ކޯވިޑް-19 ފެތުރުން ހުއްޓުވުމަށް ދެކުނު އެފްރިކާގައި އަޅާފައިވާ ރައްކާތެރިކަމުގެ ފިޔަވަޅުތައް ކުޑަ ބަދަލަކާއެކު އިތުރު ދެ ހަފުތާގެ މުއްދަތަށް ދަމަހައްޓައިފިއެވެ.
އެފްރިކާ ބައްރުގެ ޤައުމުތަކުގެ ތެރެއިން ކޯވިޑް-19 ޙާލަތު އެންމެ ގޯސްވެފައިވަނީ ދެކުނު އެފްރިކާގައެވެ. އެ ޤައުމުގައި މިހާތަނަށް 2.19 މިލިޔަން މީހުންނަށް ބަލިޖެހި 64،289 މީހުންވަނީ މަރުވެފައެވެ. އިންޑިޔާއިން އެންމެ ފުރަތަމަ ފެނުނު ޑެލްޓާ ވޭރިއަންޓުގެ ސަބަބުން ދެކުނު އެފްރިކާގައި ބަލިފެތުރޭ މިންވަރުވަނީ ވަރަށް ބޮޑަށް އިތުރުވެފައެވެ. މި މަހުގެ ކުރީކޮޅު އެ ޤައުމުގައި ދުވާލެއްގެ މައްޗަށް 26،000އަށްވުރެ ގިނަ މީހުންނަށް ބަލިޖެހުނެވެ. ފާއިތުވި 24 ގަޑިއިރުގެ ތެރޭގައި 16،302 މީހުންނަށް ބަލިޖެހި 151 މީހުންވަނީ މަރުވެފައެވެ.
ޓީވީ މެދުވެރިކުރައްވާ ރައްޔިތުންނާ މުޚާތަބުކުރައްވައި ދެކުނު އެފުރިކާގެ ރައީސް ސައިރިލް ރަމަފޯސާ ވިދާޅުވީ އެ ޤައުމުގެ ޞިއްޙީ ނިޒާމަށް ވަރަށް ބޮޑަށް ބާރުބޮޑުވެފައިވާކަމަށާއި އަދިވެސް ޙާލަތު ރަނގަޅު ނުވާކަމަށެވެ. އެހެންކަމުން މިދިޔަ ޖޫން މަހުގެ ފަހުކޮޅު އެ ޤައުމުގައި އެޅި ރައްކާތެރިކަމުގެ ފިޔަވަޅުތައް އިތުރު ދެ ހަފުތާގެ މުއްދަތަށް ދެމެހެއްޓުމަށް ނިންމަވާފައިވާކަމަށް އޭނާ ވިދާޅުވިއެވެ.
ދެކުނު އެފުރިކާގައި އަޅާފައިވާ ފިޔަވަޅުތަކުގެ ތެރޭގައި ޢާންމުން އެއްވެ އުޅުން މަނާކުރުމާއި ރޭގަނޑު 9އަކާއި ފަތިހު 4ކާ ދެމެދު ޢާންމުން ބޭރަށް ނުކުމެ އުޅުންވަނީ މަނާކޮށްފައެވެ. ނަމަވެސް ރައްކާތެރިކަމުގެ ފިޔަވަޅުތަކާ އެއްގޮތަށް ރެސްޓޯރަންޓުތަކާއި ކެފޭތަކުގައި ޚިދުމަތް ދެވޭނެއެވެ. އަދި ޖިމުތައް ހުޅުވުމުގެ ޙުއްދަ ދިނުމަށްވެސްވަނީ ނިންމައިފައެވެ.
ދެކުނު އެފުރިކާގައި ޢާންމުންނަށް ކޯވިޑް-19 ވެކްސިން ދެމުންދާ ދުވެލި ވަރަށް ދަށެވެ. އެ ގޮތުން 60 މިލިޔަން މީހުންގެ އާބާދީއެއް އޮންނަ ދެކުނު އެފްރިކާގައި މިހާތަނަށް ދީފައިވަނީ ވެކްސިންގެ 4.2 މިލިޔަން ޑޯޒެވެ. ނަމަވެސް އޮގަސްޓު މަހުގެ ނިޔަލަށް ދުވާލެއްގެ މައްޗަށް ވެކްސިން ޖަހައި މީހުންގެ ޢަދަދު 300،000އަށް އިތުރުކުރުމުގެ މަސައްކަތްވަނީ ފަށައިފައެވެ.
ދެކުނު އެފުރިކާގެ ރައްޔިތުންނަށް ކޯވިޑް-19ގެ ވެކްސިން ދިނުމަށް ސީނޯވެކްގެ ކޮރޯނާވެކް ހޯދުމަށް ސަރުކާރުން މަސައްކަތްކުރަމުންދާކަމަށް ރަމަފޯސާ ވިދާޅުވިއެވެ. އޭގެ އިތުރުން ޖޮންސަން އެންޑް ޖޮންސަން ވެކްސިންގެ 17 މިލިޔަން ޑޯޒު ގަތުމަށް އެއްބަސްވުމަކާ ހަމައަށް އައިސްފައިވާކަމަށްވެސް އޭނާ ވިދާޅުވިއެވެ.