ތައިލޭންޑުގެ ވެރިރަށް ބެންކޮކާއި ބައެއް އެހެން ޕުރޮވިންސުތަކުގައި އިމާރާތްކުރުމުގެ ބައެއް މަސައްކަތްތައް އަލުން ފެށުމުގެ ޙުއްދަ ދިނުމަށް ނިންމައިފިއެވެ.
ތައިލޭންޑުން ދަނީ ކޯވިޑް-19ގެ ނުރައްކާތެރި ރާޅަކާ ކުރިމަތިލަމުންނެވެ. އެ ޤައުމުގައި މިހާތަނަށް 283،067 މީހުންނަށް ބަލިޖެހި 2،132 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި 5،916 މީހުންނަށް ބަލިޖެހި 44 މީހުންވަނީ މަރުވެފައެވެ. އެ ޤައުމުގައި ބަލިފެތުރުން ހުއްޓުވުމުގެ ގޮތުން ރައްކާތެރިކަމުގެ ގިނަ ފިޔަވަޅުތަކެއްވަނީ އަޅައިފައެވެ. އެ ފިޔަވަޅުތަކުގެ ދަށުން އުމުރާނީ މަސައްކަތްތައް ކުރުންވެސްވަނީ މެދުކަނޑާލައިފައެވެ.
ތައިލޭންޑުގެ ސަރުކާރުން ބުނީ އިމާރާތްކުރުމުގެ މަޝްރޫޢުތައް ލަސްކުރުމުން ގެއްލުން ލިބެމުންދާ ޢާންމުންނަށާއި ކުންފުނިތަކަށް މަޝްރޫޢުތައް އަލުން ފެށުމުގެ ޙުއްދަ ދިނުމަށް ނިންމާފައިވާކަމަށެވެ. އެ ގޮތުން ބިންގަރާސްތަކުގައި ކުރާ މަސައްކަތްތަކާއި ދަތުރުފަތުރުކުރުމުގެ ރައްކާތެރިކަން ކަށަވަރުކުރުމަށް ހިންގައި މަޝްރޫޢުތަކަށް ޙުއްދަ ދިނުމަށްވަނީ ނިންމައިފައެވެ. އޭގެ އިތުރުން ކޯވިޑް-19އާ ގުޅުންހުރި ހަސްފަތާލުތައް އިމާރާތްކުރުންފަދަ މަޝްރޫޢުތަކަށް ޙުއްދަ ދިނުމަށްވެސްވަނީ ހަމަޖެހިފައެވެ. ނަމަވެސް އެ ޝަރުތުތަކަށް ނުފެތޭ މަސައްކަތްތައް ކުރުމަކަށް ޙުއްދައެއް ނުދޭނެއެވެ.
އިމާރާތްކުރުމުގެ މަސައްކަތްތައް ކުރުމުގައި ޙަރަކާތްތެރިވާ މަސައްކަތްތެރިންގެ ޞިއްޙީ ޙާލު ދެނެގަނެ ވެކްސިން ދިނުމާއި އެ މީހުން އެއް ސަރަޙައްދުން އަނެއް ސަރަޙައްދަށް ދަތުރުކުރެވޭނެ އިންތިޒާމުތައް ހަމަޖެއްސުމުގައި ތައިލޭންޑުގެ ސަރުކާރުން އެހީތެރިވެދޭނެއެވެ.