އީރާނުގެ ނިޔުކްލިޔަރ މަރުކަޒުތަކުގެ މަޢުލޫމާތު އދގެ ނިޔުކްލިޔަރ ހަކަތަޔާބެހޭ އިދާރާކަމަށްވާ އައިއޭއީއޭއާ ޙިއްޞާކުރުމަށް ވެފައިވާ އެއްބަސްވުމުގެ މުއްދަތު ހަމަވުމުން އެ އެއްބަސްވުމުގެ މުއްދަތު އިތުރުކުމަށް އައިއޭއީއޭއިން ހުށަހަޅާފައިވާ ހުށަހެޅުމަށް އިޖާބަދޭން ނުޖެހޭނެކަމަށް އީރާނުން ބުނެފިއެވެ.
2015ވަނަ އަހަރުގެ ތެރޭގައި ދުނިޔޭގެ ބޮޑެތި ބާރުތަކާއެކު އީރާނުން ވެފައިވާ އެއްބަސްވުމުގެ ދަށުން އެ ޤައުމުގެ ނިޔުކްލިޔަރ މަސައްކަތްތައް މަދުކުރުމުގެ ބަދަލެއްގެ ގޮތުގައި އެ ޤައުމާ ދެކޮޅަށް އަޅާފައިވާ ދަތިކުރުމުގެ ބައެއް ފިޔަވަޅުތައް އުވާލުމަށްވަނީ އެއްބަސްވެފައެވެ. އެއްބަސްވުމުގައި އެމެރިކާއާއި އިނގިރޭސިވިލާތާއި ރަޝިޔާއާއި ޖަރުމަނުވިލާތާއި ފަރަންސޭސިވިލާތާއި ވިލާތުގެ އިއްތިޙާދާއި ޗައިނާއިން ބައިވެރިވެފައިވެއެވެ. ނަމަވެސް 2018ވަނަ އަހަރުގެ ތެރޭގައި އެމެރިކާއިންވަނީ އެއްބަސްވުމުން ވަކިވެ އީރާނާ ދެކޮޅަށް ދަތިކުރުމުގެ ގިނަ ފިޔަވަޅުތަކެއް އަލުން އަޅައިފައެވެ. އޭގެ ސަބަބުން އީރާނުންވަނީ އެއްބަސްވުމާ ޚިލާފަށް ބައެއް ކަންތައްތައް ކުރަން ފަށައިފައެވެ.
އީރާނުގެ ނިޔުކްލިޔަރ މަރުކަޒުތަކުގެ ކެމެރާތަކުން ފެންނަ މަންޒަރުތައް އައިއޭއީއޭއާ ޙިއްޞާކުރުމަށް މިދިޔަ ފެބްރުއަރީ މަހުގެ ތެރޭގައި އީރާނުންވަނީ އެއްބަސްވުމެއް ޤާއިމުކޮށްފައެވެ. އެފަދަ އެއްބަސްވުމެއް ޤާއިމުކުރީ އައިއޭއީއޭއިން އީރާނުގެ ނިޔުކްލިޔަރ މަރުކަޒުތައް ބަލައި ފާސްކުރުމަށް ދެމުންދާ އެއްބާރުލުން ކުޑަކަމަށް ބުނުމުންނެވެ. އީރާނުގެ ނިޔުކްލިޔަރ މަރުކަޒުތަކުގެ ކެމެރާތަކުން ނަގައި ފޮޓޯތައް ތިން މަސް ދުވަހުގެ މުއްދަތަށް އައިއޭއީއޭއާ ޙިއްޞާކުރުމަށް ވެފައިވާ އެއްބަސްވުން މެއި މަހުގެ 22ވަނަ ދުވަހު ނިމުމަކަށް އައުމުން ޖޫން މަހުގެ 24 ވަނަ ދުވަހާ ހަމައަށް އެ އެއްބަސްވުމުގެ މުއްދަތުވަނީ އިތުރުކޮށްފައެވެ.
އައިއޭއީއިން ބުނީ އެއްބަސްވުމުގެ މުއްދަތު އަނެއްކާވެސް އިތުރުކުރުމަށް މިދިޔަ ހަފުތާގެ ތެރޭގައި އީރާނަށް ހުށަހަޅާފައިވާނެކަމަށާއި އެ ހުށަހެޅުމަށް އީރާނުގެ ފަރާތުން އަވަސް ޖަވާބެއް ބޭނުންވާކަމަށެވެ. ނަމަވެސް އެއްބަސްވުމުގެ މުއްދަތު އިތުރުކުރަން ބޭނުންވާކަމުގެ އެއްވެސް އިޝާރާތެއް އީރާނުން މިހާތަނަށް ދީފާނުވާކަމަށް އައިއޭއީއޭއިން ބުނެއެވެ.
އައިއޭއީއޭއަށް ކަނޑައަޅާފައި ހުންނަވާ އީރާނުގެ ސަފީރު ޤާސިމު ޤަރީބު އަބާދީ ވިދާޅުވީ އައިއޭއީއޭގެ ހުށަހެޅުމަށް އީރާނުން އިޖާބަދޭން ނުޖެހޭކަމަށެވެ. ނަމަވެސް އެއްބަސްވުމުގެ މުއްދަތު އީރާނުން އިތުރު ނުކޮށްދީފިނަމަ 2015ވަނަ އަހަރުގެ ނިޔުކްލިޔަރ އެއްބަސްވުން އަލުން ރުޖޫޢަކުރުމަށް އީރާނާއި ދުނިޔޭގެ ބާރުތަކާއެކު ކުރަމުންދާ މަޝްވަރާތަކަށް ހުރަސްއެޅޭނެކަމަށް ބެލެވެއެވެ.
އެމެރިކާއިން ބުނީ އީރާނުން ލަސްނުކޮށް އައިއޭއީއޭއަށް އެއްބާރުލުން ދޭންޖެހޭކަމަށެވެ. އަދި އެގޮތަށް އީރާނުން ޢަމަލުނުކުރުމަކީ އެމެރިކާގެ ވަރަށް ބޮޑު ކަންބޮޑުވުމެއްކަމަށް އެމެރިކާގެ ޚާރިޖީ ވަޒީރު އެންތޮނީ ބުލިންކެންވަނީ ވިދާޅުވެފައެވެ.