އޭނާއަކީ ޠާލިބާނުންގެ ފައިސާ މުޢާމަލާތްތައް ހިންގުމުގައި ޙަރަކާތްތެރިވެފައިވާ މީހެކެވެ. އަދި އޭނާއަކީ އެ ޖަމާޢަތުގެ ތެރޭގައި ވަރަށް ބޮޑު އިތުބާރެއް ލިބިފައިވާ މީހެކެވެ.
އަފްޣާނިސްތާނުގެ 34 ޕުރޮވިންސްގެ ގަވަރުނަރުންގެ މަޤާމަށް ޢައްޔަންކުރުމަށް ހަމަޖެހިފައިވަނީ ފާއިތުވި 20 އަހަރުދުވަހު ބޭރުގެ ފައުޖުތަކާ ހަނގުރާމަކުރުމުގައި އެންމެ އިސްކޮށް ޙަރަކާތްތެރިވެފައިވާ އެންމެ ތަޖުރިބާކާރު އަސްކަރީވެރިންކަމަށް އެ ޖަމާޢަތުންވަނީ ބުނެފައެވެ. އަފްޣާނިސްތާނުގެ ސަރުކާރުގައި ޠާލިބާނުންނަށް ނިޞްބަތްނުވާ މީހުންނާއި އަންހެނުންނަށް ޖާގަދޭނެކަމަށް އެ ޖަމާޢަތުންވަނީ މީގެ ކުރިން ބުނެފައެވެ.