އަފްޣާނިސްތާނުގެ ސަލާމަތީ ޙާލަތު ގޯސްވަމުންދާ ދަނޑިވަޅެއްގައި އަވަށްޓެރި ތަޖިކިސްތާނާއި ރަޝިޔާއިން މަޝްވަރާކޮށްފިއެވެ.
20 އަހަރު ދުވަހަށްފަހު އެމެރިކާގެ އިތުރުން ހުޅަނގުގެ އަސްކަރީ އިއްތިޙާދު، ނޭޓޯއިންވަނީ އަފްޣާނިސްތާނުން ފޭބުމުގެ މަސައްކަތް ފަށައިފައެވެ. އެ ގޮތުން ނޭޓޯގެ ފައުޖުތަކުގައި ހިމެނޭ އިނގިރޭސިވިލާތާއި ޖަރުމަންވިލާތާއި އިޓަލީވިލާތުގެ ސިފައިންވަނީ އަފްޣާނިސްތާނުން ފައިބައިފައެވެ. އަދި އަންނަ އޮގަސްޓު މަސް ނިމުމުގެ ކުރިން އަފްޣާނިސްތާނުން ފޭބުމުގެ މަސައްކަތް އެމެރިކާގެ ސިފައިންވެސްވަނީ ފަށައިފައެވެ. އެ ގޮތުން އަފްޣާނިސްތާނުގެ ކަންދަހާރުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުވެސްވަނީ އަފްޣާނިސްތާނުގެ ސަލާމަތީ ބާރުތަކާ ޙަވާލުކޮށްފައެވެ. އެއީ އަފްޣާނިސްތާނުގައި އެމެރިކާއިން ކުރި ގެއްލުންބޮޑު އަދި ދިގު ހަނގުރާމައިގައި ބޭނުންކުރި އަސްކަރީ މައި މަރުކަޒުވެސްމެއެވެ. އަފްޣާނިސްތާނުގައި އެމެރިކާގެ ސިފައިން މިހާރު ޙަރަކާތްތެރިވަނީ ވެރިރަށް ކާބުލްގެ އިތުރުން އެ ޤައުމުގެ ބައިނަލްއަޤްވާމީ ވައިގެ ބަނދަރުގެ ސަލާމަތީ ކަންކަން ބެލެހެއްޓުމުގެ މަސައްކަތުގައި އެކަންޏެވެ.
ބޭރުގެ ފައުޖުތަކުން އަފްޣާނިސްތާނުން ފައިބަމުންދާ ދަނޑިވަޅެއްގައި ޠާލިބާން ޖަމާޢަތުގެ ހަނގުރާމަވެރިންގެ ބާރުވަނީ އެ ޤައުމުގައި ވަރުގަދަކޮށްފައެވެ. ޠާލިބާނުންވަނީ އަފްޣާނިސްތާނުން ޕާކިސްތާނާއި ތަޖިކިސްތާނާއި އުޒުބަކިސްތާނާއި އީރާނަށް ދެވެން އޮންނަ މައިމަގުތަކާއި ސަރަޙައްދީ ރޮނގުތައް އެ ޖަމާޢަތުގެ ބާރުގެ ދަށަށް ގެނެސްފައެވެ. ޠާލިބާނުން ބުނާ ގޮތުގައި އަފްޣާނިސްތާނުގެ 85 އިންސައްތަ ސަރަޙައްދުތައް އޮތީ އެ ޖަމާޢަތުގެ ބާރުގެ ދަށުގައެވެ. އެމެރިކާގެ އަސްކަރިއްޔާއިން ބުނެފައިވާ ގޮތުގައި އަފްޣާނިސްތާނުގެ 419 ޑިސްޓުރިކްޓުގެ ތެރެއިން 200 ޑިސްޓުރިކްޓު އޮތީ ޠާލިބާނުންގެ ބާރުގެ ދަށުގައެވެ.
މެދުތެރޭ އޭޝިޔާގެ ސަލާމަތަށް ނުރައްކާތެރިކަން ބޮޑުވެފައިވާ ދަނޑިވަޅެއްގައި އެޅޭނެ ރައްކާތެރިކަމުގެ ފިޔަވަޅުތަކާ ގުޅޭގޮތުން ތަޖިކިސްތާނާއި ރަޝިޔާގެ ދިފާޢީ ވަޒީރުންވަނީ މަޝްވަރާކުރައްވައިފައެވެ. އެ ގޮތުން ރަޝިޔާއިންވަނީ އަފްޣާނިސްތާނާ ގުޅޭ ސަރަޙައްދީ ރޮނގުގައި ސަލާމަތީ ވަޞީލަތްތައް އިތުރުކޮށްދިނުމަށް ތަޖިކިސްތާނަށް ހުށަހަޅައިފިއެވެ. އަދި ޠާލިބާނުންގެ ފަރާތުން އަތުވެދާނެ ޙަމަލާއަކުން ސަލާމަތްވުމަށް އެޅޭނެ ފިޔަވަޅުތަކާ ގުޅޭގޮތުންވަނީ ދެ ޤައުމުން މަޝްވަރާކޮށްފައެވެ. އޭގެ އިތުރުން ދެ ޤައުމުން ގުޅިގެން ބޭއްވުމަށް ނިންމާފައިވާ އަސްކަރީ ފަރިތަކުރުންތަކާ ގުޅޭ މަޝްވަރާތައްވެސްވަނީ ކޮށްފައެވެ.
ރަޝިޔާއިންވަނީ ތަޖިކިސްތާނުގައި އަސްކަރީ މަރުކަޒެއް ޤާއިމުކޮށްފައެވެ. އަފްޣާނިސްތާނުގެ ސަލާމަތީ ޙާލަތު ގޯސްވުމުން ތަޖިކިސްތާނުންވަނީ ރަޝިޔާގެ އެހީތެރިކަމަށް އެދިފައެވެ. އޭގެ އިތުރުން އަފްޣާނިސްތާނުގެ 100،000 ރައްޔިތުންނަށް ސަލާމަތާއި ރައްކާތެރިކަން ދިނުމަށްވެސް ތަޖިކިސްތާނުންވަނީ ނިންމައިފައެވެ. އެ ގޮތުން އަފްޣާނިސްތާނުގެ ރައްޔިތުންނަށް ކުރިމަތިވެފައިވާ ނުރައްކާތެރި ޙާލަތުގައި އެ ޤައުމުގެ ރައްޔިތުންނަށް އެހީތެރިވުމަށް ތަޖިކިސްތާނުންވަނީ ދެ ސަރަޙައްދެއްގައި ހިޖުރަވެރިންނަށް ބޯހިޔާވަހިކަން ދިނުމަށް ކަނޑައަޅައިފައެވެ. އަދި ހިޖުރަވެރިންނަށް ބޭނުންވާނެ އަސާސީ ސާމާނުތައްވަނީ އެ ސަރަޙައްދުތަކަށް ފޮނުވައިފައެވެ.