މެއި 6ގެ ޙަމަލާއާ ގުޅޭ މަޢުލޫމާތު ޢާއްމު މެމްބަރުންނަށް ދޭން މަސައްކަތް އެބަކުރަން - އެމްޑީޕީ
ރައީސް ނަޝީދުގެ ސިއްޙީ ހާލުކޮޅާއި، އެމަނިކުފާނަ އިންސާފު ހޯދުމަށްކުރުވޭ މަސައްކަތްތަކުގެ ސައްޙަ މަޢުލޫމާތު އެމްޑީޕީގެ ޢާންމު މެންބަރުންނަށް ފޯރުކޮށްދިނުމަށް ޚާއްސަ މަސައްކަތްތަކެއް ފަށާފައިވާކަމަށް އެޕާޓީގެ "މެއި ހައެއް" ކޮމިޓީން ބުނެފިއެވެ.
އެމްޑީޕީގެ 175ވަނަ ޤައުމީ މަޖިލީހުގެ ބައްދަލުވުމުގައި މިކަން ހާމަކުރެއްވީ ރައީސް ނަޝީދު އަވަހާރަކޮށްލަން ދިން ހަމަލާގެ ތަހުގީގު ކުރިއަށްދާ ގޮތަށް ފަރާވެރިވުމަށް "މެއި ހައެއް"ގެ ނަމުގައި އުފައްދާފައިވާ އެޕާޓީގެ ކޮމިޓީގެ ޗެއަރޕާސަން ޙަސަން ހަފީފްއެވެ.
ޤައުމު މަޖިލީހުގެ މި ބައްދަލުވުމުގައި އޮތީ ޖޫން 10ގައި އެކުލަވާލި "މެއި ހައެއް" ކޮމިޓީގެ މަސައްކަތްތައް ޙިއްސާކުރުމެވެ. ކޮމިޓީގެ މަސައްކަތްތައް ޙިއްސާކުރައްވަމުން އެކޮމިޓީގެ ޗެއަރޕާސަން ޙަސަން އަފީފުވަނީ މެއި 6ގައި ރައީސް ނަޝީދަށް ދިން ހަމަލާއާއި ގުޅޭ ޓައިމްލައިނެއް ޙިއްސާކުރައްވާފައެވެ.
އަދި ހަމަލާއާގުޅިގެން ކުރިއަށްދާ ތަޙުޤީގާއި އެނޫންވެސް ކަންކަމާއި ގުޅޭ މައުލޫމާތު ހޯދައި މެންބަރުންނާއި ޙިއްސާކުރުމަށް ޕާޓީގެ ތެރެއިން ކޮމިއުނިކޭޝަން ޓީމެއް ކަނޑައަޅާފައިވާއިރު، އެޓީމުން ސޯޝަލް މީޑިއާއާއި އެނޫންވެސް ގޮތްގޮތުން އާންމުނަށް މައުލޫމާތު ފޯރުކޮށްދިނުމަށްވަނީ ނިންމާފައިކަމަށް ކޮމިޓީން ވިދާޅުވިއެވެ. އެގޮތުން ކޮމިއުނިކޭޝަންގެ އިސްފަރާތެއްގެ ގޮތުގައި ކަނޑައަޅާފައިވަނީ އުނގޫފާރު ދާއިރާގެ މެންބަރު މުޙައްމަދު ވަޙީދުއެވެ.
ރައީސް ނަޝީދަށް ދިންހަމަލާއާއި ގުޅިގެން އެމަނިކުފާނުގެ ސިއްޙީ ހާލުކޮޅުގެ މައުލޫމާތާއި އިންސާފުހޯދަން ކުރެވޭ މަސައްކަތްތަކާއި ގުޅޭ ފުރިހަމަ މައުލޫމާތު އާންމު މެންބަރުންނަށް އެންމެ ރަނަގަޅަށް ލިބެމުން ނުދާކަން ޤައުމީ މަޖިލީހުގައި މެންބަރުން، ފާހަގަކުރެއްވުމުން "މެއި ހައެއް" ޗެއަޕާސަން ޙަސަން އަފީފު ވިދާޅުވީ އެކޮމިޓީން ކޮމިއުނިކޭޝަން ކޮމިޓީއެއް އެކުލަވާލައި ރައީސް ނަޝީދާއި، އެމަނުކުފާނަށް ދިންހަމަލާއަށް އިންސާފުހޯދަން ކުރެވޭ މަސައްކަތްތަކުގެ މަޢުލޫމާތު ހާމަކުރުމަށް މަސައްކަތްތަކެއް ކުރަމުންގެންދާކަމަށެވެ.
