އިޓާލިއަން ސެރިއާގެ ޔުވެންޓަސްއަށް ކުޅެމުންދާ ދުނިޔޭގައި އުފެދުނު އެންމެ މޮޅެތި ކުޅުންތެރިންގެ ތެރޭގައި ހިމެނޭ އެއްކުޅުންތެރިއެއް ކަމަށްވާ ކްރިސްޓިއާނޯ ރޮނާލްޑޯ ރިއަލް މެޑްރިޑަށް ގެންދަން އުޅޭކަމަށް ދެކެވޭ ވާހަކަތަށް އެޓީމްގެ ކޯޗް ކާލޯ އެންޗެލޯޓީ ދޮގުކޮށްފިއެވެ. އެންޗެލޯޓީ ހާމަކުރިގޮތުގައި އޭނާގެ ޓީމުން ރޮނާލްޑޯ ނުފެންނާނެކަމަށެވެ.
އުމުރުން 36 އަހަރުގެ ރޮނާލްޑޯ ޔުވެންޓަސްއާއެކު ހަދާފައިވާ އެއްބަސްވުން ހަމަވާން މިހާރު ބާކީ 10 މަސް ދުވަސް އޮތް އިރު ރޮނާލްޑޯ އަންނަނީ މިމަހުގެ ޓްރާންފަރ މާކެޓް ބަންދުވުމުގެ ކުރިން އެހެން ކްލަބަކަށް ބަދަލުވެވޭތޯ މަސައްކަތް ކުރަމުންކަމަށް ހަބަރުތަށް ލިބެއެވެ. މިގޮތުން ރޮނާލްޑޯ ދިއުން އެންމެ ގާތް ކްލަބްތަކުގެ ލިސްޓުގައި ރިއާލްގެ އިތުރުން ޕީއެސްޖީ އާއި މެންޗެސްޓަރ ސިޓީ ހިމެނެއެވެ.
އެންޗެލޯޓީ ކުރި ޓްވީޓެއްގައި ހާމަކުރިގޮތުގައި ރޮނާލްޑޯއަކީ އަބަދުވެސް ރެއާލްގެ ބަތަލެއްގެ ގޮތުގައި ބެލެވޭނެކަމަށާއި ރޮނާލްޑޯއަށް އޭނާގެ ފުރިހަމަ އިހްތިރާމް އެބައޮތް ކަމަށެވެ. ނަމަވެސް ރެއާލްއިން ރޮނާލްޑޯ ސޮއިކުރަން ނުވިސްނާކަމަށްވެސް އޭނާ ހާމަކުރިއެވެ. އަދި ރެއާލް އަބަދުވެސް ވިސްނާނީ ކުރިމަގަށް ކަމަށް އޭނާ ހާމަކުރިއެވެ. ރޮނާލްޑޯ ޔުވެންޓަސްއާއި ގުޅިނީ މީގެ ތިން އަހަރު ކުރިން 99.2 މިލިއަން ޕައުންޑްގެ އަގަކަށް ރެއާލްއިންނެވެ. 2009 ވަނަ އަހަރު މެންޗެސްޓަރ ޔުނައިޓެޑުން ރެއާލްއަށް ބަދަލުވި ރޮނާލްޑޯވަނީ އެކްލަބަށް 438 މެޗް ކުޅެދީ 450 ލަނޑު ކާމިޔާބުކޮށްދީފައެވެ. މިއީ ކްލަބްގެ ރިކޮޑެކެވެ.
ލިއޮނެލް މެސީ ޕީއެސްޖީއަށް ސޮއިކުރުމާއެކު ރޮނާލްޑޯގެ މުސްތަގްބަލާމެދު ވަނީ ސުވާލު އުފެދެން ފަށާފައެވެ. ރޮނާލްޑޯ ދިޔައީ ޕީއެސްޖީއަށް ބަދަލުވުމުގެ މަސައްކަތް ކުރަމުންކަމަށް މިހާރު ހަބަރުތަށް ލިބެއެވެ. އަދި އެކަމުގެ ސަބަބުން ގިނަ ދުވަސްތަކެއް ވަންދެން ކުޅުނު މެންޗެސްޓަރ ޔުނައިޓެޑްގެ ވާދަވެރި ސިޓީއަށް ބަދަލުވުމުގެ ވާހަކަވެސް މިހާރުވަނީ އަޑުއިވެން ފަށާފައެވެ.