މޭއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށްދިން ޙަމަލާގައި ތުހުމަތު ކުރެވޭ 4 މީހެއްގެ މައްޗަށް ދަޢުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ޕްރޮސެކިއުޓަރ ޖެނެރަލް ހުސައިން ޝަމީމު ކުރެއްވި ޓުވީޓެއްގައި ވިދާޅުވީ މިމައްސަލައާ ގުޅޭ 4 މީހެއްގެ ތަޙްޤީގު ފުލުހުން ނިންމާ ދަޢުވާކޮށްދިނުމަށް ޕީޖީއަށް ފޮނުވާފައިވާ ކަމަށެވެ. ދަޢުވާ ކުރަން ފޮނުވާފައިވަނީ މިހަމަލާގައި އަމަލީ ގޮތުން ބައިވެރިވި ކަމުގެ ތުހުމަތުވާ އަހުމަދު އަދުހަމް، އާއި މުޖާޒް އަހްމަދު އާއި ތަހުމީން އަހްމަދު އާއި އަހުމަދު ފާތިހު، މައްޗަށެވެ. ދަޢުވާއާ ބެހޭ ގޮތުން ގޮތެއް ނިންމުމަށް ޤާނޫނުގައިވާ ގޮތުން 15 ދުވަސް ލިބޭ ކަމަށްވެސް ޕީޖީ ވިދާޅުވިއެވެ.
@PGO_MV today received investigation of the first 4 accused of 6May attack. Investigation will continue for other accused & evidence. I'll join @PoliceMv for a joint press conf on 24th July with more details. According to law, prosecution has 15 days to decide on prosecution.
— Hussain Shameem (@HuShameem) July 21, 2021
މިމީހުންގެ ތަޙްޤީގު ނިންމާ ޕީޖީއަށް ފޮނުވާފައިވާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދުވެސްވަނީ ވިދާޅުވެފައެވެ.
Today we submitted investigative and evidential documents/material for prosecuting the first set of suspects (4) linked to the May 6th terrorist attack. The investigation of this major case will continue with great focus and continued support from our international partners.
— Mohamed Hameed (@M_Hameedh) July 21, 2021
މޭއިމަހުގެ 6 ވަނަ ދުވަހުގެ ރޭ ރައީސް ނަޝީދު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައި އޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. ޙަމަލާއަށްފަހު އޭޑީކޭގައި 16 ގަޑިއިރުގެ ތެރޭގައި ގިނަ އޮޕަރެޝަންތަކެއް ކުރެއްވުމަށްފަހު ޙާލުކޮޅު ރަނގަޅުވަމުން އައިނަމަވެސް އިތުރަށް ފަރުވާ ހޯއްދެވުމަށް މޭއި މަހުގެ 13 ވަނަ ދުވަހު ރައީސް ނަޝީދު ވަނީ ޖަރުމަނަށް ފުރާވަޑައިގަންނަވާފައެވެ. އެގޮތުން ޖަރުމަންވިލާތުގެ ބަރލިންގ ބުންޑެސްވެއަރ ހޮސްޕިޓަލުގައި އެމަނިކުފާނު ވަނީ ފަރުވާ ހޯއްދަވާފައެވެ. އެހޮސްޕިޓަލުގައި ފަރުވާގައި ޙަރަކާތްތެރިވެވަޑައިގަތް ޑޮކްޓަރުންގެ ޓީމުގެ ލަފާގެ މަތިން އިތުރު ފަރުވާއަށް މިހާރު އެމަނިކުފާނުވަނީ އިނގިރޭސިވިލާތަށް ވަޑައިގެންފައެވެ.
ނަޝީދަށް އަމާޒުކުރި ހަމަލާއާ ގުޅޭ ގޮތުން ރައްޔިތުންގެ މަޖިލީހުގެ 241 ކޮމިޓީން ވަނީ އިންކުއަރީއެއް ހަދާ އެއިންކުއަރީއާ ގުޅޭ ރިޕޯޓް އެކުލަވާލާފައެވެ. އަދި ރައީސް ނަޝީދު އަވަހާރަކޮށްލަން ދިން ހަމަލާގެ ތަހުގީގު ކުރިއަށްދާ ގޮތަށް ފަރާވެރިވުމަށް އެމްޑީޕީން "މެއި ހައެއް"ގެ ނަމުގައި ކޮމިޓީއެއް އުފައްދާ އެކޮމިޓީންވެސް އަންނަނީ ކަމާ ގުޅުންހުރި ފަރާތްތަކާ ބައްދަލުކުރަމުންނެވެ.