އަންނަ އަހަރު ފިލިޕީންސްގައި ބާއްވައި ރިޔާސީ އިންތިޚާބުގައި ނައިބު ރައީސްގެ މަޤާމަށް ވާދަކުރެއްވުމަށް އެ ޤައުމުގެ ރައީސް ރޮދްރިގޯ ދުތާތޭ ނިންމަވައިފިއެވެ.
ފިލިޕީންސްގެ ވެރިކަންކުރާ ޕީޑީޕީ ލަޕަން ޕާޓީން ބުނީ އަންނަ އަހަރުގެ ރިޔާސީ އިންތިޚާބުގައި އެ ޕާޓީގެ ފަރާތުން ވާދަކުރައްވާނީ ޤާނޫނުހަދާ މަޖިލީހުގެ މެންބަރެއްކަމަށްވާ ކުރިސްޓޮފަރ ގޯކަމަށެވެ. އަދި އިންތިޚާބުގައި ދުތާތޭ ވާދަކުރައްވާނީ އޭނާގެ ރަނިންމޭޓުގެ ގޮތުގައިކަމަށްވެސް އެ ޕާޓީންވަނީ ބުނެފައެވެ. އެ ނިންމުން އެ ޕާޓީގެ ޤައުމީ މަޖިލީހުން ފާސްކުރާނީ އަންނަ މަހުގެ 8ވަނަ ދުވަހުއެވެ. ޕީޑީޕީ ލަޕަން ޕާޓީން ސިފަކުރި ގޮތުގައި ދުތާތޭގެ ނިންމެވުމަކީ ރައްޔިތުން ބޭނުންވާ ގޮތްކަމަށާއި އެއީ އޭނާ ވެވަޑައިގަންނަވައި ވަރަށް ބޮޑު ގުރުބާނީއެކެވެ.
ޢުމުރުފުޅުން 76 އަހަރުގެ ދުތާތޭ ފިލިޕީންސްގެ ވެރިކަމާ ޙަވާލުވެވަޑައިގަތީ 2016ވަނަ އަހަރުގެ ތެރޭގައެވެ. ނަމަވެސް ފިލިޕީންސްގެ ޤާނޫން އޭނާއަށް ވެރިކަން ކުރެއްވެނީ 6 އަހަރުގެ އެންމެ ދަޢުރަކަށެވެ. އޭނާގެ ދަޢުރު ހަމަވާނީ އަންނަ އަހަރުގެ ޖޫން މަހުގެ ތެރޭގައެވެ. އެހެންކަމުން ގިނަ ބަޔަކު ޤަބޫލުކުރާ ގޮތުގައި ރަނިންމޭޓުގެ ގޮތުގައި ރިޔާސީ އިންތިޚާބުގައި ވާދަކުރެއްވުމަށް ދުތާތޭ ނިންމެވީ ވެރިކަމުގައި ދެމިހުންނެވުމުގެ ބޭނުމުގައެވެ.