ކޯވިޑް-19ގެ ވެކްސިން ފުރިހަމަކޮށްފައިވާ މީހުންނަށް ބޫސްޓަރެއްގެ ގޮތުގައި ތިންވަނަ ޑޯސެއް ނުދިނުމަށް ދުނިޔޭގެ ޞިއްޙަތު ޖަމުޢިއްޔާއިން އިލްތިޞްކޮށްފިއެވެ.
ހަނެގޭރީގެ ވެރިރަށްކަމަށްވާ ބުޑަޕެސްޓުގައި ނޫސްވެރިންނާ ވާހަކަދައްކަވަމުން ދުނިޔޭގެ ޞިއްޙަތު ޖަމުޢިއްޔާގެ ޑިރެކްޓަރު ޖެނެރަލް ޓެޑްރޮސް އަދަނޮމު ގެބްރިޔޭސުސް ވިދާޅުވީ އަވަސްއަރުވާލައިގެން ބޫސްޓަރު ޑޯސެއް ދިނުމަކީ މުޙިންމުކަމެއް ނޫންކަމަށާއި އިސްކަން ދޭންވީ ޑޯސްތައް ފުރިހަމަ ނުކުރާ މީހުންނަށް ވެކްސިން ދިނުންކަމަށެވެ. އެ ގޮތުން އޭނާވަނީ ބައެއް ޤައުމުތަކުގައި ވެކްސިންގެ ޑޯސްތައް ފުރިހަމަކޮށްފައިވާ މީހުންގެ ޢަދަދު 1 ނޫނީ 2 އިންސައްތައަށްވުރެ ދަށްކަން ފާހަގަކުރައްވައިފައެވެ. އޭގެ އިތުރުން ވެކްސިން ފުރިހަމަކޮށްފައިވާ މީހުންނަށް ބޫސްޓަރު ޑޯސެއް ދީގެން އެ މީހުންނަށް ލިބޭ ފައިދާއެއް އަދި ނުފެންނަކަމަށްވެސް އޭނާ ވިދާޅުވިއެވެ. އަދި އޭނާ ބާރުއަޅުއްވަނީ ޤައުމުތަކުގައި ވެކްސިން ޖެހޭ އާބާދީގެ އެންމެން ވެކްސިން ފުރިހަމަކުރުމަށްފަހު ބާކީވާ ޑޯސްތައް ވެކްސިން ހޯދުމުގައި ދަތިތަކަކާ ކުރިމަތިލާން ޖެހިފައިވާ ޤައުމުތަކަށް ހަދިޔާކުރުމަށެވެ.
ވެކްސިން ފުރިހަމަކޮށްފައިވާ މީހުންނަށް ބޫސްޓަރެއްގެ ގޮތުގައި ތިންވަނަ ޑޯސެއް ދިނުމުގައި އެންމެ ކުރީގައި އުޅެނީ އިސްރާއީލެވެ. އެމެރިކާއިންވެސްވަނީ ސެޕުޓެންބަރު މަހުގެ 20ވަނަ ބޫސްޓަރު ޑޯސް ޖަހަން ފަށާނެކަން އިޢުލާންކޮށްފައެވެ.