ރަސްމީ ދަތުރެއްގައި ޠާލިބާން ޖަމާޢަތުގެ އިސް ވަފުދެއް ޗައިނާއަށް ގޮސްފިއެވެ.
ޠާލިބާނުންގެ ތަރުޖަމާނެއްކަމަށްވާ މުޙައްމަދު ނަޢީމު ބުނެފައިވާ ގޮތުގައި އެ ޖަމާޢަތުގެ ވަފުދުގައި ހިމެނޭ 9 މީހުން 2 ދުވަހުގެ މަތިން ޗައިނާގެ އިސްވެރިންނާ ބައްދަލުކޮށް މަޝްވަރާކުރާނެއެވެ. އެ ގޮތުން ޗައިނާގެ ޚާރިޖީ ވުޒާރާގެ އިސްވެރިންނާ ބައްދަލުކޮށް އަފްޣާނިސްތާނުގެ ސަލާމަތާއި ރައްކަލާ އެ ޤައުމުގައި ޞުލްޙަ ޤާއިމުކުރުމާ ގުޅޭގޮތުން މަޝްވަރާތައް ކޮށްފައިވެއެވެ. ނަޢީމު ބުނީ ޠާލިބާނުންގެ ވަފުދެއް ޗައިނާއަށް ގޮސްފައިވަނީ އެ ޤައުމުގެ ދަޢުވަތަކަށްކަމަށާއި ވަފުދުގެ އިސްވެރިޔަކަށް ހުންނާނީ ޠާލިބާނުންގެ ދެވަނައަށް އެންމެ އިސްވެރިޔާ މުއްލާ ޢަބްދުލްޣަނީ ބަރާދަރުކަމަށެވެ. އަދި ޗައިނާއިން އަފްޣާނިސްތާނަށް ކަނޑައަޅާފައިވާ މަންދޫބާ އެ ވަދުދުން ބައްދަލުކުރާނެކަމަށްވެސް ނަޢީމުވަނީ ބުނެފައެވެ.
ޗައިނާގެ ޚާރިޖީ ވުޒާރާއިން ބުނެފައިވާ ގޮތުގައި އެ ޤައުމުގެ ޚާރިޖީ ވަޒީރު ވާން ޔީވަނީ ޠާލިބާނުންގެ ވަފުދާ ބައްދަލުކުރައްވައިފައެވެ. ޠާލިބާނުންގެ ވަފުދެއް ޗައިނާއަށް ގޮސްފައިވަނީ އަފްޣާނިސްތާނުގައި ޞުލްޙަ ޤާއިމުކުރުމަށް ކުރަމުންދާ މަޝްވަރާތަކުން އެދެވޭ ކުރިއެރުމެއް ލިބިފައި ނުވައި ދަނޑިވަޅެއްގައެވެ. ފާއިތުވި ހަފުތާތަކުގައި ޠާލިބާނުންގެ ޙަމަލާތައްވަނީ ވަރަށް ބޮޑަށް އިތުރުކޮށްފައެވެ. ޠާލިބާނުން ބުނާ ގޮތުގައި އަފްޣާނިސްތާނުގެ 85 އިންސައްތަ އޮތީ އެ ޖަމާޢަތުގެ ބާރުގެ ދަށުގައެވެ. އޭގެ ތެރޭގައި އަފްޣާނިސްތާނާއި ތަޖިކިސްތާނާއި ޕާކިސްތާނާއި އީރާނާ ގުޅޭ ސަރަޙައްދީ ރޮނގުތައްވެސް ހިމެނެއެވެ. އެމެރިކާއިން ބުނެފައިވާ ގޮތުގައި އަފްޣާނިސްތާނުގެ 419 ޑިސްޓުރިކްޓުގެ ތެރެއިން 200 ޑިސްޓުރިކްޓު އޮތީ ޠާލިބާނުންގެ ބާރުގެ ދަށުގައެވެ.
ކުރިޔަށް އޮތް މަސްދުވަހުގެ ތެރޭގައި އެމެރިކާގެ އިތުރުން ހުޅަނގުގެ އަސްކަރީ އިއްތިޙާދު، ނޭޓޯގެ ފައުޖުތައް އަފްޣާނިސްތާނުން ފޭބުމުގެ މަސައްކަތްވަނީ ފަށައިފައެވެ.