އިންގްލިޝް ޕްރިމިއަރ ލީގުގެ ޗެލްސީ އާއި ޓޮޓްނަމް ހޮޓްސްޕަރ ބައްދަލުކުރި ރަހްމަތްތެރިކަމުގެ މެޗް އެއްވަރު ވެގެން ނިމިއްޖެއެވެ.
ޗެލްސީގެ ދަނޑުގައި ކުޅުނު މިމެޗް ނިމުނީ 2 ލަނޑު 2 ލަނޑުން ދެޓީމް އެއްވަރު ވެގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 16 ވަނަ މިނެޓްގައި ޖަހަދިނީ ހަކީމް ޒިޔެކްއެވެ. އަދި މިމެޗްގައި ޗެލްސީގެ ދެވަނަ ލަނޑު މެޗްގެ 49 ވަނަ މިނެޓްގައި ޖަހާދިނީވެސް ޒިޔެކްއެވެ. މިމެޗްގައި ސްޕަރސްގެ ފުރަތަމަ ލަނޑު މެޗްގެ 56 ވަނަ މިނެޓްގައި ޖަހައިދިނީ ލޫކަސް މޮއުރާއެވެ. އަދި މިމެޗްގެ ނަތިޖާ ހަމަހަމަކުރި ލަނޑު ސްޕަރސްއަށް ކާމިޔާބުކޮށްދިނީ 70 ވަނަ މިނެޓްގައި ސްޓީވެން ބަރގްވިންއެވެ. މިމެޗްގައި ދެތީމުންވެސް މިވަގުތަށް ނެރެވެން އޮތް އެންމެ ވަރުގަދަ ޓީމް ނެރެފައިވާކަން ފާހަގަކޮށްލެވެއެވެ.
ސްޕަރސްގެ އެންމެ މުހިންމު ކުޅުންތެރިޔާ ހެރީ ކޭން އަދިވެސް ކްލަބްގެ ފަރިތަކުރުންތަކުގައި ބައިވެރިވާން ފަށާފައެއް ނުވެއެވެ. މެޗަށްފަހު ކޭންއާ ގޫޅޭގޮތުން ސްޕަރސްގެ ކޯޗް ނޫނޯ އެސްޕިރިޓޯ ސަންޓޯއަށް ސުވާލު ކުރުމުން އޭނާވަނީ ކޭން އާއި ގުޅޭގޮތުން އެއްވެސް މަޢުލޫމާތެއް މިޑިއާއަށް ހިއްސާ ކުރަން ބޭނުން ނުވާކަމަށް ހާމަކޮށްފައެވެ. އަދި ކޭން އާއި ގުޅޭ ގޮތުން އުފެދިފައިވާ ހިޔާލު ތަފާތުވުންތައް ދުރުކުރުމުގެ މަސައްކަތް ކުރާނީ ކްލަބްގެ އެތެރޭގައި ކަމަށާއި އަދި އެކަމަށް ހައްލު ހޯދާނީވެސް ކްލަބްގެ ތެރެއިން ކަމަށް އޭނާ ބުންޏެވެ.