1990ވަނަ އަހަރުގެ ފަހުން މިޞްރުގެ ރައީސެއް ރަސްމީ ދަތުރުފުޅެއްގައި ޢިރާޤަށް ވަޑައިގެންފިއެވެ.
މިޞްރުގެ ރައީސް ޢަބްދުލް ފައްތާޙް އަލްސީސީ ޢިރާޤަށް ވަޑައިގެންފައިވަނީ މިޞްރާއި ޢިރާޤާއި އުރުދުނުން ބާއްވައި ބައްދަލުވުމެއްގައި ބައިވެރިވަޑައިގަތުމަށެވެ. އެ ބައްދަލުވުމުގައި ބައިވެރިވެވަޑައިގެންނެވުމަށް އުރުދުންގެ ރަސްގެފާނު ޢަބްދުﷲ ބިން ޙުސައިންވެސްވަނީ ޢިރާޤަށް ވަޑައިގެންފައެވެ. އެ ބައްދަލުވުމުގައި ޢިރާޤުގެ ފަރާތުން ބައިވެރިވެވަޑައިގަންނަވާނީ އެ ޤައުމުގެ ބޮޑުވަޒީރު މުސްޠަފާ އަލްކާޟިމީއެވެ.
1991ވަނަ އަހަރު ކުރި ގަލްފު ހަނގުރާމައަށްފަހު މިޞްރާއީ ޢިރާޤުގެ ގުޅުން ވަރަށް ބޮޑަށް ހީނަރުވިއެވެ. ނަމަވެސް ޢިރާޤުގެ ކުރީގެ ރައީސް ސައްދާމު ޙުސައިންގެ ވެރިކަން ހުޅަނގުގެ ޤައުމުތަކުން ވައްޓާލިފަހުން ދެ ޤައުމުގެ ގުޅުންވަނީ ވަރަށް ބޮޑަށް ބަދަހިވެފައެވެ. މެދުއިރުމަތީގައި އީރާނުގެ ބާރާއި ނުފޫޒު ވަރުގަދަ ކުރަމުންދާ ދަނޑިވަޅެއްގައި ޢަރަބި ޤައުމުތަކުގެ މެދުގައި ހީނަރުވެފައިވާ އޮތް ގުޅުން ބަދަހިކުރުމަށް އެމެރިކާއިން ވަރަށް ބޮޑަށް ބާރުއަޅައެވެ. ޚާއްޞަކޮށް ޝިޢީންގެ ބޮޑު އާބާދީއެއް އޮންނަ ޢިރާޤާ އެހެން ޢަރަބި ޤައުމުތަކުން ގުޅުން ބަދަހިކުރުމަކީ އެމެރިކާއިން ވަރަށް ބޭނުންވާ ކަމެކެވެ. އެންމެ ގިނަ ޢަދަދަކަށް ޝިއީން ދިރިއުޅޭ ދެ ޤައުމަކީ އީރާނާއި ޢިރާޤެވެ.
ޢިރާޤުގައި ބާއްވައި ބައްދަލުވުމަކީ އެ ތިން ޤައުމުގެ މެދުގައި ބާއްވައި އެފަދަ ތިންވަނަ ބައްދަލުވުމެވެ. އެ ބައްދަލުވުންތަކުގައި ތިން ޤައުމުގެ މެދުގައި ސަލާމަތާއީ އިޤްތިޞާދާއި ވިޔަފާރީގެ ގުޅުންތައް ވަރުގަދަކުރުމަށް މަޝްވަރާކޮށްފައިވެއެވެ. މި ފަހަރު ބައްދަލުވުމުގައި އެ ކަންކަމުގެ އިތުރުން ފަލަސްޠީނުގެ މައްސަލައާއި ނިރުބުވެރިކަމާ ގުޅޭގޮތުން މަޝްވަރާކޮށްފައިވެއެވެ.
ފާއިތުވި އަހަރުތަކުގެ ތެރޭގައި ޢިރާޤުންވަނީ ތަޢުލީމާއި ޞިއްޙަތާއި ހަކަތައިގެ ދާއިރާއިން މިޞްރާއި އުރުދުންނާއެކު ގުޅުން ބަދަހިކޮށްފައެވެ. އެ ގޮތުން ޢިރާޤުންވަނީ ގުޅުން ބަދަހިކުރުމަށް 15 އެއްބަސްވުމެއްގައި ސޮއިކޮށްފައެވެ.