ފާއިތުވި ފަސް ދުވަހުގެ ތެރޭގައި 18،000 މީހުން ސަލާމަތްތެރިކަމާއެކު އަފްޣާނިސްތާނުން ގެންގޮސްފައިވާކަމަށް ހުޅަނގުގެ އަސްކަރީ އިއްތިޙާދު، ނޭޓޯއިން ބުނެފިއެވެ.
އޮގަސްޓު މަހުގެ 15ވަނަ ދުވަހު ޠާލިބާން ޖަމާޢަތުގެ ބާރުގެ ދަށަށް އަފްޣާނިސްތާނުން ގެންފިޔުމުން ގިނަ ޢަދަދެއްގެ ބަޔަކުވަނީ އެ ޤައުމުގެ ވެރިރަށް ކާބުލްގެ ބައިނަލްއަޤްވާމީ ވައިގެ ބަނދަރަށް ޖަމާވެފައެވެ. އަދި އެ ވައިގެ ބަނދަރުން ފުރުމަށް މަސައްކަތްކުރި ނޭޓޯގެ އަސްކަރީ މަތިންދާބޯޓުތަކަށް ގަދަކަމުން އަރަން މަސައްކަތްކޮށް މަތިންދާބޯޓުތައް ދަތުރުކުރުން ހުއްޓުވުމަށް އެތައް ހާސް ބަޔަކުވަނީ މަސައްކަތްކޮށްފައެވެ. އެމެރިކާގެ އަސްކަރީ ފައުޖުތަކުން ބަލަހައްޓާ ކާބުލްގެ ވައިގެ ބަނދަރުގައި ހިނގި ހަމަނުޖެހުންތަކުގައި 12 މީހުން މަރުވެފައިވެއެވެ. އެއާއެކު އެ ވައިގެ ބަނދަރަށް ދެވެން އޮންނަ މަގުތައް ޠާލިބާނުންވަނީ ބަންދުކޮށްފައެވެ.
ނޭޓޯއިން ބުނެފައިވާ ގޮތުގައި ފާއިތުވި ފަސް ދުވަހުގެ ތެރޭގައި އަފްޣާނިސްތާނުން ބޭރަށް ސަލާމަތްތެރިކަމާއެކު ގެންގޮސްފައިވާ 18،000 މީހުންގެ ތެރޭގައި އެ އިއްތިޙާދުގެ ޤައުމުތަކުގެ އެންބަސީތަކުގައި މަސައްކަތްކުރާ ޚާރިޖީ މުވައްޒަފުންނާއި ސަލާމަތީ ޚިދުމަތްތަކުގެ މުވައްޒަފުންނާއި ވިޔަފާރިވެރިންނާއި އެ ޤައުމުތަކަށް އެކި ގޮތްގޮތުން އެހީތެރިކަން ފޯރުކޮށްދީފައިވާ އަފްޣާނިސްތާނުގެ ޢާންމު ރައްޔިތުންނާއި އެ މީހުންގެ ޢާއިލާތައް ހިމެނޭކަމަށެވެ.
ހުޅަނގުގެ ޤައުމުތަކުން ނިންމާފައިވަނީ އަފްޣާނިސްތާނުން ހިޖުރަކުރާ އެ ޤައުމުގެ ޢާންމު ރައްޔިތުން އެހެން ޤައުމުތަކުގައި ވަޒަންވެރިކުރުމަށެވެ. އޭގެ ތެރެއިން ގިނަ މީހުން ވަޒަންވެރިކުރާނެކަމަށް ބެލެވެނީ މެދުތެރޭ އޭޝިޔާއާއި ވިލާތުގެ ޤައުމުތަކުގައެވެ.