ސްޕެއިންގެ ބާސެލޯނާއާއި އެ ޓީމުގެ ކުރީގެ ކުޅުންތެރިޔާ ބްރެޒިލްގެ ނޭމާގެ މެދުގައި ކޯޓުގައި ހިނގަމުންދާ މައްސަލަތަކަށް މި ދެ ފަރާތުން ކޯޓުން ބޭރުގައި އެއްބަސްވުމަކަށް އައިސް، އެކަމަށް ނިމުމެއް ގެނެސްފިއެވެ.
މިމައްސަލަތައް ފެށިފައިވަނީ 2017ވަނަ އަހަރު ނޭމާ ބާސާއިން ޕެރިސް ސެއިންޓް ޖަރމެއިންއަށް 200 މިލިއަން ޕައުންޑްގެ ޓްރާންސްފަރ ފީ އަކަށް ބަދަލުވުމުގައި ބޯނަސްގެ ގޮތުގައި ބާސާއިން ނޭމާއަށް ދޭނެކަމަށް ކުރިން އެއްބަސްވިކަމަށް ބުނާ 37.2 މިލިއަން ޕައުންޑް ދިނުމަށް އެ ކުލަބުން ދެކޮޅުން ހަދާކަމަށް ނޭމާ ބުނި ހިސާބުންނެވެ. މިކަމާއެކު ބާސާއިންވަނީ 2016ވަނަ އަހަރު ނޭމާ ބާސާއާއެކު ހެދި އައު އެއްބަސްވުމުގެ ދަށުން އޭނާއަށް ލިބުނު 8 މިލިއަން ޕައުންޑް އަނބުރާ ހޯދުމަށް ޤާނޫނީ މައްސަލައެއް ކޯޓަށް ހުށަހަޅާފައެވެ. އަދި މިދިޔަ އަހަރުގެ ޖޫން މަހުގެ ތެރޭގައި ސްޕެއިންގެ ކޯޓުންވަނީ ބާސާއަށް 6.1 މިލިއަން ޕައުންޑް އަނބުރާ ދިނުމަށް ނޭމާއަށް އަންގާފައެވެ. ނަމަވެސް އެއާއެކު ނޭމާ އަނެއްކާވަނީ އެކަމާއި ދެކޮޅަށް ކޯޓުގައި މައްސަލަ އިސްތިޢުނާފުކޮށް އަދި އިތުރު މައްސަލައެއް ހުށަހަޅާފައެވެ.
ބާސާއިން ނެރުނު ބަޔާނެއްގައި ބުނާގޮތުން ނޭމާއާއި އެ ކުލަބާއި ދެމެދު އުފެދިފައިވި ޤާނޫނީ މައްސަލަތައް ދެފަރާތުގެ މެދުގައިވަނީ ކޯޓުން ބޭރުގައި އެއްބަސްވުމަކަށް އާދެވިފައެވެ. އަދި މިކަމާއި ގުޅޭ އެއްބަސްވުމެއް އެކުލަވާލެވި، އެއެއްބަސްވުމުގައި ދެފަރާތުން ސޮއި ކޮށްފައިވާކަމަށްވެސް އެ ބަޔާނުގައި ވެއެވެ.