އިނގިރޭސިވިލާތުގެ ޞިއްޙަތާބެހޭ ވަޒީރުގެ މަޤާމުން މެޓު ހެންކޮކް އިސްތިޢުފާ ދެއްވައިފިއެވެ. ހެންކޮކް އިސްތިޢުފާ ދެއްވާފައިވަނީ ކޯވިޑް-19އާ ދެކޮޅަށް އަޅާފައިވާ ފިޔަވަޅުތަކާ ޚިލާފުވެވަޑައިގެންނެވުމުން އިނގިރޭސިވިލާތުގެ ރައްޔިތުންގެ ފާޑުކިޔުން އޭނާއަށް ވަރަށް ބޮޑަށް އަމާޒުވުމުންނެވެ.
އިނގިރޭސިވިލާތުގެ ބޮޑުވަޒީރު ބޮރިސް ޖޮންސަންނަށް ފޮނުއްވި އިސްތިޢުފާގެ ސިޓީގައި ހެންކޮކް ވިދާޅުވީ އޭނާގެ ޒާތީ ޙަޔާތްޕުޅުގެ ސަބަބުން ކުރިމަތިވެފައިވާ ކޯވިޑް-19ގެ ކާރިޘާއަށް ހިޔަނިއެޅެން ބޭނުންފުޅުނުވާކަމަށެވެ. ހެންކޮކް ވިދާޅުވީ އޭނާގެ ޢަމަލުގެ ސަބަބުން ޢާއިލާއަށް ބޮޑު ހިތްދަތިކަމެއް ލިބިފައިވާކަމަށާއި އޭނާ ބޭނުންފުޅުވަނީ ދަރިންނާއެކު ވަޤުތު ހޭދަކުރައްވަންކަމަށެވެ.
އިނގިރޭސިވިލާތުގެ ޞިއްޙަތާބެހޭ ވަޒީރުގެ މަޤާމުން ހެންކޮކް އިސްތިޢުފާ ދެއްވުމަށް ޢާންމުން ބާރުއަޅާފައި އޭނާއަށް ފާޑުކިޔުން ޢަމާޒުކޮށްފައިވަނީ އޭނާގެ ރަސްމީ އިދާރާގެ ތެރޭގައި އަންހެން މުވައްޒަފަކާއެކު ގާތްގޯޅިވެ ނަހަމަ ގުޅުމެއް ހިންގެވި ވީޑިޔޯއެއް ޢާންމުވުމުންނެވެ. އެއީ މޭއި މަހުގެ 6ވަނަ ދުވަހުގެ ވީޑިޔޯއެކެވެ. އެ ދުވަސްވަރު އިނގިރޭސިވިލާތުގައި ރައްކާތެރިކަމުގެ ހަރުކަށި ފިޔަވަޅުތަކެއްވަނީ އަޅައިފައެވެ. އެ ގޮތުން އެއް ގެއެއްގައި ނޫޅޭ މީހުން އެއްތަންވެ ގާތްގޯލިވެ އުޅުންވަނީ އެ ދުވަސްވަރު މަނާކޮށްފައެވެ.
ޞިއްޙަތާބެހޭ ވަޒީރުގެ މަޤާމުން އިސްތިޢުފާ ދެއްވި ހެންކޮކް ގާތްގޯޅިވެ ނަހަމަ ގުޅުމެއް ހިންގަވާފައިވަނީ ޖީނާ ކޮލްޑެންޖެލޯ ނަމަކަށް ކިޔާ އަންހެން މުވައްޒަފަކާއެވެ. ހެންކޮކާއި ޖިނާއާ ދެމެދު ގާތްގުޅެމެއް އުފެދިފައިވަނީ އޮކްސްފޯޑު ޔުނިވަސިޓީގައި ކިޔަވައި ވިދާޅުވި ދުވަސްވަރުގައެވެ. އޭގެ ފަހުން ޖީނާއާއި ހެންކޮކަކީ ވަރަށް ގާތް ރަޙްމަތްތެރި ބޭފުޅުންނެވެ. ޞިއްޙަތާބެހޭ ވުޒާރާގެ އިސް މަޤާމަކަށް ޖީނާ ޢައްޔަން ކުރުމުންވެސް ޢާންމުންގެ މެދުގައި ބޮޑެތި ހިތްހަމަނުޖެހުންތަކެއް އުފެދުނެވެ. އެ ގޮތުން އަހަރަކު 15 ނޫނީ 20 ދުވަހު މަސައްކަތްކުރާ ގޮތަށް ޖީނާއަށް 15،000 ޕައުންޑުގެ މުސާރައެއް ދޭގޮތަށްވަނީ ހަމަޖައްސައިފައެވެ.
ފާއިތުވި މަސްތަކުގެ ތެރޭގައި ބޮޑެތި ފާޑުކިޔުންތަކެއް އަމާޒުވެފައިވާ ހެންކޮކުގެ ވުޒާރާއިން ޖީނާގެ ބޭބެ މަސައްކަތްކުރާ ކުންފުންޏަކަށް ކޯވިޑް-19އާ ގުޅުން ހުރި ބައެއް މަސައްކަތްތައް ދީފައިވާ މައްސަލައެއްވެސްވަނީ ފެންމަތިވެފައެވެ.