ޙައްޖާޖީންނާއި ޙައްޖާބެހޭ މަސައްކަތްތަކުގައި ޙަރަކާތްތެރިވާ މަސައްކަތްތެރިންގެ މަޢުލޫމާތު ބެލެހެއްޓުމަށް ޚާއްޞަ ސުމާޓު ކާޑެއް ސަޢުދީ ޢަރަބިއްޔާއިން ތަޢާރަފުކޮށްފިއެވެ.
ސަޢުދީ ޢަރަބިއްޔާއިން ބުނެފައިވަނީ އެ ކާޑު ބޭނުންކޮށްގެން ޙައްޖާޖީންގެ ޙަރަކާތްތައް ބެލެހެއްޓޭނެކަމަށެވެ. އެ ގޮތުން ޙައްޖާޖީން އެއް ސަރަޙައްދުން އަނެއް ސަރަޙައްދަށް ކުރާ ދަތުރުތަކާއި ޙައްޖާޖީން ބޭނުންކުރާނެ ހޮޓާތަކުގެ މަޢުލޫމާތުތައް އެ ކާޑު މެދުވެރިކޮށް ބެލޭނެކަމަށެވެ. އޭގެ އިތުރުން ޙައްޖުގެ އަޅުކަމުގައި އުޅެނިކޮށް ޙައްޖާޖީއެއް ގެއްލިއްޖެނަމަވެސް އެ ކާޑު މެދުވެރިކޮށް އެ މީހަކު ފަސޭހައިން ހޯދޭނެކަމަށް އެ ޤައުމުން ބުނެއެވެ.
ޙައްޖާޖީންގެ ރައްކާތެރިކަން ޔަޤީންކުރުމަށް އެ މީހުންނަށް ކާބޯތަކެތި ފޯރުކޮށްދިނުމަށް ޚާއްޞަ ސަމާލުކަމެއް ދޭނެކަމަށް ސަޢުދީ ޢަރަބިއްޔާއިން ބުނެއެވެ. އެ ގޮތުން ޙައްޖާޖީންނަށް ފޯރުކޮށްދޭ ކާނާއަކީ ކުރިން ތައްޔާރުކޮށްފައިވާ ފެންވަރު ރަނގަޅު ކާނާއަށްވާނެކަމަށް އެ ޤައުމުން ބުނެއެވެ. ޙައްޖާޖީންގެ ޞިއްޙީ ޙާލަތު ގާތުން ބެލުމަށްވެސް ޚާއްޞަ ފިޔަވަޅުތަކެއް އެޅުއްމަށްވަނީ ނިންމައިފައެވެ. އެ ގޮތުން އަރަފާތާއި މިނާގެ އިތުރުން އެނޫންވެސް މުޤައްދަސް ބިންތަކުގައި ޚާއްޞަ ޞިއްޙީ މަރުކަޒުތައް ޤާއިމުކުރުމަށްވަނީ ނިންމައިފައެވެ.
މައްކާގައި ހުންނަ ނމަސްޖިދުލް ހަރާމަށް ވަދެނުކުތުމަށްވެސް ޚާއްޞަ ދޮރުތަކެއްވަނީ ކަނޑައަޅައިފައެވެ. އޭގެ އިތުރުން ޠަވާފުކުރުމަށާއި ސަޢުޔުކުރުމުގެ މަރުޙަލާތަކުގައި ޢަމަލުކުރާނެ ޚާއްޞަ އުޞޫލެއްވެސްވަނީ ޤާއިމުކޮށްފައެވެ. އެ ގޮތުން ޠަވާފުކުރުމަށް ކަނޑައަޅާފައިވާ މަގުތައްވެސްވަނީ އިތުރުކޮށްފައެވެ. އަދި މިސްކިތް ސާފުކޮށް ބެލެހެއްޓުމުގެ މަސައްކަތުގައި 5،000އަށްވުރެ ގިނަ މަސައްކަތްތެރިން ޙަރަކާތްތެރިވާނެކަމަށް ސަޢުދީ ޢަރަބިއްޔާއިން ބުނެއެވެ.
ކޯވިޑް-19ގެ ސަބަބުން މިދިޔަ އަހަރެކޭ އެއްގޮތަށް މި އަހަރުވެސް ޙައްޖުގެ އަޅުކަމުގައި ބައިވެރިވެވޭނީ ސަޢުދީ ޢަރަބިއްޔާގައި ދިރިއުޅޭ މީހުންނަށް އެކަންޏެވެ. މި ފަހަރުގެ ޙައްޖުގައި ބައިވެރިވުމުގެ ފުރުޞަތު ދިނުމަށް ސައުދީ ޢަރަބިއްޔާގެ ސަރުކާރުން ނިންމާފައިވަނީ 60،000 މީހުންނަށެވެ. ޙައްޖުގެ އަޅުކަމުގައި ބައިވެރިވެވޭނީ ދިގު މުއްދަތަކަށް ބޭސްފަރުވާ ނުހޯދައި ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް އެކަންޏެވެ.