މުޅި ދުނިޔެއާ އެކަހެރިވެފައި އޮންނަ އުތުރު ކޮރެޔާއާއި ހަނގުރާމައިގައި ސުންނާފަތިވެފައިވާ މެދިއިރުމަތީގެ ޤައުމެއްކަމަށްވާ ސޫރިޔާއާ ދެމެދު އެއްގޮތް ގިނަ ކަންތައްތަކެއް ހުރެދާނެކަމަށް ފުރަތަމަ ވިސްނައިލުމުން ހީނުވެދާނެއެވެ. ނަމަވެސް އެ ދެ ޤައުމުގެ އިސްވެރިންކަމަށްވާ އުތުރު ކޮރެޔާގެ ޒައީމް ކިމް ޖޮން އުންއާއި ސޫރިޔާގެ ރައީސް ބައްޝާރުލް ޢަސަދަކީ ވަރަށް އެއްގޮތް ފިކުރެއް ގެންގުޅުއްވާ އެއްކަހަލަ މާޒީއެއް އޮތް ދެ ބޭފުޅުންނެވެ. އެހެންކަމުން އެ ދެ ބޭފުޅުންނަކީ ވަރަށް ގާތް ދެ ބޭފުޅުންނަށްވަނީ ވެފައެވެ.
ދެ ޤައުމުގެ ދެ ވެރިންނަށްވެސް ވެރިކަން ވާރުތަވީ އެ ބޭފުޅުންގެ ބައްޕާފުޅުގެ ފަރާތުންނެވެ. ދެ ބޭފުޅުންނަކީވެސް އެ ބޭފުޅުންނަށް ތާޢީދުކުރާ ބައިނަލްއަޤްވާމީ ބައިވެރިން ހޯދުމުގައި ދަތިތަކާ ކުރިމަތިލައްވަމުންދާ ދެ ބޭފުޅުންނެވެ. އެކަމުގެ ސަބަބުން ދެ ބޭފުޅުންގެ ދެމެދުގައި އޮންނަ ރަޙްމަތްތެރިކަންވަނީ ވަރަށް މުހިންމު ގުޅުމަކަށް ވެފައެވެ.
2021ވަނަ އަހަރުގެ ފުރަތަމަ ހަ މަސް ދުވަހުގެ ތެރޭގައި ކިމްއާއެކު އެންމެ ގިނަ ސިޓީ ބަދަލުކުރައްވާފައިވާ ބޭފުޅަކީ ޢައްސަދުކަމަށް އުތުރު ކުރޮޔާގެ ދަޢުލަތުގެ ނޫސް އިދާރާއިންވަނީ ބުނެފައެވެ. މި އަހަރުގެ ޖަނަވަރީ މަހާއި ޖޫން މަހާ ދެމެދު ދެ ބޭފުޅުންގެ މެދުގައި 12 ފަހަރެއްގެ މަތިން ސިޓީ ބަދަލުކުރައްވާފައިވެއެވެ. އެއީ މިދިޔަ އަހަރުގެ ތެރޭގައި ދެ ބޭފުޅުން ސިޓީ ބަދަލުކުރެއްވި ޢަދަދާ އެއްވަރު ޢަދަދެކެވެ. އެންމެ ފަހުން ސޫރިޔާގައި ބޭއްވި އިންތިޚާބު ބަލައިނުގަތުމަށް އދއާއި ދުނިޔޭގެ ގިނަ ޤައުމުތަކުން ނިންމި ނަމަވެސް އިންތިޚާބު ކާމިޔާބު ކުރެއްވުމުން ކިމްވަނީ ޢައްސަދަށް މަރުޙަބާ ކިޔުއްވައިފައެވެ.
2011ވަނަ އަހަރުގެ ތެރޭގައި ސޫރިޔާގެ ދާޚިލީ ހަނގުރާމަ ފެށުމުން އުތުރު ކޮރެޔާއިންވަނީ އެ ޤައުމުން ޢައްސަދަށް ތާޢީދުކުރާކަން އިޢުލާނުކޮށްފައެވެ. އުތުރު ކޮރެޔާއިން ސޫރިޔާއަށް ކެމިކަލް ހަތިޔާރު ފޯރުކޮށްދޭކަމުގެ އަޑުތައް އޭރު ފެތުރުނެވެ. ނަމަވެސް އުތުރު ކޮރެޔާއިންވަނީ އެއީ ޙަޤީޤަތެއް ނެތް ވާހަކަތަކެއްކަމަށް ބުނެފައެވެ.
