ހައިޓީގެ ރައީސް ޖޮވެނެލް މުއީސް އަވަހާރަކޮށްލުމުގައި އެންމެ އިސްކޮށް ބައިވެރިވިކަމަށް ބެލެވޭ މީހާ ހައްޔަރުކޮށްފިއެވެ.
ޖުލައި މަހުގެ 7ވަނަ ދުވަހު މުއީސް ދިރިއުޅުއްވާ ގެކޮޅަށް 28 މީހުންގެ މައްޗަށް ހިމެނޭ ކުލީ ސިފައިންގެ ބަޔަކު ވަދެ ޙަމަލާދިނުމަށްފަހު އޭނާވަނީ އަވަހާރަކޮށްލައިފައެވެ. އެއާއެކު އެ ޤައުމުވަނީ ނުރައްކާތެރި އަދި ބިރުވެރި ޙާލަތަކަށް ވެއްޓިފައެވެ.
ހައިޓީގެ ފުލުހުން ބުނީ ޙައްޔަރުކޮށްފައިވާ މީހާއަކީ މުއީސް އަވަހާރަކޮށްލުމަށް ކުލީ ސިފައިން ހޯދައި ހަމަޖެއްސި މީހާކަމަށެވެ. ޙައްޔަރުކޮށްފައިވަނީ ހައިޓީގެ ރައްޔިތެއްކަމަށްވާ ޢުމުރުން 63 އަހަރުގެ ކުރިސްޓިޔަން އެމަނުއަލް ސަނޮންނެވެ. އޭނާ ހައިޓީއަށް ގޮސްފައިވަނީ ޖޫން މަހުގެ ކުރީކޮޅު ޕުރައިވެޓު ޖެޓެއްގައެވެ. އޭނާއާއެކު އޭނާގެ އަމިއްލަ ހަށިފާރަވެރިންވެސް ހައިޓީއަށް ގޮސްފައިވެއެވެ. ހައިޓީގެ ފުލުހުން ބުނާ ގޮތުގައި މުއީސް އަވަހާރަކޮށްލާފައިވަނީ ސިޔާސީ މަޤްޞަދެއްގައެވެ.
ހައިޓީގެ ފުލުހުންވަނީ މުއީސް އަވަހާރަކޮށްލުމަށް ދިން ޙަމަލާއާ ގުޅިގެން ސަނޮން ހިމެނޭގޮތަށް ކޮލަންބިޔާއަށް ނިޞްބަތްވާ 18 މީހުންނާއި ހައިޓީއާއި އެމެރިކާއަށް ނިޞްބަތްވާ 3 މީހުން ހައްޔަރުކޮށްފައެވެ. ކޮލަންބިޔާގެ އިތުރު ފަސް މީހަކު އަދިވެސް ހޯދަމުންދާކަމަށާއި 3 މީހަކު މަރާލާފައިވާކަމަށް ހައިޓީގެ ފުލުހުން ބުނެއެވެ.
ހައިޓީގެ ރައީސް އަވަހާރަކޮށްލުމުން އެ ޤައުމަށް ކުރިމަތިވެފައިވާ ނާޒުކު ދަނޑިވަޅުގައި އެމެރިކާގެ ފަންނީ މާހިރުންގެ ވަފުދެއް ހައިޓީއަށް ފޮނުވުމަށް ނިންމާފައިވާކަމަށް އެމެރިކާގެ ދިފާޢީ ވުޒާރާއިންވަނީ ބުނެފައެވެ. އެ ގޮތުން ރައީސް އަވަހާރަކޮށްލުމުގެ ހާދިޘާ ތަޙްޤީޤުކުރުމުގައި އެހީތެރިވެދެވޭނެ ގޮތްތައް ބެލުމުގައި އެމެރިކާގެ ޖާސޫސީ އިދާރާތަކުގެ މާހިރުން ބައިވެރިވާނެއެވެ.
ހައިޓީގެ މުހިންމު ސަރަޙައްދުތަކާއި އިމާރާތްތަކުގެ ސަލާމަތީ ކަންކަން ކަށަވަރުކުރުމަށް އެމެރިކާގެ އަސްކަރީ އެހީތެރިކަމަށްވެސް އެ ޤައުމުން އެދިފައިވެއެވެ. ނަމަވެސް އެމެރިކާއިން އެ ހުށަހެޅުމަށް އިޖާބަދީފައެއް ނުވެއެވެ.