ސަރުކާރު ބަދަލުކުރުމަށް ގޮވާލައި ފަލަސްޠީނުގެ އެތައް ހާސް ރައްޔިތުންނެއް ކުރަމުންދާ މުޒާހަރާތައް ވަރުގަދަވެއްޖެއެވެ.
ސަލާމަތީ ބާރުތަކުގެ ބެލުމުގެ ދަށުގައި ހުއްޓައި ފަލަސްޠީނުގެ ރައީސް މަޙްމޫދު ޢައްބާސަށް އެންމެ ބޮޑަށް ފާޑުކިޔަމުންދިޔަ އެއް ސިޔާސީވެރިޔާކަމަށްވާ ނިޒާރު ބަނާތު މަރުވުމުން ހުޅަނގު އައްސޭރީގައި ސަރުކާރާ ދެކޮޅަށް ދަނީ ބޮޑެތި އެއްވުންތަކާއި މުޒާހަރާތައް ބާއްވަމުންނެވެ. އެ މުޒާހަރާތަކުގައި ހަމަނުޖެހުންތައްވެސް ހިނގާފައިވެއެވެ. އެ ގޮތުން ފަލަސްޠީނުގެ ސަލާމަތީ ބާރުތަކުންނާއި ޢައްބާސަށް ތާޢީދުކުރާ މީހުންވަނީ އަނިޔާވެރިކަމާއެކު މުޒާހަރާގެ ބައިވެރިންނާ ކުރިމަތިލައިފައެވެ.
ޖުލައި މަހުގެ 3ވަނަ ދުވަހު ހުޅަނގު އައްސޭރީގައި ބޭއްވި މުޒާހަރާތަކުގައި ސަރުކާރު ހިންގާ ރާމަﷲގެ އަލްމަނާރާ މައިދާނަށް ޢާންމުންވަނީ އެއްވެފައެވެ. ނިޒާރު ބަނާތުގެ މަންމައާއި އޭނާގެ ޢާއިލާއަށް ނިޞްބަތްވާ އެހެން މެންބަރުންވެސް އެ އެއްވުމުގައި ބައިވެރިވެފައިވެއެވެ. މުޒަހަރާގެ ބައިވެރިންވަނީ ސަރުކާރު ބަދަލުކުރުމަށް ބޭނުންވާކަމަށާއި 2015ވަނަ އަހަރުން ފެށިގެން ފަލަސްޠީނުގެ ރައީސްގެ މަޤާމުގައި ހުންނެވި ޢައްބާސް މަޤާމުން އިސްތިޢުފާ ދެއްވުމަށް ގޮވާލައިފައެވެ. ޙައްދުފަހަނައަޅާފައިވާ އިސްރާއީލުން އިސްތިޢުމާރުކޮށްފައިވާ ހުޅަނގު އައްސޭރީގެ ރާމަﷲގައި ކުރި މުޒާހަރާތަކުގައި އެއްވެސް ހަމަނުޖެހުމެއް ހިނގައިފައެއް ނުވެއެވެ.
ފަލަސްޠީނުގައި ޞުލްޙަ ޤާއިމުކުރުމުގެ މަސައްކަތުގެ ދަށުން ސަރުކާރެއް އެކުލަވާލާފައިވަނީ 1990ގެ އަހަރުތަކުގެ ތެރޭގައެވެ. އެ ގޮތުން ހުޅަނގު އައްސޭރީގައި ވެރިކަން ކުރަނީ ޢައްބާސްގެ ފަތަޙަ ޖަމާޢަތުންނެވެ. އަދި ޣައްޒާގައި ވެރިކަންކުރަނީ ޙަމާސް ޖަމާޢަތުންނެވެ. ފާއިތުވި ދުވަސްތަކުގައި ސަރުކާރާއި ޢައްބާސްގެ މަޤުބޫލުކަންވަނީ ވަރަށް ބޮޑަށް ކުޑަވެފައެވެ. ޤައުމުގައި ޚިޔާނާތާއި ފަސާދަ އިތުރުވެ އިޤްތިޞާދީ ގޮތުން ގިނަ ދަތިތަކެއް ކުރިމަތިވުމުގެ ސަބަބުން ޢާންމުންވަނީ ވަރަށް ބޮޑަށް ހިތްހަމަނުޖެހިފައެވެ.
ފާއިތުވި 15 އަހަރު ދުވަހުގެ ތެރޭގައި ފަލަސްޠީނުގައި ފުރަތަމަ ފަހަރަށް އިންތިޚާނެއް ބާއްވަން ނިންމި ނަމަވެސް ތަފާތު އުޒުރުތައް ދެއްކުމަށްފަހު ޢައްބާސްވަނީ އިންތިޚާބު ފަސްކުރައްވައިފައެވެ. އެއާއެކު ޢައްބާސާމެދު އޮތް ހިތްހަމަނުޖެހުމާއި ނަފުރަތުވަނީ ޢާންމުންގެ މެދުގައި އިތުރުވެފައެވެ. އިންތިޚާބެއް ނުބާއްވަން ޢައްބާސް ނިންމެވީ ޙަމާސަށް އޮތް ތާޢީދު ބޮޑުކަމުންކަމަށް ބެލެވެއެވެ. އެ ގޮތުން އެންމެ ފަހުން ފަލަސްޠީނުގައި ބޭއްވި އިންތިޚާބުވެސް ކާމިޔާބުކޮށްފައިވަނީ ޙަމާސުންނެވެ. ނަމަވެސް ވެރިކަން އެ ޖަމާޢަތާ ޙަވާލުކުރުމަށް ޢައްބާސްވަނީ ފަސްޖެހިވަޑައިގެންފައެވެ. ޚާއްޞަކޮށް މިދިޔަ މެއި މަހުގެ ތެރޭގައި ޔަހޫދީންގެ ފައުޖުތަކާ ދެކޮޅަށް ހޯދި ކާމިޔާބުތަކުގެ ސަބަބުން ޙަމާސްގެ މަޤްބޫލުކަންވަނީ ވަރަށް ބޮޑަށް އިތުރުވެފައެވެ.
ޢައްބާސަކީ ހުޅަނގުގެ ޤައުމުތަކުގެ އިތުރުން ޔަހޫދީންގެ މެދުގައިވެސް ވަރަށް މަޤްބޫލު ބޭފުޅެކެވެ.