ރަހީނުކޮށް މަރާލާފައި އޮއްވާ ފެނުނު 13 އަހަރުގެ ކުޑަކުއްޖާގެ މައްސަލާގައި ކުޑަކުދިން ހިމެނޭ މައްސަލަތަކުގެ ޚަބަރު ޝާއިޢު ކުރުމުގައި ޢަމަލުކުރަންޖެހޭ މިންގަނޑުތަކާ ޚިލާފުވެއްޖެނަމަ ފިޔަވަޅު އަޅާނެކަމަށް މޯލްޑިވްސް މީޑިއާ ކައުންސިލުން ވިދާޅުވެއްޖެއެވެ.
މޯލްޑިވްސް މީޑިއާ ކައުންސިލުން ނެރުނު ނޫސް ބަޔާނުގައި ވަނީ ކުޑަކުއްޖާގެ މަރުގެ މައްސަލާގައި ރާއްޖޭގެ ބައެއް މީޑިއާތަކުގައި ޝާއިޢުކޮށްފައިވާ ބައެއް ޚަބަރުތަކަކީ ކުޑަކުދިން ހިމެނޭ މައްސަލަތަކުގެ މަޢުލޫމާތު ޝާއިޢު ކުރުމުގައި، މީޑިއާގައި މަސައްކަތްކުރާ ފަރާތްތަކުން ޢަމަލުކުރަންޖެހޭ ހަމަތަކާއި މިންގަނޑުތައް ބަޔާން ކުރާ އުސޫލު އަދި ކުޑަކުދިންނާ ގުޅޭ ޚަބަރާ މަޢުލޫމާތު ހާމަކުރުމުގެ ގައިޑްލައިންތަކާ ޚިލާފަށް ޝާއިޢުކޮށްފައިވާ ޚަބަރުތަކެއްކަމަށެވެ. އަދި މީޑިއާ ކައުންސިލުންވަނީ އެކަން ހަރުކަށި ޢިބާރާތުން ކުށްވެރި ކުރައްވާފައެވެ.
ރަހީނުކޮށް މަރާލާފައިވާ 13 އަހަރުގެ ކުޑަ ކުއްޖާގެ ފޮޓޯއާއި ނަން އަދި އެކުއްޖާއަކީ ކާކުކަން ދެނެގަނެވޭނެ ފަދަ ޒާތީ އެކި މަޢުލޫމާތު ބޭނުންކުރުމާއި ޞައްޙަ ނޫން މަޢުލޫމާތު ބޭނުންކުރުންފަދަ ކަންކަން އެކައުންސިލްގެ ސަމާލުކަމަށް އައިސްފާވާކަމަށް މީޑިއާ ކައުންސިލުން ވިދާޅުވެއެވެ.
ކުޑަކުއްޖާ ރަހިނުކޮށް މަރާލާފާ އޮއްވާ ފެނުމާ ގުޅިގެން ގެނެސްދޭ ޚަބަރުތަކަކީ ކުޑަކުދިން ހިމެނޭ މައްސަލަތަކުގައި މަޢުލޫމާތު ޝާއިޢު ކުރުމުގައި، މީޑިއާގައި މަސައްކަތްކުރާ ފަރާތްތަކުން ޢަމަލުކުރަންޖެހޭ ހަމަތަކާއި މިންގަނޑުތަކާއި އުސޫލުތަކާ އެއްގޮތަށް ޢަމަލުކުރުމަށް ހުރިހާ މީޑިއާތަކަށް މޯލްޑިވްސް މީޑިއާ ކައުންސިލުން އިލްތިމާސްކުރައްވައެވެ. އަދި އެގޮތަށް ޢަމަލުނުކުރާ މީޑިއާތަކާއިމެދު ފިޔަވަޅުއަޅާނެކަމަށްވެސް އެ ކައުންސިލުން ވިދާޅުވެއެވެ.