2018ވަނަ އަހަރުގެ ތެރޭގައި ސޫރިޔާގެ ދޫމާއަށް ސަރުކާރުގެ ފައުޖުތަކުންވަނީ ޙަމަލާތަކެއް ދީފައެވެ. އެ ޙަމަލާތަކުގައި 43 މީހުން މަރުވިއެވެ. އެ ޙަމަލާތައް ދިރާސާކުރުމަށްފަހު 2019ވަނަ އަހަރުގެ ތެރޭގައި ދަ އޯގަނައިޒޭޝަން ފޮރ ދަ ޕުރޮހިބިޝަން އޮފް ކެމިކަލް ވެޕަންސް، އޯޕީސީޑަބުލިޔުއިން ބުނީ އެ ޙަމަލާތަކުގައި ކުލޮރިން ބޭނުންކޮށްފައިވާކަމަށެވެ. ހަމަ އެ އަހަރު އދންވަނީ ސޫރިޔާގައި ބޭނުންކުރާ ކެމިކަލް ހަތިޔާރާ އުތުރު ކޮރެޔާއާ ގުޅުވައިފައެވެ. ސޫރިޔާއަށް ބެލިސްޓިކު މިސައިލުވެސް އުތުރު ކޮރެޔާއިން ފޯރުކޮށްދީފައިވެއެވެ. ނަމަވެސް ދެ ޤައުމާ ދެކޮޅަށްވެސް ބައިނަލްއަޤްވާމީ ދުނިޔެއިން ދަތިކުރުމުގެ ގިނަ ފިޔަވަޅުތަކެއް އަޅާފައި އޮތުމުން އެ މުއާމަލާތްތަކަށް ފައިސާ ދައްކާފައިވަނީ އޮޅުވާލައިގެންނެވެ. ދެ ރިޕޯޓުގައިވެސް ފާހަގަކޮށްފައިވާ ގޮތުގައި އުތުރު ކޮރެޔާގެ ފަރާތުން ސޫރިޔާއަށް ވާގިވެރިވާ ހަމައެކަނި ދާއިރާއަކީ ކެމިކަލް ހަތިޔާރު ފޯރުކޮށްދިނުމުގެ ދާއިރާ ނޫންކަމަށެވެ. 2016ވަނަ އަހަރުގެ ތެރޭގައި އުތުރު ކޮރެޔާގެ އަސްކަރިއްޔާއިން ސޫރިޔާގައި ޙަރަކާތްތެރިވެފައިވާކަމަށްވެސް ބެލެވެއެވެ.
ސޫރިޔާއާއި އުތުރު ކޮރެޔާގެ ގުޅުން ފެށުނީ ސޫރިޔާގެ ދާޚިލީ ހަނގުރާމައިގެ ތެރެއިންނެއް ނޫނެވެ. ފިނި ހަނގުރާމައިގެ ދުވަސްވަރު 1967ވަނަ އަހަރުގެ ތެރޭގައި އުތުރު ކޮރެޔާއިންވަނީ ސޫރިޔާއަށް ޕައިލެޓުން ފޮނުވައިފައެވެ. 1980ގެ އަހަރުތަކުގައި އުތުރު ކޮރެޔާގެ ކުރީގެ ޒައީމް ކިމް ޖޮން ދެވަނަވަނީ ސޫރިޔާގެ އަސްކަރީ އޮފިސަރުންނަށް އެ ޤައުމުގެ އަސްކަރީ ޔުނިވަސިޓީގައި ތަމުރީނުވުމުގެ ޙުއްދަ ދެއްވައިފައެވެ. އޭރުއްސުރެ އެ އެއްބަސްވުން އަދިވެސް ދެމި އެބައޮތެވެ. 2015ވަނަ އަހަރުގެ ތެރޭގައި ސޫރިޔާގެ ވެރިރަށް ދިމިޝްޤުގައި ހުންނަ ޕާކެއްވެސްވަނީ އުތުރު ކޮރެޔާގެ ބާނީ ކިމް ދެވަނައަށް ޚާއްޞަކޮށްފައެވެ.