ޔޫއޭއީގެ ބައެއް ޢާންމު މަރުކަޒުތައް ބޭނުންކުރެވޭނީ ކޯވިޑް-19 ވެކްސިން ޖަހާފައިވާ މީހުންނަށްކަމަށް ނިންމައިފިއެވެ. އެ ގޮތަށް ޢަމަލުކުރާނެ ފުރަތަމަ ސަރަޙައްދެއްގެ ގޮތުގައި އެ ޤައުމުގެ ސަރުކާރުން ނިންމާފައިވަނީ އަބޫ ޟަބީއެވެ.
އޮގަސްޓު މަހުގެ 20ވަނަ ދުވަހުން ފެށިގެން ވެކްސިން ނުޖަހައި ނުވަދެވޭ ތަންތަނުގެ ތެރޭގައި މަދަރުސާތަކާއި ކުޑަކުދިން ބަލަހައްޓައި މަރުކަޒުތައް ހިމެނެއެވެ. އޭގެ އިތުރުން ވިޔަފާރި މަރުކަޒުތަކާއި ރެސްޓޯރަންޓުތަކާއި ޖިމުތަކާއި ދާރުލްއާސާރުތަކާއި ރިސޯޓުތައްވެސް ހިމެނެއެވެ. އަދި ސުޕަމާކެޓުތަކާއި ބޭސް ފިހާރަތައް ފިޔަވައި އެހެން ފިހާރަތަކަށްވެސް ވަދެވޭނީ ވެކްސިން ޖަހާފައި ތިބި މީހުންނެވެ. ނަމަވެސް މަޤްބޫލު ސަބަބަކާހުރެ ވެކްސިން ޖެހުމަށް އުޒުރުވެރިވާ މީހުންނާއި އުމުރުން 15 އަހަރުން ދަށުގެ ކުޑަކުދިން އެ ޤަވާއިދުން އިސްތިސްނާވެއެވެ. ދެ މަސް ދުވަސްފަހުން އެ ޤަވާއިދަށް ޢަމަލުކުރަން ނިންމާފައިވަނީ ވެކްސިން ޖެހުމަށް ޢާންމުންނަށް ފުރުޞަތު ދިނުމުގެ ގޮތުންނެވެ.
ޔޫއޭއީގައި މިހާތަނަށް 628،976 މީހުންނަށް ކޯވިޑް-19 ޖެހި 1.802 މީހުންވަނީ މަރުވެފައެވެ. މިދިޔަ ޖަނަވަރީ މަހުގެ ތެރޭގައި ގިނަ ޢަދަދެއްގެ މީހުންނަށް ބަލިޖެހުނު ނަމަވެސް އެ ޢަދަދު މިހާރުވަނީ ވަރަށް ބޮޑަށް ދަށަށް ގޮސްފައެވެ. އަބޫ ޟަބީގައި 93 އިންސައްތަ މީހުންނަށްވަނީ ވެކްސިން ދީފައެވެ.