އަފްޣާނިސްތާނުގެ މައްސަލާގައި ރަޝިޔާގެ ރައީސް ވުލަޑުމީރް ޕުޓިންނާއި ޗައިނާގެ ރައީސް ޝީ ޖިންޕިންނާ މަޝްވަރާކުރައްވައިފިއެވެ.
ޗައިނާގެ ދަޢުލަތުގެ ނޫހުން ބުނެފައިވާ ގޮތުގައި ފޯނުން ޕުޓިންނާއި ޝީ ކުރެއްވި މަޝްވަރާތަކުގައި އެންމެ ބޮޑު އިސްކަމެއް ދީފައިވަނީ އަފްޣާނިސްތާނުގެ ވެރިކަމާ ޙަވާލުވެވަފައިވާ ޠާލިބާން ޖަމާޢަތާ ގުޅިގެން ކުރިޔަށް ދެވޭނެ ގޮތްތައް ދެނެގަތުމަށްކަމަށެވެ. އެ ގޮތުން އެ ދެ ބޭފުޅުން އެއްބަސްވެވަޑައިގެންފައިވާ ގޮތުގައި އޮގަސްޓު 31ވަނަ ދުވަހު އެމެރިކާއާއި ހުޅަނގުގެ އަސްކަރީ އިއްތިޙާދު، ނޭޓޯގެ ފައުޖުތައް އަފްޣާނިސްތާނުން ފޭބުމަށްފަހު އެ ޤައުމުގެ ކަންކަމުގެ ތެރެއަށް ބޭރުގެ ނުފޫޒު ވަދެގެންނުވާނެއެވެ. އަދި އޮގަސްޓު 31ވަނަ ދުވަހުގެ ފަހުން ކާބުލްގެ ބައިނަލްއަޤްވާމީ ވައިގެ ބަނދަރު ބޭނުންކޮށްގެން އަފްޣާނިސްތާނުގެ ރައްޔިތުން ޤައުމުން ބޭރަށް ގެންދިޔުމުގެ މަސައްކަތްކުރުމަށްވެސް ޕުޓިންނާއި ޝީ ތާޢީދެއް ނުކުރައްވައެވެ. އޭގެ އިތުރުން ޕުޓިންނާއި ޝީ ކުރެއްވި މަޝްވަރާތަކުގައި އަފްޣާނިސްތާނުގެ މިނިވަންކަމަށް އިޙްތިރާމުކުރުމަށްވަނީ އެއްބަސްވެވަޑައިގެންފައެވެ.
ދުނިޔޭގައި އެންމެ ބޮޑަށް ކުރިއަރާފައިވާ އިޤްތިޞާދުތައް އޮންނަ 7 ޤައުމުގެ މައްޗަށް އެކުލެވިގެންވާ ޖީ7ން ބޭނުންވަނީ އޮގަސްޓު 31ވަނަ ދުވަހުގެ ފަހުންވެސް އަފްޣާނިސްތާނުގެ ރައްޔިތުން ޤައުމުން ބޭރަށް ގެންދިޔުމަށެވެ. ނަމަވެސް ޖީ7ގައި ހިމެނޭ އެމެރިކާއިން އެ ކަން އެ ގޮތަށް ކުރުމަށް ތާޢީދެއް ނުކުރެއެވެ. ރަޝިޔާއާއި ޗައިނާއަކީ ޖީ7ގައި ހިމެނޭ ޤައުމުތަކެއް ނޫނެވެ.
ޗައިނާއަކީ އަފްޣާނިސްތާނާ ސަރަޙައްދީ ރޮނގެއް ޙިއްޞާކުރާ ޤައުމެކެވެ. އަދި ޠާލިބާނުންގެ ބާރުގެ ދަށަށް އަފްޣާނިސްތާން ގެނައުމުގެ ކުރިން އެ ޖަމާޢަތުގެ އިސް ވަފުދަކާ ޗައިނާގެ ސަރުކާރުންވަނީ ބައްދަލުކޮށްފައެވެ. އޭގެ އިތުރުން ރަޝިޔާއަކީ 1979ން 1989އަށް އަފްޣާނިސްތާން އިސްތިޢުމާރުކޮށްފައިވާ ޤައުމެކެވެ. ޠާލިބާނުން އުފެދިފައިވަނީ ރަޝިޔާގެ ކިބައިން އަފްޣާނިސްތާން މިނިވަންކުރުމަށް އުފެދުނު މުޖާހިދީންގެ ތެރެއިންނެވެ.