ހިޔާ ފެލްޓުތަކުގެ އެއްބަސްވުމުގައި ސޮއިކޮށް ތަޅުދަނޑި ޙަވާލުކުރަން ފަށައިފިއެވެ. އެޗްޑީސީއިން ވިދާޅުވީ އެންމެ ފުރަތަމަ މިމަރުޙަލާ ކުރިއަށް ގެންދަނީ އެޗް-9 ކެޓަގަރީގެ ފްލެޓުތަކުގައިކަމަށެވެ.
ހިޔާ ފްލެޓުތަކުގެ ވެރިންނާއ ފްލެޓު ޙަވާލުކރަން ރަސްމީކޮށްފެށީ މިއަދު ހެނދުނު 10:00ގައެވެ. އެންމެ ފުރަތަމަ ފްލެޓުތަކުގެ އެއްބަސްވުންތަކުގައި ސޮއިކުރުމަށް ގެންގޮސްފައިވަނީ ލިޔެކިޔުންތައް ރަނގަޅަށް ހުށައަޅާފައިވާ ތަރުތީބުން އެޗް-9 ޓަވަރުގެ ފްލެޓުތައް ލިބުނު މީހުންނެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ސުޙައިލް އަޙްމަދު ވިދާޅުވީ އެންމެ ފުރަތަމަ މަސައްކަތްކުރީ ފުރަތަމަ ދުވަހު 200 އެއްބަސްވުން އެކުލަވާލުމަށް ކަމަށެވެ. އެހެންނަމަވެސް އެކި ސަބަބުތަކާހެދި ބައެއް މީހުންނަށް އެއްބސްވުމުގައި ސޮއިކުރުމަށް ޙާޒިރު ނުވެވުނުކަމަށްވެސް ސުހެއިލް ވިދާޅުވިއެވެ. އެމީހުންނަށް ފަހުން އެފުރުސަތުދީ އެކަން އަންގާނެކަމަށް ސުހެއިލް ވިދާޅުވިއެވެ. މިއަދު އެއްބަސްވުންތަކުގައި ސޮއިކުރީ 118 މީހުންނެވެ.
ހިޔާ ފްލެޓުތަކަށް ކަރަންޓު ގުޅުމުގެ މަސައްކަތް މިހާރުވެސް ކުރިއަށްދާކަމަށާ، ކުރިއަށްއޮތް ހަފްތާއެއްހައި ދުވަހުގެތެރޭގައި އެމަސައްކަތް ނިންމާލެވޭނެކަމަށް ސުޙައިލް ވިދާޅުވިއެވެ. އަދި އޭގެކުރިން ކަރަންޓު ބޭނުންކުރުމުގައި ދިމާވާނެ ދަތިތަކަށް ވިސްނައިގެން ފްލެޓުތަކުގެ ކަންކަން ރޭވުމަށް ސުހެއިލްވަނީ އިލްތިމާސްކުރައްވާފައެވެ.
ހިޔާ ފްލެޓުތަކުގެ އެއްބަސްވުންތަކުގައި ސޮއިކުރުމުގެ ކަންކަން ކުރިއަށްދަނީ ހުރަވީ ސްކޫލްގައެވެ. އެއްބަސްވުމަށްފަހު ފްލެޓު ހުރި ޓަވަރަށް ގޮސް އެތަނުގައި ޤާއިމުކޮށްފައިވާ ޚާއްސަ އިންތިޒާމުތަކުގެ ތެރެއިން ފެލެޓު ބެލުމަށްފަހު އެއްވެސް މައްސަލައެއް އުޅޭނަމަ އެކަން ފާހަގަކޮށް އަދި ނެތްނަމަ އެކަން ހާމަކޮށް ފްލެޓާ ރަސްމީކޮށް ވެރިފަރާތުން ޙަވާލުވަނީ އިޤުރާރެއްގައި ސޮއިކުރުމަށްފަހުއެވެ. ފްލެޓަށް އެއްވެސް އިތުރު ބަދަލެއް ގެންނަނަމަ މިޢިޤުރާރުގެ ދަށުން، އެކަން އެޗްޑީސީއަށް އަންގަންޖެހެއެވެ.