އެމެރިކާއާ ދެކޮޅަށް ދެމުންދާ ސައިބާ ޙަމަލާތަކުގެ ސަބަބުން ދުނިޔޭގައި ބޮޑު ހަނގުރާމައެއް ފެށުމުގެ ފުރުޞަތު އެބައޮތްކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
އެމެރިކާގެ ސަރުކާރުން އެންމެ ބޮޑު އިސްކަމެއް މިހާރު ދެނީ ސައިބާ ޙަމަލާތަކުން ދިފާޢުވުމަށެވެ. އެ ގޮތުން ފާއިތުވި މަސްތަކުގެ ތެރޭގައި އެމެރިކާގެ ގިނަ ޢަދަދެއް ކުންފުނިތަކާ ދެކޮޅަށް ގިނަ ޢަދަދެއްގެ ސައިބާ ޙަމަލާތަކެއްވަނީ ދީފައެވެ. އެ ޙަމަލާތަކުގެ ސަބަބުން ކާބޯތަކެެއްޗާއި ތެލުގެ ސިނާޢަތަށްވަނީ އަސަރުކޮށްފައެވެ.
އެމެރިކާގެ ޤައުމީ ޖާސޫސީ އިދާރާއަށް ކުރެއްވި ޒިޔާރަތެއްގައި ވާހަކަދައްކަވަމުން ބައިޑަން ވިދާޅުވީ އެމެރިކާއަށް ދެމުންދާ ސައިބާ ޙަމަލާތަކުގެ ސަބަބުން ދުނިޔޭގެ ބޮޑު ބާރަކާ ދެކޮޅަށް ހަނގުރާމައެއް ފެށުމުގެ ފުރުޞަތު އެބައޮތްކަމަށެވެ. ބެލެވޭ ގޮތުގައި ބައިޑަން އިޝާރާތްކުރައްވާފައިވަނީ ރަޝިޔާއާއި ޗައިނާއަށެވެ. އެއީ އެމެރިކާއަށް ސައިބާ ޙަމަލާތައް ދެމުންދާކަމަށް ތުޙްމަތުކުރެވޭ ދެ ޤައުމެވެ.
ޖޫން މަހުގެ 16ވަނަ ދުވަހު ސުވިޓުޒަލޭންޑުގެ ޖެނީވާގައި ފުރަތަމަ ފަހަރަށް ރަޝިޔާގެ ރައީސް ވުލަޑުމީރު ޕުޓިންނާ ބައްދަލުކުރައްވައި ބައިޑަންވަނީ އެމެރިކާއަށް ދެމުންދާ ސައިބާ ޙަމަލާތައް ބަލައިނުގަނެވޭނެކަމަށާއި ގުޅުންތައް ގޯސްވާނީ އެފަދަ ޙަމަލާތަކުގެ ސަބަބުންކަމަށް ވިދާޅުވެފައެވެ. އެ ބައްދަލުވުމަށްފަހު ސައިބާ ޙަމަލާތައް ތަޙްޤީޤުކުރުމަށް އެމެރިކާއާއި ރަޝިޔާއިންވަނީ ގުޅިގެން މަސައްކަތްތަކެއް ކޮށްފައެވެ.
މިދިޔަ ޖަނަވަރީ މަހުގެ ތެރޭގައި ވެރިކަމާ ޙަވާލުވެވަޑައިގަތުމަށްފަހު ބައިޑަންވަނީ ޗައިނާގެ ސަބަބުން ކުރިމަތިވަމުންދާ ނުރައްކަލާ ގުޅޭގޮތުން އެމެރިކާގެ ގާތް ބައިވެރިންނާއެކު މަޝްވަރާކުރައްވައިފައެވެ. އެ ގޮތުން 2040ގެ އަހަރުތަކުގެ ތެރޭގައި އަސްކަރީ ގޮތުންނާއި އިޤްތިޞާދީ ގޮތުން ދުނިޔޭގެ އެންމެ ބޮޑު ބާރަށް ޗައިނާއިންވާނެކަމުގެ އިންޒާރު ބައިޑަންވަނީ ދެއްވައިފައެވެ.