އިނގިރޭސިވިލާތުގެ ޞިއްޙަތާބެހޭ ވަޒީރު މަޤާމަށް ކުރިން މާލީ ވަޒީރުކަން ކުރައްވާފައިވާ ސާޖިދު ޖަވީދު ޢައްޔަންކުރައްވައިފިއެވެ.
އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން ޞިއްޙަތާބެހޭ ވަޒީރުގެ މަޤާމަށް ޖާވިދު ޢައްޔަންކުރައްވާފައިވަނީ އެ މަޤާމުގައި ކުރިން ހުންނެވި މެޓު ހެންކޮކް އިސްތިޢުފާ ދެއްވުމުންނެވެ. ހެންކޮކް އިސްތިޢުފާ ދެއްވާފައިވަނީ އޭނާގެ ރަސްމީ އިދާރާގައި އަންހެން މުވައްޒަފަކާއެކު ގާތްގޯޅިވެ ނަހަމަ ގުޅުމެއް ހިންގެވި ވީޑިޔޯއެއް ޢާންމުވުމުންނެވެ. އެއީ މޭއި މަހުގެ 6ވަނަ ދުވަހުގެ ވީޑިޔޯއެކެވެ. އެ ދުވަސްވަރު އިނގިރޭސިވިލާތުގައި ރައްކާތެރިކަމުގެ ހަރުކަށި ފިޔަވަޅުތަކެއްވަނީ އަޅައިފައެވެ. އެ ގޮތުން އެއް ގެއެއްގައި ނޫޅޭ މީހުން އެއްތަންވެ ގާތްގޯލިވެ އުޅުންވަނީ އެ ދުވަސްވަރު މަނާކޮށްފައެވެ. އެ ވީޑިޔޯ ޢާންމުވިގޮތުގެ ތަޙްޤީޤެއް އިނގިރޭސިވިލާތުގެ ސަރުކާރުންވަނީ ފަށައިފައެވެ.
މަޤާމާ ޙަވާލުވެވަޑައިގަތުމަށްފަހު ޖާވިދު ވިދާޅުވީ އެނާ އެންމެ މުހިންމު ކަމެއް ދެއްވާނީ ބަލިމަޑުކަން ޢާންމު ޙާލަތަކަށް ގެނައުމަށްކަމަށެވެ. އޭނާ މަޤާމާ ޙަވާލުވެވަޑައިގެންފައިވަނީ އިނގިރޭސިވިލާތުގެ ޞިއްޙީ ފަރުވާގެ ނިޒާމަށް ވަރަށް ބާރު ބޮޑުވެފައިވާ ދަނޑިވަޅެއްގައެވެ. އެ ގޮތުން ކޯވިޑް-19 ޖެހޭ މީހުންގެ ޢަދަދު އިތުރުވުމާއި ހަސްފަތާލުތަކާއި ޞިއްޙީ އެހީތެރިންގެ ކަންކަން ރަނގަޅު ކުރަން އޭނާއަށް ޖެހިވަޑައިގަންނަވާނެއެވެ. އޭނާވަނީ ހެންކޮކް ކުރެއްވި މަސައްކަތްތަކަށް ވަރަށް ބޮޑަށް ތަޢުރީފުކުރައްވައިފައެވެ.
އިނގިރޭސިވިލާތަށް ހިޖުރަކުރި ޕާކިސްތާނުގެ ދެމަފިރިއަކަށް ލިބުނު ދަރިއެއްކަމަށްވާ ޖާވިދު މާލީ ވަޒީރުކަން ކުރައްވާފައިވަނީ 2019ވަނަ އަހަރުގެ ޖުލައި މަހުގެ 24ވަނަ ދުވަހުން 2020ވަނަ އަހަރުގެ ފެބްރުއަރީ މަހުގެ 13ވަނަ ދުވަހުގެ ނިޔަލަށެވެ. އޭނާ އެ މަޤާމުން އިސްތިޢުފާ ދެއްވާފައިވަނީ އޭނާގެ ސިޔާސީ މުޝީރުން ވަކިކުރަން ޖޮންސަން އެންގެވުމުން އުފެދުނު ޚިޔާލުތަފާތުވުންތަކުގެ ތެރޭގައެވެ.