ޢަދާވާތްތެރި އަމަލުތައް ހިންގަމުންދާކަމަށް ބުނެ މަޣްރިބާއެކު އޮންނަ ޚާރިޖީ ގުޅުންތައް އަލްޖަޒާއިރުން ކަނޑާލައިފިއެވެ.
ނޫސްވެރިންނާ ވާހަކަދައްކަވަމުން އަލްޖަޒާއިރުގެ ޚާރިޖީ ވަޒީރު ރަމަޠާން ލަޢުމާމަރާވަނީ މަޣްރިބުގެ ސަރުކާރަށް ބޮޑެތި ތުޙްމަތުތަކެއް ކުރައްވައިފިއެވެ. އެ ގޮތުން އޭނާ ވިދާޅުވި ގޮތުގައި މަޣްރިބުގެ ސަރުކާރުންވަނީ އަލްޖަޒާއިރުގެ އިސްވެރިންނަށް ޖާސޫސްކޮށް އެ ޤައުމުގެ އިދިކޮޅު ފަރާތްތަކަށް އެހީތެރިވެ ދެ ޤައުމުގެ ދެމެދުގައި އުފެދިފައިވާ މައްސަލަތައް ޙައްލުކުރުމަށް މަސައްކަތްކުރުމަށް ފަސްޖެހިފައެވެ. ޚާރިޖީ ގުޅުންތައް ކަނޑާލަން ނިންމެވީ މަޣްރިބުގެ ސަރުކާރުގެ ޢަދާވާތްތެރި އަމަލުތައް ނުހުއްޓުމުންކަން ފާހަގަކުރައްވަމުން ލަޢުމާމަރާ ވިދާޅުވީ ދެ ޤައުމުގެ އެންބަސީތައް ބަންދުކުރުމަށް ނިންމާފައިނުވާނެކަމަށެވެ.
މަޣްރިބުގެ ޚާރިޖީ ވުޒާރާއިން ނެރުނު ބަޔާނެއްގައި އެ ޤައުމުން ބުނެފައިވަނީ ޚާރިޖީ ގުޅުންތައް ކަނޑާލަން އަލްޖަޒާއިރުން ނިންމުމުން ހިތާމަކުރާކަމަށާއި އެ ޤައުމުގެ ތުޙްމަތުތަކުގައި އެއްވެސް އަސާސެއް ނެތްކަމަށެވެ. އަދި މަޣްރިބުން ސަރުކާރުން އަބަދުވެސް އަލްޖަޒާއިރުގެ ރައްޔިތުންނާއެކު އޮންނަ ރަހްމަތްތެރިކަމުގެ ގުޅުންތަކަށް އިޙްތިރާމުކުރާނެކަމަށްވެސް އެ ބަޔާނުގައި ބުނެފައިވެއެވެ.
މަޣްރިބާއި އަލްޖަޒާއިރާ ދެމެދު އޮންނަ ޚާރިޖީ ގުޅުންތައްވަނީ 1980ގެ އަހަރުތަކުގެ ތެރޭގައިވެސް ކަނޑާލައިފައެވެ. އަދި ދެ ޤައުމުގެ ދެމެދުގައި އުފެދިފައިވާ މައްސަލަތަކުގެ ސަބަބުން ދެ ޤައުމުގެ ސަރަޙައްދީ ރޮނގުވެސްވަނީ 1994ވަނަ އަހަރުން ފެށިގެން ބަންދުކޮށްފައެވެ.