މިއަހަރުގެ އޮގަސްޓު 31ގައި ހުރިހާ ސިފައިން އަފްޣާނިސްތާނުން ފޭބުމުން، ކުރިމަގު ކަނޑައަޅާނީ އެ ޤައުމުގެ ރައްޔިތުންކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
އެމެރިކާގެ ކުރީގެ ރައީސް ޑޮނަލްޑު ޓުރަންޕުގެ ސަރުކާރުންވަނީ ޠާލިބާނުންނާއެކު ޞުލްޙައިގެ އެއްބަސްވުމެއްގައި މިދިޔަ އަހަރުގެ ފެބްރުއަރީ މަހުގެ ތެރޭގައި ސޮއިކޮށްފައެވެ. އެ އެއްބަސްވުމުގެ ދަށުން މެއި މަހުގެ 1ވަނަ ދުވަހުގެ ކުރިން އަފްޣާނިސްތާނުގައި ތިބި އެމެރިކާގެ ފައުޖުތައް ބާލަންޖެހެއެވެ. ނަމަވެސް އެމެރިކާގެ ރައީސް ޖޯ ބައިޑަންވަނީ އެ ތާރީޚު ސެޕުޓެންބަރު މަހުގެ 11ވަނަ ދުވަހަށް ފަސްކުރައްވައިފައެވެ. އެ މަސައްކަތުގެ ދަށުން އަފްޣާނިސްތާނުގައި ތިބި އެމެރިކާ ސިފައިން އެ ޤައުމުން ބޭލުމުގެ މަސައްކަތް 90 އިންސައްތައަށް ފުރިހަމަކޮށްފައިވާކަމަށް އެމެރިކާގެ ދިފާޢީ ވުޒާރާ ޕެންޓެގަނުން ބުނެއެވެ.
އެމެރިކާގެ ރިޔާސީ ގަނޑުވަރު ވައިޓު ހައުސުގައި ހުންނަވާ ވާހަކަދައްކަވަމުން ބައިޑަން ވިދާޅުވީ 20 އަހަރު ވަންދެން އެމެރިކާގެ ސިފައިން އަފްޣާނިސްތާނުގައި ޙަރަކާތްތެރިވެފައިވާކަމަށާއި އެ ޤައުމުގައި ތިބި އެމެރިކާގެ ސިފައިން ފޭބުމުން އަފްޣާނިސްތާނަށް އިތުރު ސިފައިން ނުފޮނުއްވާނެކަމަށެވެ. އަދި އަފްޣާނިސްތާނުގެ ކުރިމަގަކީ ކޮބައިކަން ދެން ނިންމާނީ އެ ޤައުމުގެ ރައްޔިތުންކަމަށް ބައިޑަން ވިދާޅުވިއެވެ. އޮގަސްޓު މަހުގެ 31ވަނަ ދުވަހު އަފްޣާނިސްތާނުގައި ތިބި އެމެރިކާގެ އެންމެ ފަހު ސިފައިން އެ ޤައުމުން ފައިބާނެކަމަށްވެސް ބައިޑަން ވިދާޅުވިއެވެ. ނަމަވެސް ކާބުލްގައި ހުންނަ އެމެރިކާގެ އެންބަސީގެ ސަލާމަތާއި ރައްކާތެރިކަން ޔަޤީންކުރުމަށް 650 ސިފައިން އެ ޤައުމުގައި ދެމިތިބޭނެކަމަށް އޭނާ ވިދާޅުވިއެވެ. އެމެރިކާގެ އަސްކަރިއްޔާއަށް ބަސްދޭހަކޮށްދިނުމުގެ ޚިދުމަތް ފޯރުކޮށްދިން އަފްޣާނިސްތާނުގެ އެތައް ހާސް ރައްޔިތުންވެސް ރައްކާތެރި ސަރަޙައްދުތަކަށް އޮގަސްޓު މަހުގެ 31ވަނަ ދުވަހުގެ ކުރިން ގެންދަވާނެކަމަށްވެސް ބައިޑަން ވިދާޅުވިއެވެ.
ޠާލިބާނުންނާ ދެކޮޅަށް މަސައްކަތްކުރުމުގެ ޤާބިލުކަން އަފްޣާނިސްތާނުގެ އަސްކަރިއްޔާއަށް ލިބިފައިވާކަމަށް ބައިޑަން ވިދާޅުވިއެވެ. ކުރިއަށްއޮތް ހަ މަސް ދުވަހުގެ ތެރޭގައި އަފްޣާނިސްތާނުގެ ސަރުކާރު ވެއްޓޭނެކަމަށާއި ދާޚިލީ ބޮޑު ހަނގުރާމައެއް ފެށޭނެކަމަށް އެމެރިކާގެ ޖާސޫސީ އިދާރާތަކުން އަންދާޒާކޮށްފައިވާކަމަށް ބުނެ ދެކެވޭ ވާހަކަތަކުގައި ހަޤީޤަތެއް ނުވާކަމަށްވެސް އޭނާ ވިދާޅުވިއެވެ.
މިދިޔަ ހަފުތާގެ ތެރޭގައި އަފްޣަނިސްތާނުގައި ޙަރަކާތްތެރިވާ އެމެރިކާ ސިފައިންގެ ކޮމާންޑަރު ޖެނެރަލް އޮސްޓިން މިލަރވަނީ އަފްޣާނިސްތާނުގައި ދާޚިލީ ހަނގުރާމައެއް ފެށިދާނެކަމުގެ އިންޒާރު ދެއްވައިފައެވެ. ނަމަވެސް އެ ވާހަކަތަކާ ގުޅިގެން ބައިޑަން ވިދާޅުވީ އަފްޣާނިސްތާނުގެ ސިފައިންގެ ޢަދަދު ޠާލިބާނު ހަނގުރާމަވެރިންގެ ޢަދަދަށްވުރެ އެތައް ގުނައެއް އިތުރުކަމަށެވެ. 300،000އަށްވުރެ ގިނަ ސިފައިން ތިބިކަމަށާއި އެ ޤައުމުގައި ޙަރަކާތްތެރިވާ ހަނގުރާމަވެރިންގެ ޢަދަދު ހުރީ 75،000ގައިކަމަށް އޭނާ ވިދާވިއެވެ. އެހެންކަމުން ޠާލިބާނުންނަށް އަސްކަރިއްޔާގެ މައްޗަށް ކުރި ހޯދުމަށް ފަސޭހަ ނުވާނެކަމަށްވެސް އޭނާ ވިދާޅުވިއެވެ.