މެއި މަހުގެ 6ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ދިން ޓެރަރިސްޓު ޙަމަލާއާ ގުޅިގެން އެމް.ޑީ.ޕީގެ ޤައުމީ މަޖިލީހުން އެކުލަވާލާފައިވާ "މެއި 6" ކޮމިޓީން ރައްޔިތުންގެ މަޖިލީހުގެ 241 ކޮމިޓީ އާއި ފުލުހުންނާ ބައްދަލުކުރުމަށް ނިންމައި އެމުއައްސަސާތަކަށް ސިޓީއެއް ފޮނުވާފައިވާކަމަށް އެމްޑީޕީން ހާމަކޮށްފިއެވެ.
މެއި 6 ކޮމިޓީ އަކީ ރައީސް ނަޝީދަށް އިންސާފު ހޯދައިދިނުމައްޓަކައި އެމްޑީޕީގެ ޤައުމީ މަޖިލީހުން އުފައްދާފައިވާ ކޮމިޓީއެކެވެ. މެއި 6ވަނަ ދުވަހުގެރޭ ރައީސް ނަޝީދަށް ދިން ޓެރެރިސްޓް ހަމަލާއާ ގުޅިގެން އެމް.ޑީ.ޕީގެ މި ކޮމިޓީން ކުރާ މަސައްކަތުގެ މައިގަނޑު މަޤަޞަދަކީ އެ މައްސަލައިގެ ތަހުގީގު މަސައްކަތްތައް ތަހުގީގަށް ބުރޫނާރާ ފަދައިން ގާތުން ބަލައި އެކަމުގެ މަޢުލޫމާތުތައް އެމް.ޑީ.ޕީގެ ޢާންމު މެމްބަރުންނާ މީޑީއާއަށް ހާމަކުރުންކަމަށް އެ ކޮމިޓީން ބުނެއެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޮމިޓީން ވިދާޅުވީ މި ޙަމަލާއާ ގުޅިގެން ވަރަށް ގިނަ އަދަދަކަށް ދިވެހި ރައްޔިތުންގެ ކަންބޮޑުވުންތަކެއް އެބަހުރިކަމަށެވެ. އަދި އެ ކޮމިޓީން އެ ހަމަލާ ވަރަށް ބޮޑަށް ކުށްވެރިކުރައްވައި އެ ކަމުގެ އަޑި ހޯދާނެކަންވެސް 6 މެއި ކޮމިޓީން ވަނީ ހާމަކޮށްފައެވެ.
ރައީސް ނަޝީދަށް ދިން ޙަމަލާއާ ގުޅިގެން ސުވާލުކޮށް މައުލޫމާތު ހޯދުމަށް ރައީސުލް ޖުމްހޫރިއްޔާގެ އިތުރުން ދައުލަތުގެ އެހެން އިދާރާތަކާ އަދި އެމް.އެން.ޑީ.އެފް އާވެސް ބައްދަލުކުރުމަށް އެދޭނެ ކަމަށްވެސް އެ ކޮމީޓީން ބުނެއެވެ.