އޮޑިޓަރ ޖެނަރަލްގެ މަޤާމަށް ޙުސައިން ނިޔާޒީ ޢައްޔަން ކުރަން ރައްޔިތުންގެ މަޖިލީހުން ފާސްކޮށްފިއެވެ.
ނިޔާޒީ އޮޑިޓަރ ޖެނަރަލްގެ މަޤާމަށް އައްޔަންކުރުމަށް ފާސްވީ މިއަދު ބޭއްވި ރައްޔިތުންގެ މަޖިލީހުގައި އެކަމަށް ނެގި ވޯޓުގައި ބައިވެރިވި 63 މެންބަރުންގެ އަޣްލަބިއްޔަތުންނެވެ.
ޙުސައިން ނިޔާޒީ މިހާތަނަށް ހުންނެވީ އެސިސްޓަންޓް އޮޑިޓަ ޖެނެރަލްގެ މަޤާމުގައެވެ.
އޮޑިޓަރ ޖެނެރަލްގެ މަޤާމަށް އައްޔަންކުރެއްވުމަށް، ހުސައިން ނިޔާޒީގެ ނަން، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ރައްޔިތުންގެ މަޖިލީހަށް ހުށަހަޅުއްވާފައިވަނީ ނިމިދިޔަ ޖޫންމަހުގެ 30 ވަނަ ދުވަހުއެވެ. އެމަޤާމަށް އައްޔަންކުރަން ނިޔާޒީގެ ނަންފުޅު ރައީސުލްޖުމްހޫރިއްޔާ މަޖިލީހަށް ފޮނުއްވީ، އެމަޤާމުގައި ކުރިން ހުންނެވި ހަސަން ޒިޔަތު އިސްތިއުފާ ދެއްވުމުންނެވެ.
ރާއްޖޭގެ އެންމެ ސީނިއަރ އެއް ޗާޓާޑް އެކައުންޓެންޓްކަމަށްވާ ނިޔާޒީއަކީ އޮޑިޓް އޮފީހުގައި މަސައްކަތް ކުރައްވަމުން ގެންދަވާ 15 އަހަރަށް ވުރެ ގިނަ ދުވަސް ވެފައިވާ ބޭފުޅެކެވެ.