އެމެރިކާގެ ސުޓޭޓެއްކަމަށްވާ އެލެސްކާއަށް ބާރުގަދަ ބިންހެލުމެއް އައުމުން ސުނާމީއެއް އަރާފާނެކަމުގެ އިންޒާރު ދީފިއެވެ.
އެމެރިކާގެ ޖިޔޮލޮޖިކަލް ސާވޭއިން ބުނެފައިވަނީ އެލެސްކާއަށް ބިންހެލުން އައިސްފައިވަނީ ގޮނޑުދޮށާ ވަރަށް ކައިރިން، ވަރަށް ތިލަ ހިސާބަކަށެވެ. އެ ގޮތުން 46.7 ކިލޯމީޓަރު އަޑިން އައިސްފައިވާ ބިންހެލުމަކީ ރިކްޓަ މިންގަނޑުން 8.2ގެ ބާރުގަދަ ބިންހެލުމެކެވެ. އެއާއެކު އެލެސްކާގެ ބައެއް ސަރަޙައްދުތަކަށް ސުނާމީއެއް އަރާފާނެކަމުގެ އިންޒާރުވަނީ ދީފައެވެ. އަދި އެ ސަރަޙައްދުގައި އޮންނަ ހަވާއީއަށް ސުނާމީއެއް އަރާފާނެކަމުގެ އިންޒާރު ދިން ނަމަވެސް ސުނާމީއެއްގެ ނުރައްކަލެއް އެ ސުޓޭޓަށް ނެތްކަމަށް ފަހުންވަނީ ކަނޑައަޅައިފައެވެ.
ރިކްޓަ މިންގަނޑުން 8.2ގެ ބާރުގަދަ ބިންހެލުމުގެ އިތުރުން އެލެސްކާއަށްވަނީ ވަރުގަދަ ލޮޅުންތަކެއް އަރައިފައެވެ. އެ ގޮތުން ބިންހެލުމަށްފަހު އައިސްފައިވާ ލޮޅުންތައް 6.2 އަދި 5.6 އަރައެވެ. އެމެރިކާގެ ޖިޔޮލޮޖިކަލް ސާވޭއިން ބުނި ގޮތުގައި ބިންހެލުން އައިސްފައިވަނީ ގޮނޑުދޮށާ ގާތްގަނޑަކަށް 91 ކިލޯމީޓަރު ދުރުންނެވެ. އެއާއެކު ސުނާމީއެއް އަރާފާނެކަމަށް ބެލެވޭ ސަރަޙައްދުތަކުގައި ދިރިއުޅޭ ޢާންމުން ރައްކާތެރި ސަރަޙައްދުތަކަށް ގެންދިޔުމުގެ މަސައްކަތްވަނީ ފަށައިފައެވެ.