މެލޭޝިޔާގެ ބޮޑުވަޒީރު މުޙްޔިއްދީން ޔާސީންގެ ޞިއްޙީ ހާލުކޮޅު ރަނގަޅުވަމުން އަންނަކަމަށާއި ވަރަށް އަވަހަށް ހަސްފަތާލުން ދޫކޮށްލާނެކަމަށް އޭނާގެ ރަސްމީ އިދާރާއިން ބުނެފިއެވެ.
ބޭރަށް ހިންގާތީ ކުއަލަ ލަންޕޫރުގައި ހުންނަ ހަސްފަތާލެއްގައި މުޙްޔިއްދީން ޔާސީން އެނދުމަތިކޮށްފައިވަނީ ޖޫން މަހުގެ 30ވަނަ ދުވަހުއެވެ. އަދި ގޮހޮރުގައި އިންފެކްޝަނެއް ހުރުމުން އޭނާއަށްވަނީ އައިވީ މެދުވެރިކޮށް އެންޓިބަޔޮޓިކު ދީފައެވެ. އޭނާގެ ޙާލުކޮޅު ރަނގަޅުކަމަށާއި ދެތިން ދުވަހެއްގެ ތެރޭގައި ހަސްފަތާލުން ދޫކޮށްލުމަށް ހަމަޖެހިފައިވާކަމަށް ބޮޑުވަޒީރުގެ އިދާރާއިން ބުނެއެވެ. ހަސްފަތާލުގައި ހޭދަކުރައްވައި ވަގުތުތަކުގައި މަސައްކަތްކުރުމުގެ ޙުއްދަވެސް ބޮޑުވަޒީރަށް ލިބިފައިވާކަމަށް އެ އިދަރާއިން ބުނެއެވެ.
އުމުރުފުޅުން 74 އަހަރުގެ މުޙްޔިއްދީން ޔާސީނަށްވަނީ 2018ވަނަ އަހަރުގެ ތެރޭގައި ޗިސްމޭގެ ކެންސަރު ޖެހިވަޑައިގެންފައެވެ. އެ ބަލިން އޭނާ ފަސޭހަވެވަޑައިގަތީ މިދިޔަ އަހަރުގެ ޖޫން މަހުގެ ތެރޭގައެވެ. މެލޭޝީޔާގެ ބޮޑުވަޒީރުގެ މަޤާމާ މުޙްޔިއްދީން ޙަވާލުވެވަޑައިގެންފައިވަނީ އޭގެ ތިން މަސް ދުވަސް ކުރިން އެ އަހަރުގެ މާރިޗު މަހުގެ 1ވަނަ ދުވަހުއެވެ. ބޮޑުވަޒީރުގެ އިދާރާއިން ބުނީ އޭނާއަށް ޖެހިފައިވާ އާލާސްކަންފުޅާއި ކެންސަރު ބައްޔާ އެއްވެސް ގުޅުމެއް ނެތްކަމަށެވެ.