"އަޅުގަނޑުމެންގެ ޢާންމު މެންބަރުންނަށް، ޚާއްސަކޮށް އަތޮޅުތަކުގައި ތިބި ޕާޓީގެ އާންމު މެންބަރުންނަށް މިކަމާގުޅޭ މަޢުލޫމާތުލިބޭ ގޮތަށް މަޢޫލޫމާތު ޝީޓެއް ނުވަތަ ނިއުސް ލެޓަރއެއް ތައްޔާރުކުރެވޭތޯ އަޅުގަނޑުމެން މަސައްކަތްކުރަމުން މިދަނީ. މިކަމުގައި އާންމު މެންބަރުންގެ ބޮޑު ކަންބޮޑުވުމެއް އެބައޮތް. އެހެންކަމުން މިކަމުގައި އަޅުގަނޑުމެންނަށްލިބޭ ހުރިހާ މައުލޫމާތެއް ޙިއްސާކުރަން އަޅުގަނޑު ބޭނުން" ޙަސަން އަފީފު ވިދާޅުވިއެވެ.
"މެއި ހައެއް" ކޮމިޓީން ބުނީ ރައީސް ނަޝީދަށް ދިން ހަމަލާއާ ގުޅިގެން ފުލުހުންނާއި މަޖިލީހުގެ 241 ކޮމިޓީއާވެސް ބައްދަލުކުރަން ނިންމާފައިވާކަމަށާއި ވަރަށް އަވަހަށް އެބައްދަލުވުންތައް ބޭއްވޭނެކަމަށް އުންމީދުކުރާކަމުގައި ކޮމިޓީގެ ޗެއަރޕާސަން ވިދާޅުވިއެވެ. އަދި
އެމްޑީޕީއާ ގުޅުން އޮންނަ ބައިނަލްއަޤްވާމީ ސިޔާސީ ޕާޓީތަކާއި ގުޅިގެން އެހީތެރިކަން ހޯދަން މަސައްކަތްކުރަމުން ގެންދާނެކަމަށް "މެއި ހައެއް" ކޮމިޓީން ވިދާޅުވިއެވެ.
ޙަސަން އަފީފް ވިދާޅުވީ ހިއުމަން ރައިޓްސް ކޮމިޗަނުންވެސް މިމައްސަލައާ ގުޅިގެން އެންމެ އެކަށީގެންވާ ގޮތުގައި ހަރަކާތްތެރިނުވާކަމުގެ ކަންބޮޑުވުން ބައެއް ފަރާތްތަކުން ފާޅުކޮސްފައިވާކަމަށާއި، އެކޮމިޝަނުން މި ހަމަލާއާއި ގުޅިގެން މިހާތަނަށް ކޮށްފައިވާ ކަންކަން ދެނެގަތުމަށް މަސައްކަތްކުރާނެކަމަށެވެ.
ޤައުމީ މަޖިލިސް ބައްދަލުވުން ނިންމާލައްވަން އެމްޑީޕީގެ ޗެއަރޕާސަން ޙަސަން ލަތީފް ވިދާޅުވީ "މެއި ހައެއް" ކޮމިޓީގެ މަސައްކަތްތަކަށް އެޕާޓީގެ ފުރިހަމަ އެއްބާރުލުން ލިބިގެންދާނެކަމަށެވެ. އަދި ރައީސް ނަޝީދަށް ދިން ހަމަލާއާއި ގުޅިގެން ރައީސް ނަޝީދަށް އިންސާފު ހޯދައިދިނުމަށް އެޕާޓީންކުރާ މަސައްކަތްތައް ހުއްޓިގެން ނުދާނެކަމަށެވެ.
އެގޮތުން އެމްޑިޕީން ކުރާ މަސައްކަތުގެ އަމާޒުބަދަލުކުރަން ބަޔަކު މަސައްކަތްކުރަމުންދާކަމަށްވިދާޅުވެ ޙަސަން ލަތީފު ވަނީ ރައީސް ނަޝީދަށް އިންސާފު ހޯދައިދިނުމަށް އެންމެ ތަނކޮޅެއްވެސް ދޫދިނުމެއްނެތި ޕާޓީއެއްގެ ސިފައިގައި އެމްޑީޕީން މަސައްކަތްކުރާނެކަމުގެ ޔަޤީންކަންވަނީ ދެއްވާފައެވެ.