އަފްޣާނިސްތާނުގައި އިސްލާމީ ޤާނޫނު ތަޢާރަފުކޮށްފިނަމަ އެ ޤައުމަށް ދެމުންދާ އެހީތެރިކަން ކަނޑާލާނެކަމަށް ޖަރުމަންވިލާތުން ބުނެފިއެވެ.
އަފްޣާނިސްތާނުގައި ޙަރަކާތްތެރިވަމުންދިޔަ އެމެރިކާއާއި ހުޅަނގުގެ އަސްކަރީ އިއްތިޙާދު، ނޭޓޯގެ ފައުޖުތައް 20 އަހަރުދުވަހަށްފަހު އެ ޤައުމުން ފައިބަމުންދާ ދަނޑިވަޅެއްގައި އެ ޤައުމުގެ އެކި ސަރަޙައްދުތަކަށް ޠާލިބާނުން ދެމުންދާ ޙަމަލާތައްވަނީ އިތުރުކޮށް ވަރުގަދަކޮށްފައެވެ. އޮގަސްޓު މަހުގެ 31ވަނަ ދުވަހުގެ ކުރިން ބޭރުގެ ފައުޖުތައް އަފްޣާނިސްތާނުން ފައިބަން މަސައްކަތްކުރާ ދަނޑިވަޅެއްގައި ޠާލިބާނުން ދެމުންދާ ޙަމަލާތަކުގައި އެ ޤައުމުގެ ތިންބައިކުޅަ ދެބައިވަނީ އެ ޖަމާޢަތުގެ ބާރުގެ ދަށަށް ގެންގޮސްފައެވެ. ޠާލިބާނުން ބުނެފައިވަނީ އެ ޖަމާޢަތުގެ މަޤްޞަދަކީ މުޅި އަފްޣާނިސްތާން އެ ޖަމާޢަތުގެ ބާރުގެ ދަށަށް ގެންގޮސް އެ ޤައުމުގައި އިސްލާމީ ޤާނޫނީ ނިޒާމެއް ޤާއިމުކުރުންކަމަށެވެ.
ޖަރުމަންވިލާތުގެ ޚާރިޖީ ވަޒީރު ހެއިކޯ މާސް ވިދާޅުވީ އަފްޣާނިސްތާނުގައި އިސްލާމީ ޤާނޫނު ތަޢާރަފުކޮށްފިނަމަ އެ ޤައުމަށް ދެމުންދާ އެހީތެރިކަން ކަނޑާލާން ޖެހޭނެކަމަށެވެ. އަދި ކޮންމެ އަހަރަކު ޖަރުމަންވިލާތުން އެހީގެ ގޮތުގައި އަފްޣާނިސްތާނަށް 505 މިލިޔަން އެމެރިކާ ޑޮލަރު ދެމުންދާކަން މާސް ފާހަގަކުރެއްވިއެވެ.
އަފްޣާނިސްތާނުގައި ޠާލިބާނުން ހޯދަމުންދާ ބޮޑެތި ކުރިއެރުންތަކާ ގުޅޭގޮތުން އެމެރިކާގެ ރައީސް ޖޯ ބައިޑަން ވިދާޅުވީ ފާއިތުވި 20 އަހަރު ދުވަހުގެ ތެރޭގައި އެ ޤައުމަށް އެމެރިކާއިން އެއް ޓުރިލިޔަން އެމެރިކާ ޑޮލަރު ޚަރަދުކޮށްފައިވާނެކަމަށާއި އެ މުއްދަތުގެ ތެރޭގައި އެތައް ހާސް އެމެރިކާ ސިފައިންނެއްގެ ފުރާނަ ގެއްލިފައިވާކަމަށެވެ. އަދި އަފްޣާނިސްތާނުގެ ވެރިން އެ ޤައުމުގެ ކުރިމަގު ބައްޓަންކުރަންޖެހޭކަމަށާއި ތާވަލާ އެއްގޮތަށް އެ ޤައުމުން އެމެރިކާގެ ފައުޖުތައް ފައިބާނެކަމަށްވެސް ބައިޑަން ވިދާޅުވިއެވެ.
ނޭޓޯއިން އަފްޣާނިސްތާނަށް ފޮނުވި ފައުޖުގައި އެންމެ ގިނައިން ހިމެނެނީ ޖަރުމަންވިލާތުގެ ސިފައިންނެވެ. ނަމަވެސް ޖަރުމަންވިލާތުގެ ހުރިހާ ސިފައިންވަނީ އަފްޣާނިސްތާނުން މިހާރު ފައިބާފައެވެ.