އަފްޣާނިސްތާނުގައި ޞުލްޙަ ޤާއިމުކުރުމަށް އެ ޤައުމުގައި ޙަރަކާތްތެރިވާ ޠާލިބާން ޖަމާޢަތުން ބޭނުންވޭތޯ ޔަޤީންކުރަންޖެހޭކަމަށް އެމެރިކާއިން ބުނެފިއެވެ. އެމެރިކާއިން އެހެން ބުނެފައިވަނީ އެ ޤައުމުގެ ރައީސް ޖޯ ބައިޑަންނާއި އަފްޣާނިސްތާނުގެ ރައީސް އަޝްރަފް ޣަނީއާއި އެ ޤައުމުގެ ހައި ކައުންސިލް ފޮރ ނޭޝަނަލް ރީކޮންސިލިއޭޝަންގެ މުޤައްރިރު އަބްދުﷲ އަބްދުﷲ ބައްދަލުކުރައްވާފައިވާ ދަނޑިވަޅެއްގައެވެ.
އެމެރިކާގެ ޚާރިޖީ ވަޒީރު އެންތޮނީ ބުލިންކެން ވިދާޅުވީ އެ ބައްދަލުވުމާ ދިމާކޮށް އަފްޣާނިސްތާނުގައި ޠާލިބާނުން ދެމުންދާ ޙަމަލާތައް އިތުރުކޮށްފައިވާކަމަށެވެ. އަފްޣާނިސްތާނުގެ ސަލާމަތީ ކަންކަން ވަރަށް ގާތުން ބަލަމުންދާކަމަށާއި ޞުލްޙަ ޤާއިމުކުރުމަށް ޠާލިބާނުންގެ ޝައުޤުވެރިކަން ހުރި މިންވަރު ބަލަމުންދާކަމަށްވެސް އޭނާ ވިދާޅުވިއެވެ. އަދި އަފްޣާނިސްތާނުގެ ސަރަޙައްދުތައް ގަދަބާރުން ޠާލިބާނުންގެ ބާރުގެ ދަށަށް ގެންދިޔުމަށް މަސައްކަތްކުރުމަކީ ޞުލްޙަ ޤާއިމުކުރުމަށް ކުރަމުންދާ މަސައްކަތާ ފުށުއަރާ ޢަމަލުތަކެއްކަމަށްވެސް ބުލިންކެން ވިދާޅުވިއެވެ.
އަފްޣާނިސްތާނުގައި ޙަމަލާ ބަދަލުކުރުން އިތުރުވެފައިވަނީ ސެޕުޓެންބަރު މަހުގެ 11ވަނަ ދުވަހުގެ ކުރިން އަފްޣާނިސްތާނުގައި ޙަރަކާތްތެރިވާ އެމެރިކާގެ ފައުޖުތައް އެ ޤައުމުން ބާލާނެކަމަށް ބައިޑަން އިޢުލާނުކުރައްވާފައިވަނިކޮށެވެ. އެމެރިކާގެ ފައުޖުތަކުގެ ދެބައިކުޅަ އެއްބައި މިހާރުވަނީ އެ ޤައުމުން ފައިބައިފައެވެ. އަފްޣާނިސްތާނުގެ 419 ޑިސްޓުރިކްޓުގެ ތެރެއިން 81 ޑިސްޓުރިކްޓެއްވަނީ ޠާލިބާނުންގެ ބާރުގެ ދަށަށް ގެނެސްފައެވެ. އަފްޣާނިސްތާނުގައި ޙަރަކާތްތެރިވާ އެމެރިކާގެ ސިފައިން އެ ޤައުމުން ފޭބުމުން އަފްޣާނިސްތާނުގައި ޠާލިބާނުންގެ ބާރާއި ނުފޫޒު އިތުރުވާނެކަމަށް ބެލެވެއެވެ. އެމެރިކާގެ ޖާސޫސީ އިދާރާތަކުން މިދިޔަ މެއި މަހުގެ ތެރޭގައި ކުރި ދިރާސާއެއްގައި ބުނެފައިވަނީ ފާއިތުވި އަހަރުތަކުގައި އަންހެނުންގެ ޙައްޤުތައް ކަށަވަރުކުރުމުގައި ލިބިފައިވާ ކުރިއެރުންތައް އެމެރިކާގެ ސިފައިން އެ ޤައުމުން ފޭބުމުން ގެއްލޭނެކަމަށް ބެލެވޭކަމަށެވެ.