ޗައިނާއިން މަސައްކަތްކުރަނީ ބިރުދައްކައިގެން ޤާނޫނާ ޚިލާފު ކަންކަން ޙާޞިލްކުރަންކަމަށް އެމެރިކާގެ ނައިބު ރައީސް ކަމާލާ ހެރިސް ވިދާޅުވެއްޖެއެވެ.
ދެކުނު އިރުމަތީ އޭޝިޔާއަށް އެމެރިކާގެ ނައިބު ރައީސް ކުރައްވަމުންދާ ރަސްމީ ދަތުރުފުޅުގެ ތެރެއިން ސިންގަޕޫރަށް ވަޑައިގެންނެވުމަށްފަހު ކަމާލާ ހެރިސް ވިދާޅުވީ އެމެރިކާގެ ސަލާމަތަށް އޮތް އެންމެ ބޮޑު ނުރައްކަލަކީ ޗައިނާކަމަށާއި އެ ޤައުމުގެ ނުފޫޒާއި ބާރުން ސަލާމަތްވުމަށް ސަރަޙައްދީ ޤައުމުތަކުން ގުޅިގެން މަސައްކަތްކުރަންޖެހޭކަމަށެވެ. ކަމަލާ ހެރިސްގެ ވާހަކަފުޅުގައި އޭނާވަނީ އެމެރިކާއިން އިސްކަންދެނީ ބައިނަލްއަޤްވާމީ ތަރުތީބުގެ ދަށުން އިންސާނީ ޙައްޤުތައް ކަށަވަރުކޮށްދިނުމަށްކަމަށެވެ. އޭގެ އިތުރުން 2023ވަނަ އަހަރުގެ ތެރޭގައި ބޭއްވުމަށް ހަމަޖެހިފައިވާ ސަރަޙައްދީ އިޤްތިޞާދީ ޖަމުޢިއްޔާ، އޭޕެކުގެ ބައްދަލުވުން އެމެރިކާގައި ބޭއްވުމަށް އެ ޤައުމުން މަސައްކަތްކުރަމުންދާކަމަށް އޭނާވަނީ ވިދާޅުވެފައެވެ. 21 ޤައުމު ހިމެނޭ އެ ޖަމުޢިއްޔާގައި އެމެރިކާގެ އިތުރުން ޗައިނާއާއި ރަޝިޔާވެސް ހިމެނެއެވެ.
އެމެރިކާގެ ވެރިކަމަށް ޖޯ ބައިޑަން ވަޑައިގެންނެވުމަށްފަހު އެމެރިކާގެ ސަރުކާރުން އެންމެ ބޮޑު އިސްކަމެއް ދެނީ އަފްޣާނިސްތާނާއި ޢިރާޤާއި ސޫރިޔާފަދަ މެދުއިރުމަތީގެ ޤައުމުތަކުގައި އެމެރިކާގެ ފައުޖުތަކުން ކުރަމުންދާ ހަނގުރާމަތައް ނިންމުމަކަށް ގެނައުމަށްފަހު ޗައިނާއިން ކުރިމަތިކުރުވަމުންދާ ނުރައްކަލައި ކުރިމަތިލުމަށެވެ. ޚާއްޞަކޮށް ދެކުނު ޗައިނާ ކަނޑުގެ 80 އިންސައްތަ ސަރަޙައްދުގެ މިލްކުވެރިކަމަށް ޗައިނާއިން ކުރަމުންދާ ދަޢުވާއާ ދެކޮޅަށް ސަރަޙައްދީ ޤައުމުތަކުން ގުޅިގެން މަސައްކަތްކުރުމަށް އެމެރިކާއިންވަނީ ބާރުއަޅައިފައެވެ. އެމެރިކާއިން ސިފަކުރާ ގޮތުގައި ދެކުނު ޗައިނާ ކަނޑުގައި ޗައިނާއިން އަމަލުކުރަމުންދާ ގޮތުގެ ސަބަބުން ސަރަޙައްދީ ޤައުމުތަކުގެ ސަލާމަތާއި މިނިވަންކަމަށް އަސަރުކުރާނެއެވެ.
ދެކުނު އިރުމަތީ އޭޝިޔާއަށް ކަމާލާ ހެރިސް ކުރައްވަމުންދާ 7 ދުވަހުގެ ރަސްމީ ދަތުރުފުޅުގައި ސިންގްޕޫރުގެ އިތުރުން ވިއެޓުނާމަށް އޭނާ ވަޑައިގަންނަވާނެއެވެ. މީގެ ކުރިން އެމެރިކާގެ ދިފާޢީ ވަޒީރު ލޮޔިޑު އޮސްޓިންވެސްވަނީ އެ ސަރަޙައްދަށް ރަސްމީ ދަތުރުފުޅެއްކުރައްވައިފައެވެ.