ޔޫރޯ 2020 ފުޓްބޯޅަ މުބާރާތުގެ ކްއާޓަރ ފައިނަލްގައި ވާދަކުރާ ޓީމުތައް ކަށަވަރުވެއްޖެއެވެ. މިގޮތުން އެންމެ ފަހު ޓީމުތައް ޔަގީންވެގެން ދިޔައީ ރޭ ކުޅުނު ދެމެޗާއި އެކުއެވެ.
އެހެންކަމުން މިހާރު ކުއާޓަރ ފައިނަލްގެ ފުރަތަމަ މެޗްގައި މިއަންނަ ހުކުރު ދުވަހުގެ ރޭ ބައްދަލުކުރާނީ ދެވަނަ ބުރުގެ ހަވަނަ މެޗްގައި ދުނިޔޭގެ ޗެމްޕިއަން ފަރަންސޭސިވިލާތް ކަޓުވާލުމަށްފަހު ކުއާޓަރ ފައިނަލުން ޖާގަހޯދި ސްވިޓްޒަލަންޑާއި ފަސްވަނަ މެޗްގައި ކްރޮއޭޝިއާ ބަލިކުރި ސްޕެއިންއެވެ. މިމެޗް ފެށުމަށް ހަމަޖެހިފައިވަނީ އެރޭ ރާއްޖޭ ގަޑިން 9 ޖަހާއިރުއެވެ. އެރޭ ދަންވަރު 12 ޖަހާއިރު ކުޅޭ ކުއާޓަރ ފައިނަލްގެ ދެވަނަ މެޗްގައި ބައްދަލުކުރާނީ ދެވަނަ ބުރުގެ ހަތަރުވަނަ މެޗްގައި އެންމެފަހުގެ ޗެމްޕިއަން ޕޯޗުގަލް ބަލިކުރި ބެލްޖިއަމް އާއި ދެވަނަ މެޗުން މޮޅުވި އިޓަލީވިލާތެވެ.
ކުއާޓަރ ފައިނަލްގެ ތިންވަނަ މެޗް ކުޅުމަށް ހަމަޖެހިފައި ވަނީ މިއަންނަ ހޮނިހިރު ދުވަހުގެ ރޭ ރާއްޖޭ ގަޑިން 9 ޖަހާއިރުއެވެ. އެމެޗުގައި ބައްދަލުކުރާނީ ފަހު 16 ގެ ތިންވަނަ މެޗްގައި ނެދަލަންޑްސް ބަލިކޮށް ކުއާޓަރ ފައިނަލުން ޖާގަހޯދި ޗެކް ރިޕަބްލިކާއި ފުރަތަމަ މެޗްގައި ވޭލްސް ބަލިކުރި ޑެންމާކްގެ ޓީމެވެ. އަދި އެރޭ ދަންވަރު ކުޅޭ ކުއާޓަރ ފައިނަލްގެ ފަހު މެޗްގައި ބައްދަލު ކުރާނީ ރޭ ކުޅުނު ދެމެޗު ކާމިޔާބުކުރި އިންގްލަންޑާއި ޔޫކްރެއިންއެވެ.
ކްއާޓަރ ފައިނަލްގެ މެޗްތައް ކުޅުމަށް ހަމަޖެހިފައި ވަނީ ރަޝިޔާގެ ސެއިންޓް ޕީޓަރސްބަރގް އާއި ޖަރުމަނުވިލާތުގެ މިޔުނިކް، އަޒަރުބައިޖާންގެ ބާކޫ އަދި އިޓަލީވިލާތުގެ ރޯމްގައެވެ.