އަލްޖަޒާއިރުގެ އައު ބޮޑުވަޒީރު އައިމަން ބިން ޢަބްދުއްރަޙްމާނަށް ކޯވިޑް-19 ޖެހިއްޖެއެވެ.
ޖުލައި މަހުގެ 7ވަނަ ދުވަހު އަލްޖަޒާއިރުގެ އައު ސަރުކާރު އެކުލަވާލެއްވި ޢަބްދުއްރަޙްމާނަށް ކޯވިޑް-19 ޖެހުމުން އޭނާވަނީ 7 ދުވަހުގެ މުއްދަތައް އެކަހެރިވެވަޑައިގެންފައެވެ. ނަމަވެސް އެކަހެރިވެވަޑައިގެން ހުންނަވައި އިންޓަނެޓު މެދުވެރިކޮށް މަޤާމުގެ މަސްޢޫލިއްޔަތު އޭނާ ޢަދާކުރައްވާނެއެވެ.
އަލްޖަޒާއިރުގައި މިހާތަނަށް 145،296 މީހުންނަށް ކޯވިޑް-19 ޖެހި 3،824 މީހުންވަނީ މަރުވެފައެވެ. ފާއިތުވި ދުވަސްތަކުގައި އެ ޤައުމުގައި ބަލިޖެހޭ މީހުންގެ ޢަދަދުވަނީ އިތުރުވެފައެވެ. ބަލިމަޑުކަން ފެތުރުން ހުއްޓުވުމަށް އަލްޖަޒާއިރުގެ ރައީސް ޢަބްދުލްމަޖީދު ތަބޫނުވަނީ ޖުލައި މަހުގެ 10ވަނަ ދުވަހުން ފެށިގެން އެ ޤައުމުގެ ހުރިހާ ސަރަޙައްދެއްގައި ގައިދުރުކުރުމުގެ ފިޔަވަޅުތައް އަލުން ޤާއިމުކޮށް މާސްކު އެޅުން މަޖުބޫކުރުވުމަށް ސަރުކާރަށް އަންގަވައިފައެވެ. އޭގެ އިތުރުން ބަލިފެތުރުން ހުއްޓުވުމަށް ޢާންމުންނަށް ވެކްސިން ދެމުންދާ ދުވެލި އަވަސްކުރުމަށްވެސް އޭނާވަނީ އަންގަވައިފައެވެ.
ދުނިޔޭގެ ގިނަ ޢަދަދެއްގެ އިސްވެރިންނަށް މީގެ ކުރިންވަނީ ކޯވިޑް-19 ޖެހިފައެވެ. އޭގެ ތެރޭގައި އިނގިރޭސިވިލާތުގެ ބޮޑުވަޒީރު ބޮރިސް ޖޮންސަންއާއި ފަރަންސޭސިވިލާތުގެ ރައީސް އެމަނުއަލް މެޚްރޮންއާއި ސޫރިޔާގެ ރައީސް ބައްޝާރުލް އަސަދާއި އެމެރިކާގެ ކުރީގެ ރައީސް ޑޮނަލްޑް ޓްރަންޕު ހިމެނިވަޑައިގަންނަވައެވެ. ޕާކިސްތާނުގެ ރައީސް ޑރ. ޢާރިފު ޢަލްވީއާއި އެ ޤައުމުގެ ބޮޑުވަޒީރު ޢިމްރާން ޚާނަށްވެސްވަނީ ކޯވިޑް-19 ޖެހިފައެވެ.